Ézódos 24 - Bokyi Bible

Óburúkpâbí o/kúlî Ocím mú o/ryí ne Banet-Ézerel

¹ Óburúkpâbí o/sét Músis o/fu, wo ne Éron ne Nádap ne Abyíhu ne banet-ashí-Ézerel bajam bachât esim diǐkpú, yú n̂g kyíbóng-kaku ba-kâm mě. Waa n̂g áku tíbítíbí ba-tíngê kyísí ba-fé mě.

² Wo nké nke adabê fáráng, onet okíri ké burwám ebe o*dachi o-bâ o-fárâng mě*. Banet ḿbé áku ba*dachi ba-yú nang kaku káku*.

³ Músis o/dim o-da-sét banet-Ézerel kángkáng byije ḿbyí Óburúkpâbí o/kye, ne kángkáng banet ba-faa ba/fu, be byi-chi i nang ebóng chwǒm ńkyí Óburúkpâbí oo/sét.

⁴ Músis o-sáng kángkáng byije ḿbyí Óburúkpâbí kyísí. Ké dyicófóróng pirípirí ńdyí orî-dyicí, Músis o/bi kyikit-kyifen echi ké kyikû-kaku, o-bi aká diǐkpú ne afee, buká ne buká bu/bwom ké dyishí-byikû-banet diǐkpú ne byifee ḿbyí Ézerel.

⁵ Ne o-twóm byisat ba-chi byifen ḿbyí badashí byirim-byitú ba-kye Óburúkpâbí, ba-chi to byifen-kyikwáré ne Óburúkpâbí ké bampong ba-cibi ne mbyí.

⁶ Músis o-kúng kyicê-baróng-enyam ányi o-fé ké acáng, o-yip kyicê ńkyí áku o-pwó ké kyikit-kyifen echi.

⁷ Ne o-kúng kâng nwet-ocím eryí mú o/sáng byije-Óburúkpâbí ké mǔ o-kó kámú o-sét banet. Mbé ba-faa ba/fu, be byi-jwo ng Óburúkpâbí byi-chi nang ebóng chwǒm ńkyí o/sét bě.

⁸ Ne Músis o-yip kâng baróng-enyam ḿbé o/fé ké acáng o-pwó banet ké byiko. O-sét kámbé o/fu, nyín baróng ḿbé ba/kúlî ocím mú shwaneshwane, mú Óburúkpâbí o/ryí ne ben ké nkéré mú o/kye běn kángkáng byije ḿbyín.

⁹ Músis ne Éron ne Nádap ne Abyíhu ne banet-ashí-Ézerel bajam bachât esim diǐkpú ba-yú kyíbóng-kaku,

¹⁰ ba-ri Osówo mú Ézerel. Ké byiká emen, chwǒm kyi/mû éné wǎ dyibe-esí ńdyí ba/chi ké aká nyí badakó safára, bulûbulu wǎ bubóng.

¹¹ Osówo o*da/chi banet-ashí-Ézerel ḿbén chwǒm*. Mbé ba/ri Osówo, ba-ryí byiryíng, ba-jwáp bato burwám.

Músis o/yú Kaku ńké Sána

¹² Óburúkpâbí o/sét Músis o/fu, yú kyíbóng-kaku a-kâm mě. Ké nkéré aa/yú, n/chi n-kye ǒ biǐbáá-aká byifee ḿbyí mbyi ne kángkáng byije ḿbyí nn/sáng n/fu, basét banet ejí.

¹³ Músis ne Jóshwa mú onet-ochwâp emen ba-kpá byiko, ne Músis o-kpet eyú kaku-ociring o-câ.

¹⁴ Músis o-sét banet-ashí-Ézerel o/fu, bwom m̂ bě onyín ké bampyep eten tete byi-ca byi-bwa esim. Éron ne Hôo mbe nyín ne ben. Nang yeě kâng nké kyiraa kyi/róng ǎ ne onet, baca ba-kâm kámbé ba-nap kámbé.

¹⁵ Músis o-yú kaku ńké Sána, ófíbí o-cít kánké.

^16-17 Ne busan ḿbú ragerage ḿbú bu/fím ké bushú ḿbú Óburúkpâbí bu-shû bu-bâ ké kaku ánke. Banet ḿbé Ézerel ba/ri kiinwángé ánkyi wǎ okwâ nké mu o-mang ng kyíbóng-kaku. Ófíbí o/cít kaku ké ací nyâchât, ne ké ací káchâtkányi, Óburúkpâbí o-bwom ké ófíbí ámu o-kó Músis.

¹⁸ Músis o-yú o-ca kyíbóng-kaku o-da-nung ké ófíbí ámu. Ányi nké o/waa ké bajam-ací bafee.