Ézódos 23 - Bokyi Bible

Ntûntû ne Bampan ḿbé Dángdáng ekét

¹ *Dachi a-kûkoo byiraa ḿbyí byi*fí ké kafâ* a-sét ng a-câ* ne *dachi a-sét kyisédéng a-bwom onet mú o/chi kyibî ké esim*.

² Â bujê-banet chwóó ba/chi kyibî, nang ba/bwom bantûesé ḿbé ba*fí ké kafâ* *dachi a-bwom ne mbé ké kyikû*.

³ *Dachi a-két mpan o-nwa onet* ké nǎ, onet ámu mu kyikpu*.

⁴ Â a/ri mpong nang kaanyam-atû ńké onet-bushwôn eyên ńké kaa/kédê ké orí, kám kánké a-ba-kye oyén.

⁵ Â a/ri ké kaanyam-atû emen kaa/myii dyitû dyi-nye kánké, chwáp onet-bushwôn eyên ámu o-bêem kaanyam-atû emen ka-bwom cip. *Dachi a-dim a-mîng ǎ ányi*.

⁶ *Da n̂g ené onet-kyikpu mpan mú ntûntû epan* â o/bê ké esuk*.

⁷ *Da n̂g ebât banet byiraa* ne *da n̂g eshwân onet mú o*da/chi kyibî* ké nǎ, me n/chi n-két mpan o-bên nang yeě mú o/chi dyizong-kyibî ánkyi.

⁸ *Da n̂g ekoo ngu* ké nǎ, ngu o-chi i onet oo*nyît ńkyí nkyi ntûntû* ne o-bên n mpan mú onet mú o*da/chi kyibî*.

⁹ *Da n̂g etî ocinónet ké bukwóp ḿbú boo*nwa*. Ben bamu ba-nyît ng ńkyí kyida běn echi â bamu ocinónet, ké nǎ, ben ba/mû bacinbánet ké Éjip.

Ké Aje Káchâtkányi ne Ací Káchâtkányi

¹⁰ Ké aje nyâchât, kpang n̂g byifát enen, ba-fuu byiryíng ḿbyí byidafé ké mbyí.

¹¹ Nké ké aje káchâtkányi, mîng n̂g kyikit ánkyi kyi-jáng, *da n̂g echi ba-fuu nang ebóng ńkyí nkyi ké nkyí*. Banet-byikpu ba-man n eryí byěm ḿbyí mbyi ké kyifát ánkyi. Enyam-dyikán to e-man n eryí kyicê-byěm ḿbyí byidawaa. Chî n̂g eringe ebónge ne byifát-byirim-byichí enen.

¹² Chi n̂g bǎmkpóngé ké ací nyâchât ké kyipyán, nké ké ací káchâtkányi, *da n̂g echi bǎmkpóngé* eringe nyí básóng enen ne ḿbé bacinbánet ḿbé mbe ba-chi i běn bǎmkpóngé badajáng, byitú enen to byi-jáng.

¹³ Fwôo n̂g atông ba-jwo kángkáng byěm ḿbyí me Óburúkpâbí nn/sét běn. *Da n̂g efé nshwam ba-kye esówo ekíri*. *Da n̂g ekó nang azîn ebe*.

Biǐtí-Ajî-Byifen Byichât

¹⁴ Kû n̂g echi ajî-byifen byichât ké dyije, ḿbyí bada mě ekye ofê.

¹⁵ Ké otukáku mú Ábyip, mú ba/dim ba-mîng Éjip, chi n̂g dyijî-kyifen ńkyí berêt mú baa*fé bukye ḿbú odamut* eringe nyí me n/sét běn. *Da n̂g echi ba-ryí berêt mú badafé bukye ḿbú budachi kámú o-mut* ké ací jangjang káchâtkányi nyí badachi dyijî ándyi*. *Da n̂g echi ba-bâ mě ofê ekye* â ba*da/kám chwǒm ńkyí badachi kyifen ba-kye mě*.

¹⁶ Chi n̂g dyijî-kyifen ńkyí badafuu byiryíng, ké nkéré ba-kú ba-kpet ng byiryíng efuu. Chi n̂g dyijî-kyifen ńkyí boompyep ebi ké ashí-burwom, ké nkéré mú badabóng byirim-byichí ké asín-byichí.

¹⁷ Kángkáng dyije, ké ajî-byifen ḿbyín byichât, kángkáng banyinchéng ba-man ba-bâ ba-ba-kye mě ofê, me Osówo Óburúkpâbí enen.

¹⁸ Â ba-kú ba-chi i kyifen-kyitú ba-kye mě, *da n̂g echi ba-cibi kánkyí ne berêt mú badafé bukye ké mǔ o-mut*. Bafwám-enyam nyí badachi kyifen ba-kye mě ké nkéré mú ajî ńnyín, baa*man ba-waa tete orî-dyicí*.

¹⁹ Kángkáng dyije, kúng n̂g bambwôp kashú-byiryíng ḿbyí badafuu ba-bâ ne mbyí ké kyise ńkyí Osówo Óburúkpâbí enen. *Da n̂g echi ba-rám wǎn-ebû ké abî nyí ba/nwárê boné emen*.

Ocím eryí ne Bacê

²⁰ Me n/chi n-twóm orím ejí mú onong o-bwóp běn kashú, o-ku běn ké nkéré ba-kú ba-cen n ba-câ, eringe nyí odabê ne ben ké kyikit ńkyí nn/nap n-tî.

²¹ Fwôo n̂g atông ba-jwo ǎ, ba-chi ńkyí oda běn esét. *Da n̂g ebírî bunwa ne nyǐ* ké nǎ, me nké n/twóm ǎ, ne oo*ba/chi o-pwoo běn ké bunwa ḿbú ba/chi ba-bírî éné ne nyǐ*.

²² Nké â ben ba/jwo ǎ, ba-chi kángkáng byěm ḿbyí n/sét běn, me n/chi n-nwa ne kángkáng banet-bushwôn enen.

²³ Orím ejí mú onong o/chi o-ca běn kashú, o-kúng běn o-ca ne ben ké esí nyí banet ḿbé Ámórit ne nyí ḿbé Hyítat ne nyí ḿbé Périzit ne nyí ḿbé Kínan ne nyí ḿbé Hyíbit ne nyí ḿbé Jébus, ne n/chi n-ju kámbé.

²⁴ *Da n̂g echi ba-tíngê kyísí ké bushú-erím-bakye ebe* ba-fé nang kányí* ne *da n̂g ekúng édúú ebe nyí bakye esháng*. Bên n̂ erím-bakye ebe, ba-sé aká-ociring ebe.

²⁵ Â ben ba/kye mě me Osówo Óburúkpâbí enen ofê, me n/chi n-jware běn n-kye běn byiryíng ne omu, ne n/chi n-chi běn ba-nyange ké kángkáng byirwóm enen ḿbyí bamu ba-rwôm m.

²⁶ Ké esí enen, onyinyi oo*ba/chi o-kyú mú dyifít dyida ǎ ebyí* nang mú oo*ba/chi o-fwon wǎn*. Me n/chi n-chi běn ba-kpen ba-wu.

²⁷ Me n/chi n-chi banet ḿbé mbe ba-bwom m bunwa ne ben ba-kû mě eshî. Me n/chi n-chi banet ḿbé bamu ba-nwa ng byití ne mbé ba-firi yógeyóge, ne n/chi n-chi kángkáng banet-bushwôn ba-chêe ké bushú enen. [

²⁸ N/chi n-fé banet-bushwôn enen bushî.] N/chi n-ró banet ḿbé Hyíbit ne ḿbé Kínan ne ḿbé Hyítat ké nkéré ba-kú ba-câ kámbé ké abwô.

²⁹ Me mm*ba/chi n-ró kámbé ké dyije dyibónge*. Â n/chi éné, ba/chi ba-chêe esí e-waa dyikáá, ne byibî-enyam byi/chi byi-jang ejê ḿbyí badanwa ne mbyí.

³⁰ Ńkyí n/chi n-chi, n/chi n-ró kámbé ké onyin ké onyin tete ben ba-jê mú badakoo esí.

³¹ Me n/chi n-chi buti-esí enen bu-nere bu-fím ké dyiga ńdyí Ákwaba tete bu-ribi ké kace ńké Yuférétyis, bu-fím to ké baya ḿbé Medeterényan bu-ribi ké kyikim-dyikán. Me n/chi n-kye běn busa ḿbú badakpógê bayén-esí, ne ba/chi ba-ró kámbé â ba-kú ba-câ kámbé ké abwô.

³² *Da n̂g eryí ocím nang obónge ne mbé* nang ne bakye ebe*.

³³ *Da n̂g ebángê banet ámbe ba-kyú ké oshê enen*. Â ba/mîng kámbé ba-kyú ne ben, ba/chi ba-chi běn ba-chi byibî ké bushú ejí. Â ben ba-kye esówo ebe ofê, kyi/chi kyi-kyú kyibî-kaǎtám ńké baa/kuu ba-tî byiko enen.