Ézódos 21 - Bokyi Bible

Eringe nyí badakûtî Básóng

¹ Kye banet-Ézerel byije ḿbyín a/fu,

² â onet o/ré ósóng mú o/fím Hyíburu, ósóng ámu o-chi i ǎ bǎmkpóngé ké aje nyâchât. Ké aje káchâtkányi, ósóng ámu ofiri ké byiko emen, nang chwǒm oo*kye*.

³ Â o/mû o*da/bé ne onyi ne o-firi ósóng* o*dachi o-bé onyi o-dim ne nyǐ ké nkéré o/firi ké byiko emen*. Nké â o/mû ne onyi ne o-firi ósóng eyên, o-man n ekpî onyi emen o-dim ne nyǐ ké nkéré o/firi ké byiko emen.

⁴ Â bonchí o/kye ósóng emen onyi mú o/fwon ǎ bwǎn, onyi ámu ne bwǎn ámbe baa*kyú ḿbé ósóng* ba-kyú u ḿbé bonchí. Ósóng ámu o-dim m kǎnchí o-mîng bonchí.

⁵ Nké â ósóng ámu o/sét o/fu, bonchí emen ne onyi emen ne bwǎn emen mbe ba-jê ng ǎ, ne mu o-ryuu ng o/fu, nyǐ o-waa ng ké búsóng,

⁶ bonchí emen o-man n ekúng ósóng ámu kâng o-ca ne nyǐ ké kyikit ńkyí mbe ba-kyâ Óburúkpâbí ofê. Â ba/ribi ké kyikit ánkyi, ochi ósóng ámu o-jêem ké dyifyi, nang ké ocím-dyifyi, o-rim ǎ butông. Â o/chi éné, ósóng ámu o-waa ng ne bonchí emen tete o-kpú.

⁷ Â onyinchéng o/kúng wǎn emen mú onyinyi o-shee wǎ ósóng, mú wǎn-onyinyi ámu oo*byí to ké búsóng* wǎ eringe nyí básóng ḿbé banyinchéng badabyí*.

⁸ Â ba/shee ǎ onyinchéng mú mu o-ryuu ng o/fu, nyǐ o-bé ng ǎ, nké mú wǎn-onyinyi o*fí o-jê ng ǎ* onyinchéng ámu obwa esim ne nyǐ o-shee bonchí emen. Mú onyinchéng mú o/mû o/ré ǎ oo*man ǎ eyip o-shee ocinónet* [ké nǎ, mú onyinchéng ámu o*da ǎ echi kanong*.]

⁹ Â onyinchéng o/ré ósóng-onyinyi o/fu, nyǐ o-kyâ wǎn emen mú onyinchéng o-bé, onyinchéng ámu o-man o-tî mú wǎn-onyinyi ámu wǎ wǎn emen.

¹⁰ Â onyinchéng ámu o/bé nnyinyěng-onyi, o-man o-kûkye onyi emen mú kashú dyizong-byiryíng ne byídí byibónge, o-tông ng ǎ kángkáng kyijé ńkyí o/mû o-tông ng ǎ kpákpá.

¹¹ Â o*fí o-kyâ ǎ byěm ámbyi* oman dyibé ne onyi emen ámu, oo*koo chwǒm ne nyǐ*.

Byije kyi-kim ne Anwa enwa

¹² Nang yeě nké o/díp onet o-ju, baju to onet ámu.

¹³ Nké â kyi/chi wǎ chwǒm-ofene, o/mû o*da/tigi o/fu, nyǐ o-ju ng ǎ* onet ámu o-man n echêe o-jâ ké kyikit ńkyí n/chi n-cá n-kye ǎ. Ányi nké o/chi o-kyú, chwǒm kii*chi ǎ*.

¹⁴ Nké â kafâ ka/sa onet o-tigi ne dyityém emen o-ju onet okíri, baju to onet ámu, nang o-bwa o-chêe o-jâ ké kyikit-kyifen ejí echi eringe nyí odafem.

¹⁵ Nang yeě nké o/díp bonchí nang boné emen, baju onet ámu.

¹⁶ Nang yeě nké o/jii onet, nang o-da ng ǎ eshee, nang o-da ng ǎ etî wǎ ósóng, baju onet ámu.

¹⁷ Nang yeě nké o/shú bonchí nang boné emen, baju onet ámu.

¹⁸ Â bunwa bu/róng nké onet obónge o/yip buká nang [égbi emen] o-díp onet, nké o*da ǎ eju* ba*dachi ba-chi onet ámu chwǒm*. Â onet mú ba/díp ǎ éné o/róng orwôm,

¹⁹ o-kan enyange, o-bûu o-kpet ecen kyíjí ne ochí, onet mú o/díp ǎ okye ǎ akpuga ké nkéré mú o/bên ǎ, o-tún ǎ tete o-nyange.

²⁰ Â onet o/yip ochí o-mín ósóng emen nang mú onyinchéng nang mú onyinyi, nké ósóng ámu o/kpú ké abe ányi, bakye onet ámu busông.

²¹ Nké â kyi/shwôm dyicí dyibónge nang ací afee ne ósóng ámu o-kpú, ba*dachi ba-chi bonchí-ósóng ámu chwǒm*. Ósóng mú o/tánê ǎ éné o/kwárê ké busông emen.

²² Â banyinchéng mbe ba-nwa ng bunwa ba-némê onyinyi mú mu ne dyifít, ba-chi ǎ dyifít dyi-byí, o*da/némê ké kyikit kyikíri* bakét onet mú o/némê ǎ akpuga nang nǎ nyí otyép emen odafu nyǐ o-koo ng, nyí banet ḿbé badakét mpan badabángê ké nyǐ.

²³ Nké â ba/némê mú onyinyi oyén, busông ḿbú ba/chi ba-kye onet mú oda ǎ enémê éné bu/chi bu-kyú, â mú onyinyi o/kpú, baju onyinchéng ámu to.

²⁴ Â o/sé ǎ dyichi, basé ǎ to dyichi. Â o/zú ǎ busháng, bazú ǎ to busháng. Â o/két ǎ bubwô, bakét ǎ to bubwô. Â o/két ǎ kyiká, bakét ǎ to kyiká.

²⁵ Â o/shí ǎ okwâ, bashí ǎ to okwâ. Â o/némê ǎ, banémê ǎ to. Â o/pwát ǎ kyikit, bapwát ǎ to kyikit.

²⁶ Â onet o/díp ósóng emen, nang mú onyinchéng nang mú onyinyi ké dyichi, o-sé ǎ kándyí, ozú ósóng ámu abwô o-jâ, o-ré byiko emen ké dyichi ándyi ńdyí dyi/sêe ǎ.

²⁷ Â o/díp ǎ o-bú busháng, ozú ósóng ámu abwô o-jâ.

Byije kyi-kim ne Banet ḿbé mbe ne Byitú

²⁸ Â mpong o/tím onet o-ju, batím mpong ámu aká ba-ju, ba*dachi ba-ryí kámú*. Nké ba*dachi ba-chi oyén-mpong chwǒm*.

²⁹ Nké â mpong o/mû o-fwam m enwa ne banet ne ba/mû ba-kuri ng oyén-mpong ámu ekó, ne o*da/man ekám kámú o-fé ké kyise*. Â mpong ámu o/tím onet o-ju, batím mpong ámu aká ba-ju, ba-ju to oyén-mpong.

³⁰ Nké â ba/fu, mbé ba-bángê e oyén-mpong ámu o-ré dyifwá ńdyí kyitông emen ké akpuga, o-man o-kye ocím-akpuga nyí ba/fé kerededet.

³¹ Â mpong ámu o/ju wǎn-onyinchéng nang wǎn-onyinyi, kyije kyi-kyú u eringe ebónge.

³² Â mpong ámu o/ju ósóng mú onyinchéng nang mú onyinyi, oyén-mpong okye oyén-ósóng akpuga-syílyíba bujam esim diǐkpú. Batím to mpong ámu aká ba-ju.

³³ Â onet o/bâa dyibíng ńdyí o/sím o-tî fúú, nang o/sím dyibíng o*da/cít kándyí* o-mîng mpong nang kaanyam-atû ka-róng ké ndyí,

³⁴ o-man o-ré dyifwá-kyitú ánkyi. O-kyâ oyén-kyitú akpuga ányi, o-kúng kyikwóm â kyi/nyîn ǎ.

³⁵ Â mpong mú onet obónge o/ju mpong mú onet okíri, mbé ashí afee bashee mpong ámu okpó ba-kyii akpuga. Bakyii to enyam-mpong mú o/kpú.

³⁶ Nké â mbe ba-nyît ng ba/fu, mpong ámu o/mû o-fwam m ekye bunwa, ne oyén o*da/kám kámú o-fé ké kyise* o-man o-ré dyifwá ńdyí mpong mú o/kpú, o-kye mpong okíri. Â kyi/nyîn ǎ, o-man n ekúng kyikwóm-mpong o-dim ne nkyí.