Ézódos 20 - Bokyi Bible

Byije-Osówo Diǐkpú

¹ Osówo o/raa, ne ejá emen nyí o/raa e/mû něen,

² me n-chi i Osówo Óburúkpâbí enen mú o/fîm běn ba-byí ké Éjip, ké kyikit ńkyí ba/mû básóng.

³ *Da n̂g efé Osówo okíri kyi-cibi ne me*.

⁴ *Da n̂g echi ba-mee chwǒm nang kyibónge ńkyí nkyi kyíbóng* nang kyísí* nang ké kafâ-buce ḿbú ké esí* ba-tî wǎ barím-bakye*.

⁵ *Da n̂g etíngê kyísí ba-fé orím-bukye nang obónge* ké nǎ, me n-chi i Osówo Óburúkpâbí enen, ne orêm mu o-chi i mě kyi-kim ne esówo ekíri. Me mu n-kyâ banet ḿbé mu n-sa ng kámbé kafâ busông, cibicibi ne bwǎn ebe tete kyi-ribi ké byikim-banet byinyii.

⁶ Nké banet ḿbé mu n-jê ng kámbé, ba-tî ng byije ejí, kyijé ejí ńkyí ndatông ne bwǎn ebe [kyi-waa ng ne banyá.]

⁷ *Da n̂g echi ba-zîim dyizîn ejí ké kyibî-chwǒm* ké nǎ, me Osówo Óburúkpâbí enen n/chi n-kye nang yeě busông, mú o/zîim dyizîn ejí ké bukwóp ḿbú boo*nwa*.

⁸ Tî n̂g byije ḿbyí dyicí-ékwâbashi, ba-tî kándyí wǎ dyicí-ociring.

⁹ Ben bamu ne ací nyâchât nyí badachi bǎmkpóngé enen,

¹⁰ nké ké ací káchâtkányi, dyicí ándyi dyicí-dyijâng ńdyí dyi/já mě. Ké dyicí ándyi, onet nang obónge o*dachi o-chi bǎmkpóngé* nang ben bayén* nang bwǎn enen* nang básóng enen* nang byitú enen* nang bacinbánet ḿbé baa/bajé ba-kâm běn*.

¹¹ Me Óburúkpâbí n/kúng ací nyâchât n-chi ejíí ne bubóng ne baya ḿbé baryên ne kángkáng byěm ḿbyí mbyi ké mbyí, nké ké ací káchâtkányi, me n/jáng. Nkyí nké me Óburúkpâbí n/jware dyicí-ékwâbashi, n-chi kándyí dyi-firi ńdyí ejí.

¹² Fé n̂g ńchân ne ńnân eringe nyí ben ba/chi ba-rí chwóó ké esí nyí mu n-kyâ běn.

¹³ *Da n̂g echi ba-ju onet*.

¹⁴ *Da n̂g echi ba-chi kyinam*.

¹⁵ *Da n̂g echi ba-jii kajii*.

¹⁶ *Da n̂g echi ba-bât onet kyiraa ńkyí kyi*fí ké kafâ*.

¹⁷ *Da n̂g eryuu ba/fu, ba-koo ng kyise ńkyí onet okíri*. *Da n̂g eryuu ba/fu, ba-koo ng onyi emen* nang básóng emen* nang byitú emen* nang ebóng chwǒm kyikíri ńkyí mu ne nkyí*.

Bushî ḿbú bu/róng Banet ḿbé Ézerel

¹⁸ Ké nkéré mú banet ḿbé Ézerel ba/jwo etare nyí e/sá ne ntán mú o/jwá, ba-ri to kasabang ne kaku ńké nke ka-byí i erúkwâ, ba/tím banê ké bushî, ba-bwom tíbítíbí.

¹⁹ Ba-raa ne Músis ba/fu, â a/raa ne be byi-jwo ng ǒ, nké byimu byi-shî ng byi/fu, â Osówo o/raa ne be, byi/chi byi-kpú.

²⁰ Músis o-faa kámbé o/fu, *da n̂g echi ba-shî*. Osówo oo/bê o/fu, nyǐ o-bâ ng běn ekan okǎn o-chi běn ba-kû ǎ eshî ba-ca kashú eringe nyí baa*ba/chi ba-chi kyibî*.

²¹ Nké banet ḿbé Ézerel ba/waa ba-bwom tíbítíbí, ne Músis kǎnchí nké o/cen o-fárâng kiǐkpîn-ófíbí ńkyí Osówo o/mû ké kafâ.

Byije kyi-kim ne Byikit-Byifen-Osówo echi

²² Óburúkpâbí o/sét Músis o/fu, osét banet ḿbé Ézerel o/fu, ben baa/ri eringe nyí me Óburúkpâbí mm/bwom kyíbóng n-raa ne ben.

²³ *Da n̂g echi erím-bakye ké gûl ne syílyíba* ba-kûkye kányí ofê* cibicibi ne me*.

²⁴ Kúng n̂g ecing ba-chi kyikit-kyifen echi ba-tî mě. Ké kyikit-kyifen echi ánkyi, kû n̂g echi kyifen ńkyí badakúng etám-ebû ne bampong ba-fwá byi-shí kángkáng, ne wǎ byifen to ḿbyí okwáre ne me. Ké kángkáng byikit ḿbyí n/tî běn n/fu, kû n̂g mě efé, me n/chi m-bâ n-kâm běn m-ba-jware běn.

²⁵ Â ba/kúng aká ba-chi kyikit-kyifen echi ba-tî mě, *da n̂g echi ba-sé aká ányi ne ba-bi kánkyí* ké nǎ, â ba/yip chwǒm ba-bwo buká nang burá, buká ámbu boo*kyú to chwǒm-ociring ejí*.

²⁶ *Da n̂g echi ba-bi kyikit-kyifen echi ba-tî mě ńkyí badatî byikit ḿbyí badayú ne ba-ribi ké nkyí*. Â ba/chi éné, ba/chi ba-kûtông osíndyíbang enen wááng â ba-kú ba-yú u ba-câ kyíbóng.