Ézódos 18 - Bokyi Bible

Jétoro o/dari Músis

¹ Jétoro mú nchi kyifen mú Médyan, mú Músis o/bé wǎn emen o/jwo kángkáng byěm ḿbyí Osówo oo/chi o-kye Músis ne banet ḿbé Ézerel, ké nkéré mú o/tông kámbé kiǐfáng ba-byí ba-mîng Éjip.

² Ne o-dim kâng o-da-ri Músis, o-kpî Zipóra mú onyi-Músis, mú Músis o/mû o/mîng ǎ ké esim,

³ ne bwǎn emen ḿbé banyinchéng ashí afee, Géshom ne Elyǎza. Músis o/mû o/raa o/fu, me nn/kyú ocinónet ké esí nyí n*fí n-nyît ng* ne ké bubwô ámbu, o/fé wǎn emen obónge dyizîn, Géshom.

⁴ Nyǐ o/mû o/raa to o/fu, Osówo mú bonchí ejí o/chwáp mě, o-nyii mě, otu mú Éjip o*da mě eju*. Ne ké bubwô ámbu, o/fé wǎn emen mú obónge dyizîn, Elyǎza.

⁵ Jétoro o/bê ne onyi-Músis ne bwǎn emen ashí afee o-kâm Músis ké kyikim-dyikán ńkyí Músis o/mû mu o-kyú u, ké kaku ńké ka/já Osówo.

⁶ O/mû oo/twóm ejá e-kâm Músis o/fu, mbé mbe ba-bâ,

⁷ ne Músis o-dim o-da-kâm ǎ, o-tíngê kyísí ké bushú emen, o-rwâm ǎ. Ba-bí barî kyi-kim ne enyam-byiko ebe, ne ba-dim ba-da-nung ké mpyep mú Músis.

⁸ Músis o/sét Jétoro kángkáng byěm ḿbyí Óburúkpâbí oo/chi otu ne banet ḿbé Éjip, eringe nyí odanyii banet ḿbé Ézerel. O/sét ǎ to kyi-kim ne afaníkong nyí banet ḿbé Ézerel baa/ri ké bukwóp ne eringe nyí Óburúkpâbí oo/nyii kámbé.

⁹ Ké nkéré mú Jétoro o/jwo kángkáng byiraa ḿbyín, dyityém dyi/nyîn ǎ

¹⁰ ne o-raa o/fu, akpee akyú ne Óburúkpâbí mú o/nyii ǒ ké abwô nyí otu ne banet ḿbé Éjip. Akpee akyú ne Óburúkpâbí mú o/nyii banet emen ké búsóng.

¹¹ Kántîk n-kú n-nyît ng n/fu, Óburúkpâbí mu kiǐtí o-shwôm kángkáng esówo, ké nǎ, nyǐ o/chi ńkyín ké nkéré mú banet ḿbé Éjip ba/kám banet ḿbé Ézerel fúú.

¹² Ne Jétoro o-bâ ne kyitú ńkyí badashí kángkáng ba-kye Osówo, o-chi to byifen byikíri o-kye ǎ. Ne Éron ne kángkáng banet-ashí ḿbé Ézerel ba-dim ba-da-ryí byiryíng-kyifen ánkyi ba-kye Osówo ofê.

Músis o/fîm Banet ḿbé badakûpan Banet ḿbé Ézerel Bampan

¹³ Ké orî-dyicí, Músis o/mû mu o-pan n banet ḿbé Ézerel bampan. O/pan kámbé kyi-fím ké dyicófóróng tete buchú bu-jí.

¹⁴ Ké nkéré mú Jétoro o/ri kángkáng bujê-byěm ḿbyí Músis mu o-chi i, o/bí Músis o/fu, ebóng amu a-chi i kángkáng byěm a-kyâ banet eyên. Ebóng amu a-chi i kángkáng byěm ḿbyín wo kǎnchí, a-chi i banet ba-bwom m kyi-fím ké dyicófóróng tete bu-jí, ba/fu, mbé ba-ri ng ǒ.

¹⁵ Músis o-faa ǎ o/fu, m-man n-chi éné, ké nǎ, banet mbe ba-bâ ba-kâm mě ba/fu, mbé ba-bâ ng ejwo ńkyí Osówo mu o-kabe ng.

¹⁶ Â banet ashí afee mbe ne bushwôn, ba-bâ ba-kâm mě m-pan kámbé mpan, n-sét onet mú mpan o/nwa ǎ, n-sét kámbé to ńkyí Osówo mu o-sét ng, ne byije emen.

¹⁷ Ne Jétoro o-sét kâng Músis o/fu, wo a*fí a-chi i kánkyí ké bukwóp ḿbú bunong*.

¹⁸ Wo a/chi a-ju byiko eyên ne ḿbyí banet eyên. Bǎmkpóngé ḿbén ba/jê ba-shwôm ḿbé wo adachi kǎnchí.

¹⁹ Mîng mě n-kye ǒ bacê ḿbé banong, ne Osówo o/chi o-kyú ne wo. Kyi-nwa ng ńkyí wo adabwom ké bushú ḿbú Osówo ké bubwô-banet eyên, a-kúng byiraa ebe a-sét ǎ.

²⁰ Kûtángê kámbé ńkyí Osówo mu o-ryuu ng, a-kûsét kámbé eringe nyí badakyú, ne ńkyí badachi.

²¹ Nké fîm to banet ḿbé badaman echi byěm a-tî kámbé banet-ashí. Tî banet-ashí ḿbé égot-banet etánge ne ḿbé bajam-banet batánge ne ḿbé bajam-banet bafee esim diǐkpú ne ḿbé banet ashí diǐkpú. Banet ámbe ba-man ba-kyú banet ḿbé badashî Osówo ne ḿbé banet badafé dyityém ne mbé, ḿbé baa*koo ngu*.

²² Mbé ba/chi ba-waa kángkáng nkéré ba-kûpan banet bampan. Ba-man n ebê ne byiraa ḿbyí byiryên ba-kâm ǒ, mbé bayén ba-kûpan byiraa ḿbyí boǒníng. Ńkyí ánkyi kyi/chi kyi-chi byěm bii*sóng ǒ to* ké nǎ, mbé ba/chi ba-kúng kyicê-bǎmkpóngé eyên ba-kûchi.

²³ Â wo a/chi ńkyín wǎ eringe nyí Osówo o/kye busa, aa*ba/chi a-ju byiko eyên* ne kángkáng banet ḿbén ba-man n epan kámbé bampan ebe ba-dim dyijê.

²⁴ Músis o/koo bacê ḿbé Jétoro,

²⁵ ne o-fîm banet ḿbé badaman echi byěm ké burwám-banet ḿbé Ézerel. O/fîm kámbé ba-kyú banet-ashí ḿbé égot-banet etánge ne ḿbé bajam-banet batánge ne ḿbé bajam bafee esim diǐkpú ne ḿbé ashí diǐkpú.

²⁶ Banet ámbe ba/waa bampan banet bampan, ba-pan n byiraa ḿbyí boǒníng mbé bayén, ba-kúng ng ḿbyí byiryên ba-kâm m Músis.

²⁷ Ne Músis o-sét Jétoro o/fu, oca kanong, ne Jétoro o-dim dyijê.