Ézódos 17 - Bokyi Bible

Omu mú o/fím ké Buká

¹ Kángkáng banet ḿbé Ézerel ba/dim ké kyikim-dyikán ńkyí Sîin ba-cen n ba-câ ké byikit ḿbyí Óburúkpâbí mu o-sét ng kámbé. Ba-da-bi oshê ké Refyídim, nké omu o/mû o*fí ké kyikit ánkyi mú badajwáp*.

² Ba-kpet eshwôn ne Músis, ba-sét ǎ ba/fu, kye bě omu byi-jwáp. Músis o-faa o/fu, ebóng bamu ba-kyâ afaníkong něen. Ebóng bamu ba-kan n Óburúkpâbí.

³ Nké omu o/mû o-jang ng ejê kámbé o-shwôm mú ba*da/mîng Músis afaníkong ekye*. Ba-raa ba/fu, ebóng wo a/fîm bě byi-byí ké Éjip. A/fu, a-bâ ng bě echi ne bwǎn eten ne byitú eten byi-kpú kyijé-omu?

⁴ Músis o-fé nshwam kanong kanong o-kye Óburúkpâbí o/fu, me nchi banet ḿbén nǎ. Ba-kú ba-kpá ng ne byiko ḿbyí bada mě etím aká.

⁵ Óburúkpâbí o/sét Músis o/fu, kúng kyicê-banet-ashí ḿbé Ézerel ba-bâ ne wo, ba-bwóp kángkáng banet ḿbé áku kashú. Kúng ochí mú a/mû a/díp ké kace ńké Nâl.

⁶ Me n/chi m-bwom ké bushú eyên ké buká bubónge ḿbú mbu ké kaku ńké Sána. Díp buká ámbu, ne omu o/chi o-byí mú banet ḿbé Ézerel ba/chi ba-jwáp. Músis o-chi éné ké bushú ḿbú banet-ashí ḿbé Ézerel.

⁷ Ba-kpet ekó kyikit ánkyi Mósa ne Meryíba, ké nǎ, banet ḿbé Ézerel ba/shwôn ne Óburúkpâbí ba-kan ǎ ké nkéré mú ba/bí ba/fu, Óburúkpâbí mu ne be ké kyikû? aa o*fí*.

Banet ḿbé Ézerel ba/nwa Byití ne Banet ḿbé Amálek

⁸ Banet ḿbé Amálek ba/dim ba-ba-kye banet ḿbé Ézerel bunwa ké Refyídim.

⁹ Músis o-raa ne Jóshwa o/fu, fîm kyicê-banet ba-da-nwa ne banet ḿbé Amálek nencí. Me n/chi m-bwom kyíbóng-kaku n-níbî ochí mú Osówo o/sét mě o/fu, me nkúng.

¹⁰ Jóshwa o/chi wǎ eringe nyí Músis o/sét, o-dim bunwa enwa ne banet ḿbé Amálek. Músis ne Éron ne Hôo ba-dim kyíbóng-kaku.

¹¹ Â Músis o/yip abwô emen kyíbóng, banet ḿbé Ézerel ba-kpet ekpógê, nké â o/shû kányí kyísí, banet ḿbé Amálek ba-kpet ekpógê.

¹² Ké nkéré mú abwô a/nyii Músis, Éron ne Hôo ba/yip buká ba-ba-kye ǎ o-kyú me, mbé ashí afee ba-bwom ǎ ké bakô, ba-yip ǎ abwô kyíbóng ba-níbî kányí tete esû e-ríbî.

¹³ Ké bukwóp ḿbún nké Jóshwa o/kpógê kángkáng banet ḿbé Amálek.

¹⁴ Ne Óburúkpâbí o-sét Músis o/fu, sáng kyi-kim ne dyikpóge ńdyín eringe nyí banet badakûzîim kándyí. Sét Jóshwa a/fu, n/chi n-ju kángkáng banet ḿbé Amálek.

¹⁵ Músis o-bi kyikit-kyifen echi o/fé kánkyí dyizîn, Óburúkpâbí o-chi i ekap nyí oshê ejí.

¹⁶ O-raa o/fu, [yip n̂g ekap nyí Óburúkpâbí kyíbóng.] Bunwa ḿbú Óburúkpâbí mu o-nwa ng ne banet ḿbé Amálek boo*man ne banyá*.