Ézódos 16 - Bokyi Bible

Mána ne Bunurung

¹ Kángkáng banet ḿbé Ézerel ba/dim ké Élim, ne ké ací onyiryiká ké nnyinyěng-otukáku mú ba/mîng Éjip, ba/baribi ké kyikim-dyikán ńkyí Sîin, ńkyí nkyi ké otyém ne otyém mú Élim ne Sána.

² Ányi nké mbé ashí kángkáng ba/shwôn ne Músis ne Éron,

³ ba-sét kámbé ba/fu, kyi/mû kyi/chi kyi-nyîn bě â Óburúkpâbí o/mû o/ju bě ké Éjip. Áku nang enyam nang byiryíng byirá byi/mû byi/chi byi-já ḿbyí byidaryí byi-kwárê bě. Nké baa/bê ne be ké kyikim-dyikán ńkyín ba/fu, esong eju bě ashí kángkáng.

⁴ Óburúkpâbí o-sét Músis o/fu, n-kú m-bâ echi byiryíng byi-fím kyíbóng byi-róng kyísí, ḿbyí ben kángkáng badaryí. Banet ḿbé Ézerel ba-man ba-dim kángkáng dyicí ba-da-kúng ḿbyí byi/chi byi-kwárê kámbé ké dyicí ándyi. Ké bukwóp ḿbún, n/chi n-kan kámbé n-ri â mbé ba/chi ba-kûchi ńkyí ndasét kámbé.

⁵ Ké ací nyâchât, ba/chi ba-wuri ḿbyí byi/chi byi-kwárê kámbé ké ací afee, ba-rám kámbyí.

⁶ Ne Músis ne Éron ba-sét kángkáng banet ḿbé Ézerel ba/fu, ké dyikurúku ńdyín, ben ba/chi ba-nyît ba/fu, Óburúkpâbí nké o/fîm běn ba-byí ké Éjip.

⁷ Ké dyicófóróng, ben ba/chi ba-ri busan ḿbú ragerage ḿbú Óburúkpâbí. Nyǐ oo/jwo byěm ḿbyí ben bamu ba-bîn n ǎ, ké nǎ, be byimu byi-chi i ńkyí nyǐ oda bě esét.

⁸ Ne Músis o-sét kámbé kâng o/fu, Óburúkpâbí nké o/chi o-kye běn enyam nyí badaryí ké dyikurúku ne ocím-berêt nang orá mú bamu ba-ryuu ng ké dyicófóróng, ké nǎ, nyǐ oo/jwo eringe nyǐ baa/bîn ǎ. Â ben ba/bîn bě, ányi ké ntûntû, bamu ba-bîn n Óburúkpâbí.

⁹ Músis o-sét Éron o/fu, sét kángkáng banet ba-ba-bwom ké bushú ḿbú Óburúkpâbí, ké nǎ, oo/jwo ńkyí mbe ba-bîn n ǎ.

¹⁰ Ńdyí Éron mu o-pem m ne kángkáng banet ḿbé Ézerel, mbé ba/bírî kashú ké kyikim-dyikán, ne ké abe ányi, busan ḿbú Óburúkpâbí ḿbú ragerage bu-byí ké ófíbí.

¹¹ Óburúkpâbí o-raa ne Músis o/fu,

¹² me nn/jwo byěm ḿbyí banet ḿbé Ézerel mbe ba-bîn n mě. Sét kámbé a/fu, ké dyikurúku, ba/chi ba-ri enyam nyí badaryí, ne ké dyicófóróng, ba/chi ba-já ocím-berêt nang orá mú mbe ba-ryuu ng. Ne mbé ba/chi ba-nyît kâng ba/fu, me Óburúkpâbí n-chi i Osówo ebe.

¹³ Ké dyikurúku, dyibóng-bunurung ḿbú badakó kwâl dyi/byí dyi-ba-róng. Dyi/jê kanong kanong ńdyí dyidacít kángkáng oshê mú mbe ba-kyú u. Ké dyicófóróng, kyibû kyi/na ké kángkáng oshê mú mbe ba-kyú u.

¹⁴ Ké nkéré kyibû ánkyi kii/jwóm, boǒbyém bu-byí ányi kyísí ké kyikim-dyikán. Bu/mû bu-sóng ng eníbî wǎ otíntáng-kaǎbú.

¹⁵ Ké nkéré banet ḿbé Ézerel ba/ri kámbú ba*da/nyît dyizong-chwǒm ńdyí mbu* ne ba-bí barî ba/fu, nyín ebóng. Músis o-faa kámbé o/fu, nyín byiryíng ḿbyí Óburúkpâbí oo/kye běn o/fu, ben baryí.

¹⁶ Óburúkpâbí oo/kye běn busa o/fu, nang yeě nang yeě okúng eringe nyí bu/kwárê ǎ. Nang yeě nang yeě okúng balyíta bafee ké dyishí-onet nang orá mú mu ké kyise emen.

¹⁷ Banet ḿbé Ézerel ba/chi éné, kyicê ba/kúng chwóó, kyicê ba-kúng kaǎníng.

¹⁸ Ké nkéré mú baa/kan kámbú ké órúmá, banet ḿbé ba/kúng chwóó ba*da/kúng bu-jê bu-shwôm* ne ḿbé ba/kúng kaǎníng ba*da/kúng ḿbú bu/sîi bu-shwôm*. Nang yeě nang yeě o/mû o/kúng eringe nyí bu/chi bu-kwárê ǎ.

¹⁹ Músis o-sét kámbé o/fu, nang yeě o*dachi o-tî byiryíng ḿbyí emen byi-rí dyicí*.

²⁰ Nké kyicê-banet ba*da/chi eringe nyí Músis o/sét kámbé* ne ba/tî kyicê-byiryíng byi-rí kyikén. Ké orî-dyicí, byiryíng ámbyi byi-fwoo byi-nung ekpim, byi-kpet enung, ne kafâ ka-kpet esa Músis ne banet ámbe.

²¹ Kángkáng dyicófóróng, nang yeě nang yeě o/kúng byiryíng ḿbyí byida ǎ ekwárê ké dyicí ándyi. Ké nkéré mú esû ee/byí, ḿbyí byidawaa kyísí byi-nyange.

²² Ké ací nyâchât, ba/kúng byiryíng ḿbyí byidakwárê kámbé ké ací afee, balyíta banyii ké dyishí-onet obónge. Kángkáng banet-ashí ḿbé Ézerel ba/bê ba-ba-sét Músis kyi-kim ne nkyí,

²³ ne Músis o-raa ne mbé o/fu, Óburúkpâbí oo/kye busa o/fu, nencí nkyi dyicí ńdyí dyi/já ǎ, ńdyí banet badakyú ba-jáng. Rám m̂ nang ebóng dyizong-byiryíng ḿbyí bamu ba-ryuu ng ba/fu, ba-rám m kurún. Nang ebóng chwǒm ńkyí kyi/waa, tî n̂g kánkyí nencí.

²⁴ Wǎ eringe nyí Músis o/kye busa, ba/tî byiryíng ḿbyí byi/waa tete orî-dyicí. Byiryíng ámbyi byi*da/bên* byi-nung ekpim*.

²⁵ Músis o-sét kámbé o/fu, ryí n̂g ḿbyín kurún, ké nǎ, kurún dyicí-ékwâbashi, dyicí ńdyí dyi/já Óburúkpâbí, ńdyí banet badakyú ba-jáng, ne baa*ba/chi ba-ri onyin-kyiryíng kyíjí*.

²⁶ Ba-man ba-kúng byiryíng ké ací nyâchât, nké ké ací káchâtkányi, ké dyicí ńdyí banet badakyú ba-jáng, byiryíng bii*chi*.

²⁷ Ké ací káchâtkányi, kyicê-banet ba/dim ba/fu, mbé ba-da ng ekúng byiryíng, nké ba*da/ri nang onyin*.

²⁸ Ne Óburúkpâbí o-raa kâng ne Músis o/fu, banet ḿbén ba-né ng echi ńkyí n/sét kámbé ka-rí nǎ.

²⁹ Zîim m̂ ba/fu, me Óburúkpâbí nn/kye běn dyicí ńdyí badakyú ba-jáng, ne nkyí nké ké ací nyâchât mu n-kyâ běn byiryíng ḿbyí byida běn ekwárê ké ací afee. Nang yeě nang yeě ké kyise emen ké ací káchâtkányi, o*dachi o-byí kyíjí*.

³⁰ Ké bubwô ámbu, â ací nyâchât a/shwôm, ké ací káchâtkányi, banet ḿbé Ézerel baa*chi bǎmkpóngé*.

³¹ Banet ḿbé Ézerel ba/fé byiryíng ámbyi dyizîn, mána. Byi/mû wǎ kaǎsáng-kyichí ńké kpárádádát, ne byi/mû byi-nyîn n wǎ bakye-okákárá ḿbé ba/fé bakút-bukwan.

³² Músis o-raa o/fu, Óburúkpâbí oo/kye bě busa o/fu, be byikúng kyicê-mána byi-tî mbôt eringe nyí bwǎn eten badari byiryíng ḿbyí nyǐ o/kye bě byi-ryí ké kyikim-dyikán, ké nkéré mú o/fîm bě byi-byí ké Éjip.

³³ Músis o-sét Éron o/fu, kúng otyu a-fé balyíta-mána bafee ké kafâ, a-yip kámú a-tî ké bushú ḿbú Óburúkpâbí, byi-tî bwǎn eten ḿbé mbe ba-bâ ké esim.

³⁴ Wǎ eringe nyí Óburúkpâbí o/mû oo/sét Músis, Éron o/tî kámú ké bushú-mkpukpu-byěm-Osówo eringe nyí mána ámu odawaa ányi.

³⁵ Banet ḿbé Ézerel ba/ryí mána ké bajam-aje bafee tete ba-ribi ké esí nyí Kínan, ké kyikit ńkyí ba/kpet ekyú.

³⁶ Órúmá mú ba/mû ba-kan n byiryíng ámbyi o/mû o-kúng ng balyíta bujam ké nkéré ámu.