Ézódos 15 - Bokyi Bible

Okwan mú Músis o/kwán

¹ Ne Músis ne banet ḿbé Ézerel kâng ba-kwán okwan mún ba-kye Óburúkpâbí ba/fu, me n/chi n-kwán okwan n-kye Óburúkpâbí, ké nǎ, oo/kpógê kiǐtí-dyikpóge. Oo/yip bubyî-orá ne banet ḿbé mbe ba-yú u kámbú o-twóp ké kafâ-baya.

² Óburúkpâbí o-chi i okân-onet-onyii ejí. Nyǐ nké oo/nyii mě. Nyǐ o-chi i Osówo ejí, ne n/chi n-kye ǎ akpee. O-chi i Osówo mú bonchí ejí, ne n/chi n-kwán kyi-kim ne eringe nyí nyǐ mu kiǐtí.

³ Óburúkpâbí o-kán n byití. Dyizîn emen dyi-bángê e Óburúkpâbí.

⁴ O/yip basúja ḿbé Éjip ne bamútu ebe ḿbé bubyî-orá budatut o-twóp ké kafâ-baya. Banet-ashí-basúja ḿbé badakán byití ba-shwôm ké Éjip ba/jé ké baya ḿbé Rêt.

⁵ Kiǐríbíríbí-baya kyi/cít kámbé, ba-shû ba-jâ kyísí wǎ buká.

⁶ Busa ḿbú bubwô-etyebéng eyên, ǎ Óburúkpâbí, mbu bu-chi i bushî. Mbu bu-sé ng banet-bushwôn eyên rugirugi.

⁷ Wo a-yip ng busa ḿbú otu odakpógê banet a-kpógê banet-bushwôn eyên. Busa-dyityém eyên mbu bu-mang ng wǎ okwâ, bu-shí i kámbé wǎ biǐbyâa.

⁸ Wo a/tuu bufú ké baya ne kace ba-bwom dyibwôm. Ka-bûu ka-bwom kyíbóng wǎ ekpe-kyise, kyikit-kace ńkyí kyi/ríbî kyi-shwôm kyi-jwóm.

⁹ Onet-bushwôn eten o-raa o/fu, n-rim m ne mbé ké kyikû, n-kám kámbé. N/chi n-kyii esang ebe, n-koo ńkyí mu n-ryuu ng. N/chi n-zú kashwám ejí n-koo kángkáng byěm ḿbyí mbe ne mbyí.

¹⁰ Nké wo a/shû kiǐnjáng kabónge, ǎ Óburúkpâbí, banet ḿbé Éjip ba-jâ ké kace. Ba/ríbî ba-jâ ké kyibî-kace wǎ kiǐré.

¹¹ Óburúkpâbí, Osówo o*fí mú mu wǎ wo*. Onet o*fí mú mu kanong wǎ wo*. Onet o*fí mú odachi akat ne biǐtí-byěm wǎ ḿbyí eyên*.

¹² Wo a/nabe bubwô-etyebéng eyên esí e-kúng banet-bushwôn eten e-myii.

¹³ Wo a/tî ocím eyên mú a/ryí a-sí banet ḿbé aa/nyii kámbé. Aa/kúng busa eyên a-bám kámbé ba-ribi ké esí-ociring eyên.

¹⁴ Eshê ee/jwo, ne e-kú e-tím m banê ké bushî. Bushî boo/róng banet ḿbé Fyilíta.

¹⁵ Banet-ashí ḿbé Édom ba-kú ba-shî ng. Biǐtí-banet ḿbyí Mówep byi-kú byi-tím m banê. Busa boo/man banet ḿbé Kínan.

¹⁶ Bushî boo/róng kámbé ké byiko. Mbe ba-ri ng busa eyên, ǎ Óburúkpâbí, ne bushî boo/róng kámbé ba*fí to ba-nyît ng ńkyí badachi* tete banet eyên ba-cen ba-shwôm kámbé, banet ḿbé wo a/fîm kámbé ké búsóng.

¹⁷ Wo amu a-bâ ne mbé a-ba-tî kámbé ké kaku eyên, ké kyikit ńkyí wo, ǎ Óburúkpâbí, aa/cá a/fu, kyikyú oshê eyên, kiǐtí-kyise-kyifen echi ńkyí wo oyén aa/bi.

¹⁸ Wo, ǎ Óburúkpâbí, nké a/chi a-kyú Otu mú o/chi o-waa ne banyá.

Okwan mú Myíryam o/kwán

¹⁹ Banet ḿbé Ézerel ba/nyáng baya ké esí nyí jwómjwóm. Nké ké nkéré mú bamútu ḿbé Éjip, ḿbé bubyî-orá budatut ne bubyî-orá ebe ne banet ḿbé mbe ba-tut ng kámbé ba/nung ké baya, Óburúkpâbí o/bwa ne kace esim ka-cít kámbé.

²⁰ Myíryam mú wǎn-boné-Éron mú onyinyi, mú o/mû mkpábé mú odasét byiraa-Osówo o/kúng byícícágé emen ne kángkáng banyinyi ba-dim ne nyǐ ké kyikû, ba-kim m byícícágé ba-ne ng ane.

²¹ Myíryam o/kwán kámbé okwan o/fu, kwán n̂ okwan ba-kye Óburúkpâbí, ké nǎ, oo/kpógê kiǐtí-kyikpóge. Oo/yip bubyî-orá ne banet ḿbé mbe ba-yú u kámbú o-twóp ké baya.

Omu mú mu o-ruu ng

²² Ne Músis o-dim ké baya ḿbé Rêt, o-tông banet ḿbé Ézerel kiǐfáng ba-ribi ké kyikim-dyikán ńkyí Shû. Ba/cen ké kyikim-dyikán ándyi ké ací achât, ba*da/ri omu*.

²³ Ne ba-ba-ribi ké kyikit ńkyí badakó Mára, nké omu mú o/mû ké kyikit ánkyi o/mû o-jang ng eruu mú o*fí o-nwa ng ejwáp*. Nkyí nké ba/mû ba-kó ng kyikit ánkyi Mára.

²⁴ Banet ḿbé Ézerel ba-kûshwôn ne Músis, ba-bí ǎ ba/fu, be byi-jwáp ng ebóng.

²⁵ Músis o/fé nshwam o-tii o-kó Óburúkpâbí, ne Óburúkpâbí o-tông ǎ kaǎcê-kyichí ńké o/yip o-twóp ké kafâ-kace, ne omu ámu o-firi mú badajwáp. Ké kyikit ánkyi nké Óburúkpâbí o/kye kámbé byije ḿbyí badakûbám byiko ebe, ne ányi to nké o/kan kámbé

²⁶ o/fu, â ben ba/chi ba-chi kángkáng byěm ḿbyí me n/kabe n/fu, mbyi kanong, ba-tî to byije ejí, mm*ba/chi n-kye běn busông nang bubónge* ḿbú n/kye banet ḿbé Éjip*. Me n-chi i Óburúkpâbí mú mu o-chi i byirwóm enen byi-man.

²⁷ Ne ba-dim ányi ba-ribi ké Élim, ké kyikit ńkyí kyi/mû ne ajwáng diǐkpú ne afee ne bajam-bayêp bachât esim diǐkpú. Ányi nké ba/bi oshê ebe.