Ézódos 14 - Bokyi Bible

Banet ḿbé Ézerel ba/nyáng Baya ḿbé Rêt

¹ Ne Óburúkpâbí o-sét Músis kâng o/fu,

² sét banet ḿbé Ézerel ba-bwa esim ba-da-bi oshê ebe fáráng ne Pyihahyírot, ké otyém ne otyém mú Myígidol ne baya ḿbé Rêt, fáráng ne Bâl-Zéfon.

³ Otu mú Éjip o/chi o-kabe o/fu, banet ḿbé Ézerel mbe ba-zóp ng ba-câ ké dyikán, ne kyikim-dyikán kii/ku kámbé bukwóp.

⁴ Ne n/chi n-chi ǎ o-shwane ké dyishí o-bâ ne ben ké kyikû, ne dyikpóge ńdyí n/chi m-kpógê otu ámu ne basúja emen dyi/chi dyi-kye mě ofê. Ne banet ḿbé Éjip ba/chi ba-nyît ba/fu, me n-chi i Óburúkpâbí. Banet ḿbé Ézerel ba/chi wǎ eringe nyí ba/sét kámbé.

⁵ Ké nkéré mú ba/sét otu mú Éjip ba/fu, banet ḿbé Ézerel baa/chêe, otu ámu ne banet-ashí-oshê emen ba/yángê atyém ebe ba-raa ba/fu, ebóng kyi/chi ne be byi-chi něen. Bii/mîng banet ḿbé Ézerel ba-chêe, ba*fí to básóng eten*.

⁶ Otu mú Éjip o-kpá byiko ne bamútu-byití ne basúja emen.

⁷ O-dim ne kángkáng bamútu emen ḿbé bubyî-orá budatut, cibicibi ne égot-bamútu echât ḿbé badajang enwa, ḿbé ba/mû ké abwô nyí banet-ashí-basúja emen.

⁸ Óburúkpâbí o/chi otu ámu o-shwane ké dyishí, ne o-dim ne banet ḿbé Ézerel ké kyikû, ḿbé ba/dim [ba-jêe ng] ba-câ.

⁹ Basúja ḿbé Éjip ne kángkáng bubyî-orá ne bamútu ḿbé bubyî-orá budatut ne banet ḿbé mbe ké mbú ba/dim ne banet ḿbé Ézerel ké kyikû, ba-da-kâm kámbé ké kyikit ńkyí ba/rí ké bukô-baya ḿbé Rêt, fáráng ne Pyihahyírot ne Bâl-Zéfon.

¹⁰ Ké nkéré mú banet ḿbé Ézerel ba/ri ké otu mú Éjip ne basúja emen mbe ba-bâ bunwa ne mbé, bushî bu/róng kámbé, ba-tii ba-kó Óburúkpâbí ba/fu, ochwáp kámbé.

¹¹ Ba-raa ne Músis ba/fu, akun a/mû a*fí ké Éjip*? Wo a/bê ne be a/fu, byiba-kpú nyín ké kyikim-dyikán? Kûri ńkyí a/chi bě, ńkyí a/fîm bě byi-byí ké Éjip.

¹² Be byi/mû byi*da ǒ esét ne byi-dim byi/fu, ńkyín kyi/chi kyi-chi*? Byi/sét ǒ byi/fu, mîng bě byi-waa básóng ḿbé banet ḿbé Éjip. Kyi-nwa ng ńkyí byidakyú básóng ké Éjip, kyi-shwôm ńkyí byidakpú nyín ké kyikim-dyikán.

¹³ Músis o-faa kámbé o/fu, *da n̂g eshî*. Bwom m̂ kíngkíng, ne ba/chi ba-ri ńkyí Óburúkpâbí o/chi o-chi o-nyii běn. Baa*ba/chi ba-chîri banet ḿbé Éjip ámbe*.

¹⁴ Óburúkpâbí o/chi o-nwa bunwa o-kye běn, ne chwǒm kyi*fí ńkyí ben badachi*.

¹⁵ Óburúkpâbí o-sét Músis o/fu, ebóng amu a-tii ng a/fu, nchwáp ǒ. Sét banet ḿbé Ézerel ba-dim ba-ca kashú.

¹⁶ Yip ochí eyên kyíbóng a-bwom ne mǔ ké bukô-baya. Kace ka/chi ka-kyii, ne banet ḿbé Ézerel ba/chi ba-man ecen ké éshíshě ba-nyáng baya.

¹⁷ N/chi n-chi banet ḿbé Éjip ba-shwane dyishí ńdyí dyi/chi dyi-chi kámbé ba-ca ne mbé ké kyikû, ne n/chi n-koo ofê ké dyikpóge ńdyí n/chi m-kpógê otu mú Éjip ne basúja emen ne bamútu emen ne banet ḿbé mbe ba-tut ng kámbé.

¹⁸ Ké nkéré mú mm/kpógê kámbé, banet ḿbé Éjip ba/chi ba-nyît ba/fu, me n-chi i Óburúkpâbí.

¹⁹ Orím mú onong mú Osówo, mú o/mû ké kashú-basúja ḿbé Ézerel o-dim o-ba-ryí esim. Ófíbí ámu to o-dim o-ba-bwom

²⁰ ké otyém ne otyém mú banet ḿbé Éjip ne ḿbé Ézerel. [Ófíbí ámu o/twóp banet ḿbé Éjip kyifip, o-kye banet ḿbé Ézerel kiinwángé,] ne ké bubwô ámbu, basúja ḿbé Éjip ne ḿbé Ézerel ba*da/man efárâng barî ké buchú ámbu bumúmú*.

²¹ Músis o-bwom ké bukô-baya o-yip ochí emen kyíbóng o-tông ké baya, ne Óburúkpâbí o-yip bufú ḿbú buryên ḿbú bu/fím ké kyicê ńkyí esû edabyí o-kyii baya ámbe. Bufú ámbu bu/tugi buchú bumúmú tete bu-chi baya ba-núng. Baya ba/kyii byicê byifee,

²² ne banet ḿbé Ézerel ba-nung ké kyikit-baya ńkyí kii/núng, omu o-bwom kámbé byicê byimúmú wǎ ekpe-kyise.

²³ Banet ḿbé Éjip ba-rim ne mbé ké kyikû, ba-da-nung to ké baya ne kángkáng bubyî-orá ebe ne bamútu ebe ne basúja ebe.

²⁴ Ne dyicófóróng dyi-kûcé, Óburúkpâbí o/bwom ké ófíbí ne bumang-okwâ o-tún basúja ḿbé Éjip o-fé kámbé ké bushî.

²⁵ O/chi bandam-bamútu ebe ba-kpâng, ba*fí to ba-man n ebírî ochéé óchee*. Banet ḿbé Éjip ba-raa ba/fu, Óburúkpâbí o-kú o-nwa ng ne be o-kye banet ḿbé Ézerel. Bâ n̂g byi-dim nyín.

²⁶ Óburúkpâbí o-raa ne Músis o/fu, yip ochí eyên kyíbóng a-tông ké baya ne kace ka/chi ka-bwa esim ka-cít kángkáng banet ḿbé Éjip ne bamútu ebe.

²⁷ Ne Músis o-yip bubwô emen kyíbóng o-tông ké baya, ne ńdyí dyicófóróng dyi/cé, kace ka/bwa esim ka-sú wǎ eringe nyí ka/mû. Banet ḿbé Éjip ba-kan ba/fu, mbé ba-wá ng ba-byí, nké Óburúkpâbí o/kúng kámbé o-twóp ké kafâ-baya.

²⁸ Kace ka/bwa esim ka-cít bamútu ne kángkáng basúja ḿbé ba/mû ba/rim ne banet ḿbé Ézerel ké kyikû ba-ríbî ké baya. Nang onet obónge o*da/fem*.

²⁹ Nké banet ḿbé Ézerel ba/cen ké éshíshě ba-nyáng baya, omu o-bwom kámbé byicê byimúmú wǎ ekpe-kyise.

³⁰ Ké dyicí ándyi, Óburúkpâbí o/nyii banet ḿbé Ézerel ké abwô nyí banet ḿbé Éjip, ne banet ḿbé Ézerel ba/ri kámbé ké baa/kpú ké bukô-baya.

³¹ Ké nkéré mú banet ḿbé Ézerel ba/ri kiǐtí-busa ńkyí Óburúkpâbí o/yip ne o-kpógê banet ḿbé Éjip, ba-kpet ǎ eshî, ba-fé dyityém ne nyǐ ne Músis mú ḿgbán emen.