Ézódos 13 - Bokyi Bible

Bákpá-Bwǎn-Banyinchéng ekúng ba-kye Óburúkpâbí

¹ Óburúkpâbí o/sét Músis o/fu,

² kúng n̂g kángkáng bákpá-bwǎn-banyinchéng ba-kye mě, ké nǎ, ókpá-wǎn-onyinchéng mú Ézerel nang orá ne wǎn-kashú-kyitú mú otyép nang orá byi/já mě.

Dyijî-Kyifen ńkyí Berêt

³ Músis o/sét banet ḿbé Ézerel o/fu, zîim m̂ dyicí ńdyín, dyicí ńdyí ben ba/dim ké Éjip, ké kyikit ńkyí ben ba/mû básóng. Dyicí ńdyín nké Óburúkpâbí o/yip kiǐtí-busa emen o-fîm běn ba-byí. Baa*man ba-ryí berêt mú ba/fé bukye ké mǔ o-mut*.

⁴ Ben ba-kú ba-dim m ké Éjip, ké dyicí ńdyín, ké mbwôp kashú-dyicí-otukáku mú Ábip.

⁵ Óburúkpâbí o/ryí banchí enen ḿbé kpákpá ocím mú o/sem byiko emen o/fu, nyǐ o-kyâ běn esí nyí banet ḿbé Kínan ne ḿbé Hyítat ne ḿbé Ámórit ne ḿbé Hyíbit ne ḿbé Jébus. Ké nkéré mú oo/yip běn o-ca ne ben ké esí ányi nyí edajang enwa byiryíng, ben ba-man ba-kûchi dyijî ńdyín, ké mbwôp kashú-otukáku mú kángkáng dyije.

⁶ Ké ací káchâtkányi, ba-man ba-ryí berêt mú ba*da/fé bukye o-mut* ne ké nkuli kyikû-dyicí ándyi, ba-man ba-chi dyijî-kyifen ké ofê mú Óburúkpâbí.

⁷ Ké ací káchâtkányi, baa*man ba-ryí berêt nang orá mú ba/fé bukye ḿbú budachi kámú o-mut*. Berêt mú ba/fé bukye o-mut ne bukye ámbu bii*man byi-kyú ké esí enen*.

⁸ Ké nkéré baa/kpet dyijî-kyifen ánkyi echi, sét n̂g bwǎn enen ba/fu, ben bamu ba-chi i dyijî ńdyín ké bubwô-byěm ḿbyí Óburúkpâbí o/chi ké bubwô enen, ké nkéré mú ben ba/mîng Éjip.

⁹ Dyijî ńdyí bamu ba-chi i něen dyi/chi dyi-bwom wǎ chwǒm-dyizíím, wǎ chwǒm ńkyí onet odabwá ké bubwô nang ké dyishí. Dyi/chi dyi-zîim běn ba-kûnyît ba-kwâa ng Byije ḿbyí Óburúkpâbí ba-câ kashú, ké nǎ, Óburúkpâbí o/kúng kiǐtí-busa emen ne o-fîm běn ba-byí ké Éjip.

¹⁰ Tî n̂g ací ńnyín ké ochíchí-nkéré mú ba/tî kányí kángkáng dyije.

Bákpá-Bwǎn-Banyinchéng

¹¹ Óburúkpâbí o/chi o-kúng běn o-bâ ne ben ké esí nyí banet ḿbé Kínan, nyí o/ryí běn ne banchí enen ḿbé kpákpá ocím o-sem byiko emen. Ké nkéré mú oo/kye běn kányí,

¹² ba-man ba-kúng ókpá-wǎn-onyinchéng enen nang orá ba-kye Óburúkpâbí. Kángkáng bambwôp kashú-batyép-bwǎn-byitú enen ba/já Óburúkpâbí,

¹³ nké ben ba-man ba-ré dyifwá ńdyí mbwôp kashú-wǎn-otyép-kaanyam-atû o-firi mú enen â ba/kúng wǎn-etám-ebû ba-chi kyifen ké dyishí emen. Â ba/fu, baa*ré dyifwá-kaanyam-atû ánke* bún n̂ kánké kyitông. Ben ba-man ba-ré kángkáng bákpá-bwǎn-banyinchéng enen, ba-firi ḿbé enen.

¹⁴ Ké nkéré mú mu o-bâ ké kashú, â bwǎn enen ba/bí běn ba/fu, ńkyí bamu ba-chi i něen kyi/byí nǎ, sét n̂g kámbé ba/fu, Óburúkpâbí o/yip kiǐtí-busa emen o-fîm bě byi-byí ké Éjip, ké kyikit ńkyí byi/mû básóng.

¹⁵ Ké nkéré mú otu mú Éjip o/mû o/shwane ké dyishí o-né o/fu, be byi*dadim* Óburúkpâbí o/ju kángkáng bambwôp kashú-bwǎn-banyinchéng ḿbé banet ne byitú ké Éjip. Nkyí nké byimu byi-kúng ng mbwôp kashú-otyép-kyitú nang orá byi-chi kyifen byi-kye Óburúkpâbí, nké byimu byi-ré ng bákpá-bwǎn-banyinchéng ba-firi ḿbé eten.

¹⁶ Chwǒm ńkyí byimu byi-chi i něen kyi-tî ng bě dyizíím, wǎ chwǒm ńkyí onet odabwá ké bubwô nang ké dyishí. Kyi/chi kyi-zîim bě kyi/fu, Óburúkpâbí o/kúng kiǐtí-busa emen o-fîm bě byi-byí ké Éjip.

Ófíbí ne Okwâ

¹⁷ Ké nkéré mú otu mú Éjip o/mîng banet ḿbé Ézerel ba-dim, Osówo o*da/cen ne mbé ké kiǐfáng ńkyí nkyi kyi-jâ ké esí nyí banet-Fyilíta* nang ké kyi/mû jwángjwáng kyi-shwôm*. Osówo o/kabe o/fu, nyǐ o*fí o-ryuu ng o/fu, banet ḿbé Ézerel bayángê atyém ebe ba-bwa esim Éjip* â ba/nyît ba/fu, mbé ba/chi ba-nwa bunwa*.

¹⁸ Nké o/cen ne mbé ké bukwóp ḿbú kerékeré ba-nyáng kyikim-dyikán, ké kiǐfáng ńkyí nkyi kyi-jâ baya ḿbé Rêt. Banet ḿbé Ézerel ba/mû ba/kám byěm ḿbyí badanwa byití.

¹⁹ Músis o/kúng kyikwóm-enyam-byiko ńkyí Josêf o-dim ne nkyí, wǎ eringe nyí josêf o/mû o/chi banet ḿbé Ézerel ba-ryí ǎ ocím ba/fu, mbé ba-kúng ng kánkyí. Josêf o/mû o/sét kámbé o/fu, ké nkéré mú Osówo oo/nyii běn, kúng n̂g kyikwóm-enyam-byiko ejí ké oshê mún ba-dim ne nkyí.

²⁰ Banet ḿbé Ézerel ba/dim ké Súkot ba-da-rí ké Étam, ké bukô-kyikim-dyikán.

²¹ Ne esû, Óburúkpâbí mu o-câ kámbé kashú ké ófíbí o-tông ng kámbé kiǐfáng. Ne buchú, mu o-câ kámbé kashú ké bumang-okwâ, o-kyâ kámbé kiinwángé eringe nyí badaman ecen buchú ne esû.

²² Ófíbí o/mû o-câ kámbé kashú kángkáng nkéré ne esû, okwâ o-câ kámbé kashú ne buchú.