Ézódos 11 - Bokyi Bible

Músis o/sét kyi-kim ne Bukyû ḿbú Bákpá-Bwǎn-Banyinchéng ḿbé Éjip

¹ Ne Óburúkpâbí o-raa ne Músis o/fu, n-chî ng etwóm busông bubónge n-kye otu mú Éjip ne banet emen. Â n/kye kámbé busông ámbu, otu o/chi o-mîng běn ba-dim. Ké ntûntû, o-rôo ng běn ashí kángkáng ba-dim nyín.

² Sét kángkáng banet ḿbé Ézerel ba-da-bí barî-banet ebe ḿbé Éjip ba-kye kámbé byibwáng ḿbyí ba/chi ké gûl ne syílyíba.

³ Óburúkpâbí o/chi banet ḿbé Éjip ba-kye banet ḿbé Ézerel ofê. Ké ntûntû, banet-ashí-oshê ne kángkáng banet ḿbé Éjip ba/mû ba-kúng ng Músis wǎ kiǐtí-onet.

⁴ Ne Músis o-sét kâng otu o/fu, Óburúkpâbí o/fu, ké otyém-buchú, nyǐ o/chi o-cen ké Éjip emúmú,

⁵ ne kángkáng bákpá-bwǎn-banyinchéng ḿbé Éjip ba/chi ba-kpú, kyi-fím ké wǎn mú eyên mú o/mû o/chi o-ryí butu â a/kpú tete kyi-ribi ké wǎn mú ósóng-onyinyi mú mu o-kwa ng esang-byichí. Bambwôp kashú-bwǎn ḿbé kángkáng byitú byi/fwon ba/chi ba-kpú to.

⁶ Ba/chi ba-tii bukyû ḿbú kakânkakân ké Éjip emúmú, ḿbú banet ba/mû ba*da/tii ne* ne baa*ba/chi ba-chîtii dyizong-bukyû ándyi*.

⁷ Nké nang kaǎchwóm kaa*ba/chi ka-chi banet ḿbé Ézerel* nang byitú ebe*. Ányi nké a/chi a-nyît a/fu, nyǐ Óburúkpâbí o/tî banet ḿbé Éjip cát ne banet ḿbé Ézerel.

⁸ Músis o/kúlî bǎmpém emen o/fu, kángkáng banet-ashí-oshê eyên ba/chi ba-bâ ba-kâm mě ba-ba-tíngê kyísí ké bushú ejí, ba-tîm mě arông ba/fu, me nkúng kángkáng banet ejí n-dim ne mbé. Ne n/chi n-kúng kámbé n-dim ne mbé. Ne Músis o-dim o-mîng otu ké kiǐtí-busa-dyityém.

⁹ Óburúkpâbí o/mû oo/sét Músis o/fu, otu mú Éjip oo*mîng ené ńkyí wo amu a-sét ng ǎ* eringe nyí me n/chi n-chi byěm-akat ejí n-ca kashú.

¹⁰ Músis ne Éron ba/chi kángkáng akat ńnyín ké bushú ḿbú otu, nké Óburúkpâbí o/chi otu ámu o-shwane ké dyishí ne o*da/bángê o/fu, banet ḿbé Ézerel badim ba-mîng oshê emen*.