Ézódos 10 - Bokyi Bible

¹ Ne Óburúkpâbí o-raa kâng ne Músis o/fu, ca a-da-ri otu. Nn/chi ǎ ne banet-ashí-oshê emen ba-kûshwane ké dyishí eringe nyí n/chi n-chi akat ányi n-tông kámbé

² ne eringe nyí wo adaman esét bwǎn eyên ne bwǎn ḿbé bwǎn eyên eringe nyí n/chi banet ḿbé Éjip ba-róng enyam ké nkéré mú n/chi akat ányi. Ben ashí kángkáng ba/chi ba-nyît ba/fu, me n-chi i Óburúkpâbí.

³ Ne Músis ne Éron ba-dim kâng kyikit-otu ba-da-sét ǎ ba/fu, Osówo Óburúkpâbí mú banet ḿbé Hyíburus mu o-bí ng ǒ o/fu, ka-rí i nǎ ne wo a-chi ńkyí nyǐ mu o-sét ng ǒ. Mîng banet emen ba-ca ba-da-kye ǎ ofê.

⁴ Â amu a-né ng a-câ kashú, n/chi m-bâ ne agurubí ké oshê eyên nencí.

⁵ A/chi a-jê kanong kanong nyí a/chi a-cít esí emúmú. A/chi a-ryí kángkáng byěm ḿbyí abíp a*da/bên* cibicibi ne byichí ḿbyí byi/waa.

⁶ A/chi a-sú ké kyibám-butu eyên ne ké byise ḿbyí banet-ashí-oshê eyên ne ké byise ḿbyí kángkáng banet eyên. A/chi a-bên a-shwôm kángkáng agurubí nyí banchí enen ḿbé kpákpá baa/ri. Otu ámu o-dim o-mîng kámbé.

⁷ Banet-ashí-oshê ba-bí otu ba/fu, ka-rí i nǎ ne onyinchéng mún o-mîng bě afaníkong ekye. Mîng banet ḿbé Ézerel ba-dim ba-da-kye Osówo Óburúkpâbí ebe ofê. Wo a*fí a-nyît ng a/fu, Éjip ee/bên*.

⁸ Ne ba-da-kó Músis ne Éron ba-bwa esim kyikit-otu, ne otu o-sét kámbé o/fu, ba-man n ece ba-da-kye Osówo Óburúkpâbí enen ofê. Nké be yeě chíchí mbe ba-wâa ng.

⁹ Músis o-faa ǎ o/fu, be byimu byi-wâa ng ashí amúmú, cibicibi ne bwǎn eten ne bakâa-banet eten. Byi-yip ng bwǎn eten ne byitú eten, ké nǎ, byi-man byi-chi dyijî-kyifen ké ofê mú Óburúkpâbí.

¹⁰ Otu o-raa o/fu, me n/sem ké dyizîn ńdyí Óburúkpâbí n/fu, mm*ba/chi m-bángê běn ba-kúng banyi enen ne bwǎn enen*. Kii/tông wááng kyi/fu, ben bamu ba-kpá ng byiko ḿbyí badabírî bunwa ne be.

¹¹ Aa*wááng* banyinchéng nké nke ba-man n ece ba-da-kye Óburúkpâbí ofê, â ńkyí nkyí nké bamu ba-ryuu ng. Ńdyí o/raa ńkyín, ba/ró Músis ne Éron ba-dim ké bushú-otu.

¹² Ne Óburúkpâbí o-raa kâng ne Músis o/fu, yip bubwô eyên kyíbóng ké esí nyí Éjip a-bâ ne agurubí. A/chi a-bâ a-ba-ryí kángkáng byichí ne byíkwôn, kángkáng byěm ḿbyí abíp a*da/bên*.

¹³ Ne Músis kâng o-yip ochí emen kyíbóng, ne Óburúkpâbí o-chi bufú ḿbú bu/fím ké kyicê ńkyí esû edabyí bu-tugi ké esí nyí Éjip ké dyicí ándyi tata dyi-cé. Ne dyicófóróng dyi-cé, boo/bê ne agurubí.

¹⁴ A/bê ké abóng ké abóng a-ba-cít oshê omúmú. Dyibóng-agurubí ándyi dyi/mû dyi/jang ejê dyi-shwôm ńdyí banet ba/mû ba*da/ri ne* ne dyizong ándyi to baa*ri to*.

¹⁵ A/cít esí e-firi agurubí nyǐ nyi. A/ryí kángkáng byěm ḿbyí abíp a/mîng, cibicibi ne kángkáng byirim-byichí. Nang kaǎsháán ne kiintaa-kyichí kyibónge kyi*da/waa ké kángkáng esí nyí Éjip*.

¹⁶ Ne otu o-kó Músis ne Éron ochéé óchee o-sét kámbé o/fu, me nn/chi kyibî ké bushú enen ne ḿbú Osówo Óburúkpâbí enen.

¹⁷ Pwoo n̂g mě kyibî ejí ńkyín mpéne mún, ba-fé nshwam ba-kye Osówo Óburúkpâbí enen o-fîm mě kyibî-busông ńkyín ké byiko.

¹⁸ Músis o-dim o-mîng otu o-da-fé nshwam o-kye Óburúkpâbí.

¹⁹ Ne Óburúkpâbí o-chi bufú bukíri ḿbú bu/fím kyicê ńkyí esû edaríbî bu-tugi kanong kanong bu-chîtugi bu-wuri agurubí ányi bu-da-pwó ké dyiga-baya ńdyí Suwêz. Nang dyigurubí dyibónge dyi*da/waa ké Éjip*.

²⁰ Nké Óburúkpâbí o/chi otu ámu o-shwane ké dyishí ne o*da/bángê banet ḿbé Ézerel ba-dim*.

²¹ Ne Óburúkpâbí o-raa kâng ne Músis o/fu, yip bubwô eyên kyíbóng, ne kiǐkpîn-kyifip kyi/chi kyi-cít esí nyí Éjip.

²² Músis o-yip bubwô emen kyíbóng, ne kyifip kyi-róng ké Éjip emúmú ké ací achât.

²³ Banet ḿbé Éjip ba*da/chîman eri barî* ne onet nang obónge ebyí kyíjí ké nkéré ámu*. Nké kyifip kyi/mû kyi*fí ké kyikit ńkyí banet ḿbé Ézerel ba/mû ba-kyú u*.

²⁴ Otu o-kó Músis o-sét ǎ o/fu, ba-man n ece ba-da-fé Óburúkpâbí enen. Ba-man n ekpî banyi enen ne bwǎn enen, nké byitú enen byi-man byi-waa nyín.

²⁵ Músis o-faa ǎ o/fu, â nkyi éné, wo a/chi a-kye bě byitú ḿbyí byidaju ne ḿbyí byidashí byirim byimúmú byi-chi kyifen byi-kye Osówo Óburúkpâbí eten.

²⁶ Aa*wááng* byi-kúng ng byitú eten byi-dim ne mbyí. Bii*mîng nang kyibónge ké esim*. Be bayén nké byidacá byitú ḿbyí byidayip byi-chi kyifen byi-kye Osówo Óburúkpâbí eten, ne tete byi-ribi áku, bii*ba/chi byi-nyît dyizong-enyam ńdyí byidakúng byi-chi kyifen byi-kye ǎ*.

²⁷ Óburúkpâbí o/chi otu ámu o-shwane ké dyishí ne o*da/bángê kámbé ba-dim*.

²⁸ O-nyán Músis o/fu, dim mě ké bushú. *Dachi a-mîng mě n-chîkúng achi ejí n-ri ǒ*. Â n-chî ǒ eri, n-ju ng ǒ.

²⁹ Músis o-faa ǎ o/fu, wo a/sét ntûntû, aa*ri mě to*.