Ézódos 1 - Bokyi Bible

Banet ḿbé Ézerel ba/bírî Básóng ké Éjip

¹ Bwǎn ḿbé Jekôp ne byikû-banet ebe ḿbé ba/dim ne Jekôp ké kyikû ba-jâ Éjip ba/mû

² Rúben ne Syímyon ne Lyíva ne Júda

³ ne Ézaka ne Zébélon ne Běnjámin

⁴ ne Dǎn ne Nafatályi ne Gât ne Ásha.

⁵ Kángkáng banet ḿbé ba/fím ké kyikû ńkyí Jekôp oyén ba/mû bajam bachât esim diǐkpú. Josêf mú wǎn emen o/mû oo/bwóp kpáá kashú o-jâ Éjip.

⁶ Ké nkéré mú kaa/rí, Josêf ne bwǎn-bané emen ne kángkáng kyikim-banet ebe ánkyi ba/kpú.

⁷ Nké bwǎn ebe ḿbé kyikû-banet ńkyí Ézerel ba/mû ne bwǎn chwóó ḿbé ba/mû ba/firi ne busa ḿbú baa/sú Éjip emúmú.

⁸ Ńdyí ka/chîrí, onet okíri kâng mú o/mû o*da/nyît kyi-kim ne Josêf* o-firi otu mú Éjip.

⁹ Otu ámu o-raa ne banet emen o/fu, banet ḿbén ḿbé Ézerel baa/jang ejê ne ba/firi ne busa ḿbú bu/firi bě ne bushî.

¹⁰ Â byití byi/róng, ba-man n ecibi ne banet-bushwôn eten ba-nwa ne be, ne ba-man n [echêe ba-mîng] oshê eten. Byi-man byi-kyé bukwóp ḿbú byidachi kámbé baa*jê to ba-ca kashú*.

¹¹ Ne banet ḿbé Éjip ba-tî banet ḿbé badakyú wǎ banet-ashí-básóng ba/fu, bakûkye banet ḿbé Ézerel bǎmkpóngé ḿbé badashwôm kámbé busa, eringe nyí baa*kyú to ne busa*. Banet ḿbé Ézerel ba/bi eshê nyí Pyítom ne Rámesis, nyí badatî byěm ḿbyí otu.

¹² Nké â ba/kye okyěng kámbé busông chwóó, ányi nké banet ḿbé Ézerel badajê ejěng ba-shwôm, ba-káng ng ba-câ oshê omúmú. Banet ḿbé Éjip ba-kpet eshî banet ḿbé Ézerel

^13-14 ne ba-chi akpen nyí banet ḿbé Ézerel a-firi bafip báfip ké bǎmkpóngé-búsóng ḿbé mbe ba-tírîng ng kámbé ba-chi i. Ba/chi kámbé ba-chi bǎmkpóngé ké byise ebe ḿbyí mbe ba-bi ng ne ké byifát ebe, ne ba*da/ri kámbé bafip*.

¹⁵ Ne otu mú Éjip o-raa ne Shífara ne Pwâ ḿbé banyinyi ashí afee, ḿbé ba/mû ba-kám m banyinyi ḿbé banet-Hyíburus bufwon o/fu,

¹⁶ â ba/kám onyinyi-Hyíburus bufwon nké o/fwon wǎn-onyinchéng, ju n̂g wǎn ámu, nké â wǎn-onyinyi, mîng n̂g ǎ.

¹⁷ Nké ḿbé banyinyi ámbe ba/mû ba-shî ng Osówo, ba*da/chi ńkyí otu o/sét kámbé* ne ba*da/ju bwǎn-banyinchéng ámbe*.

¹⁸ Ne otu ámu o-twóm ḿbé banyinyi ámbe ba-bâ, o-bí kámbé o/fu, ebóng bamu ba-chi i dyizong-chwǒm ńdyín. Ebóng bamu ba-mîng ng bwǎn-banyinchéng ebe ba-kpen n.

¹⁹ Mbé ba-faa ǎ ba/fu, banyinyi ḿbé Hyíburus ba*fí wǎ ḿbé Éjip*. Bufwon boo*zût kámbé efwon* ne ba-bwóp ng kpá kashú ba-fwon ne be byi-ribi áku.

^20-21 Ké nǎ, ḿbé bankâm bufwon ámbe ba/mû ba-shî ng Osówo, Osówo o/mû o/cángê dyityém ne mbé ne o/kye kámbé bwǎn ḿbé ebe. Ne banet ḿbé Ézerel ba-waa ba-jê ng ba-câ kashú ne busa.

²² Ké nkuli kyikû, otu ámu o-kye kángkáng banet emen busa o/fu, wǎn-onyinchéng-Hyíburus nang orá nké ba/fwon, kúng n̂g ǎ ba-twóp ké kace ńké Nâl. Mîng n̂g ḿbé bwǎn-banyinyi.