Biblia Todo Logo
Bìoball air-loidhne

- Sanasan -

Ezékyel 9 - Bokyi Bible


Osówo o/kye Jerúsélem Busông

1 N-jwo kâng Osówo o-nyán o/fu, ben banet ḿbé ba/chi ba-kye oshê busông, bâ n̂g nyín. Bâ n̂g ne byiyám enen.

2 Ké abe ányi, banyinchéng ashí nyâchât ba-fím kyicê ńkyí dyifyi ńdyí kyíjí, ńdyí bushûyû ne byiyám ké abwô. Onyinchéng obónge o/mû ké burwám ebe mú o/mû o/fé byídí-okpówo ké byiko, ne o/mû o/níbî chwǒm ńkyí badakúng ba-sáng byěm. Mbé kángkáng ba/bê ba-ba-bwom ké kyikit-kyifen-Osówo echi, ńkyí ba/chi ké biǐré ḿbyí badakó borôn.

3 Ne busan ḿbú ragerage kâng ḿbú mbu bu-fím m ké bushú ḿbú Osówo mú Ézerel bu-byí ké biǐnyám ḿbyí mbyi ne abyibabang, ké kyikit ńkyí busan ḿbú ragerage ámbu bu/mû, ne boo/byí bu-ribi ké dyifyi-kiǐtí-kyise-kyifen-Osówo echi. Óburúkpâbí o-kó onyinchéng mú o/fé byídí-okpówo ké byiko, o-sét ǎ o/fu,

4 ca ké oshê-Jerúsélem omúmú a-fé nang yeě mú mu ké bafip ne ké bukyû etii ekap ké mbwô, ké bubwô-biinunut-byěm ḿbyí mbe ba-chi i ké oshê.

5 Ne n/jwo Osówo o-raa ne ḿbé banyinchéng ḿbé áku o/fu, ca n̂g ne nyǐ ké kyikû ké oshê ba-da-ju banet. *Da n̂g emîng onet nang obónge*. *Da n̂g eri onet nang obónge bafip*.

6 Ju n̂g banyinchéng ḿbé kánkán ne byisat ne ásé ne bané ne bwǎn. Nké *da n̂g eta nang yeě mú mu ne ekap ké mbwô*. Kpet n̂g nyín ké kiǐtí-kyise-kyifen ejí echi. Ne mbé kâng ba-kpet ne banet-ashí ḿbé ba/mû ányi cip ké kiǐtí-kyise-kyifen-Osówo echi.

7 Osówo o-raa ne mbé o/fu, bên n̂ ociring mú kiǐtí-kyise-kyifen ejí echi. Pwó n̂g byikwóm-banet byi-sú ké byibám-kiǐtí-kyise-kyifen ejí echi. [Kpet n̂g bǎmkpóngé. Mbé kâng ba-pet banet eju ké oshê.]

8 Ké nkéré mbe ba-ju ng banet ba-câ, me m/mû ányi kǎnchí. Me n-tíngê bushú kyísí n-wonge n/fu, Óburúkpâbí mú mu Otu Kyítá, kafâ nke ka-sa ng ǒ ka-shwôm ne Jerúsélem ńké amu a-bâ eju nang yeě mú o/waa ké Ézerel dí.

9 Osówo o-faa o/fu, banet-Ézerel ne Júda baa/chi byibî ḿbyí bii*nwa eri*. Mbé baa/ju banet ké esí kángkáng ne baa/chi Jerúsélem o-sú ne baróng. Mbé ba/fu, me Óburúkpâbí nn/dim m-mîng oshê ebe ne n*fí to n-ri ng kámbé*.

10 Nké me mm*ba/chi n-ri kámbé bafip*. Me n-chi i kámbé ńkyí mbé ba/chi banet ḿbé áku.

11 Onyinchéng mú mu ne byídí-okpówo ké byiko kâng o-fyi o-ba-sét Óburúkpâbí o/fu, me nn/chi eringe nyí a/kye busa.

Published by the Bible Society of Nigeria @ 1985

Bible Society of Nigeria
Lean sinn:



Sanasan