Ezékyel 8 - Bokyi Bible

Bakye esháng ké Jerúsélem

¹ Ké ací atánge, ké etukáku nyâchât, ké aje nyâchât, kyi-fím ké nkéré mú ba/kúng bě ba-jâ ne be wǎ básóng, banet-ashí-banet ḿbé ba/kúng kámbé ké Júda ba/mû me ké kyise ejí ne me. Ké abe ányi, busa ḿbú Óburúkpâbí mú mu Otu Kyítá bu/bê bu-kâm mě.

² Me m/bírî achi n-tún kyíbóng n-ri chwǒm-akat éné wǎ kyirim-onet. Kyi-fím ké osín kyi-byí kyísí, enyam-byiko emen e/mû éné wǎ okwâ. Kyi-fím ké osín kyi-byí kyíbóng, nyǐ o/mû o-san n wǎ kiǐré ńkyí badakó borôn, ńkyí baa/shî.

³ Nyǐ o/nabe chwǒm éné wǎ bubwô o-kám mě ké eji. Ké nkéré mu n-ri ng ńkyín, Busun-Osówo bu/yip mě kyíbóng kyíbóng n-dim Jerúsélem. Mbú bu/yip mě n-dim ké dyifyi ńdyí ké kafâ, ńdyí kiǐtí-kyise-kyifen-Osówo echi ńdyí bushûyû, ké kyikit ńkyí orím-bukye mú o/mû o-sa ng Osówo kafâ o/mû.

⁴ Ányi nké n/ri busan ḿbú ragerage ḿbú mbu bu-fím m ké bushú ḿbú Osówo mú Ézerel, wǎ eringe nyí m/mû nn/ri kámbú ké kace ńké badakó Kéba.

⁵ Osówo o-raa ne me o/fu, wǎn-onet, bírî a-tún bushûyû. Me n/tún ne n/ri orím-bukye ámu mú o/mû o-sa ng Osówo kafâ ányi fáráng ne kyikit-kyifen-Osówo echi ké ocím-dyifyi.

⁶ Osówo o-raa ne me o-fu, wǎn-onet, wo amu a-ri ng ńkyí nkyi kyi-chi i dí. Ri biinunut-byěm ḿbyí banet-Ézerel mbe ba-chi i nyín. Mbé mbe ba-ró ng mě ké kyikit-ociring ejí n-câ tíbítíbí. Wo a/chi a-ri biinunut-byěm byi-jê byi-shwôm něen.

⁷ Mbú bu/kúng mě bu-dim ne me ké dyifyi ńdyí kyibám-kiǐtí-kyise-kyifen-Osówo echi ńkyí kyíjí, bu-tông mě mbwo ké ekpe.

⁸ Mbú bu/raa bu/fu, wǎn-onet, sé ekpe ńnyín a-shwôm. Me n/sé kányí n-shwôm n-ri dyifyi.

⁹ Mbú bu-raa ne me bu/fu, ca ké kafâ a-da-ri biinunut-byěm ḿbyí mbé mbe ba-chi i ányi.

¹⁰ Me n/ce kâng ké kafâ n-da-ri. Ba/sáng efyi ne enyam ekíri nyí badaciring, ne byěm byikíri ḿbyí banet-Ézerel mbe ba-fâ nshwam ba-kyâ kámbyí ké ekpe emúmú.

¹¹ Bajam-banet bachât esim diǐkpú ḿbé banet-ashí-banet-Ézerel ba/mû ányi, cibicibi ne Jazanyâ mú wǎn-Sháfan. Nang yeě ányi o/mû o-níbî ng chwǒm-burwan eshí ne erúkwâ e/mû e-byí i ké burwan.

¹² Osówo o/bí mě o/fu, wǎn-onet, wo amu a-ri ng ńkyí banet-ashí-banet-Ézerel mbe ba-chi i ké kadip? Mbé kángkáng mbe ba-fâ nshwam ké nfût mú oo/sú ne erím-bakye, ké nǎ, mbé ba/fu, Óburúkpâbí o*fí o-ri ng bě*. Nyǐ oo/dim o-mîng oshê.

¹³ Óburúkpâbí o-raa ne me o/fu, wo a/chi a-ri kámbé ba-chi biinunut-byěm byi-shwôm éné.

¹⁴ Nyǐ o-yip mě kâng byi-dim ké ocím-dyifyi-kiǐtí-kyise-kyifen-Osówo echi ńdyí bushûyû, o-da-tông mě banyinyi ḿbé mbe ba-tii ng bukyû ḿbú osówo mú badakó Támuz o/kpú.

¹⁵ Óburúkpâbí o-bí mě o/fu, wǎn-onet, wo amu a-ri ng ńkyí ányi? Wo a/chi a-ri biinunut-byěm byi-shwôm éné.

¹⁶ O-yip mě kâng byi-dim ké kyibám ńkyí ké kafâ, ńkyí kiǐtí-kyise-kyifen-Osówo echi. Banet ba/mû bujam esim batánge ányi fáráng ne dyifyi-kyise kyiyén, ké otyém ne otyém-kyikit ńkyí badachi kyifen-Osówo ne mpúbi. Mbé ba/mû ba/bírî esim ba-tî kiǐtí-kyise-kyifen-Osówo echi, ne ba/mû ba-tíngê e kyísí kyicê ńkyí óbyísû mu o-byí i, ba-fâ óbyísû.

¹⁷ Óburúkpâbí o-raa ne me o/fu, wǎn-onet, wo amu a-ri ng ńkyí ányi? Banet-Júda ḿbén kyi*fí kyi-kwárê ng kámbé ńkyí mbé mbe ba-chi i biinunut-byěm ḿbyí wo amu a-ri ng nyín* ne anwa nyí mbé mbe ba-cen n ne nyǐ oshê omúmú*. Mbé ba-man ba-ba-chi kámbyí nyín ké kafâ-kiǐtí-kyise-kyifen ejí echi kyiyén, ba-chi kyi-sa mě kyi-shwôm. Ri eringe nyí mbé mbe ba-cábê ng mě ké dyizong-kyibî-bukwóp ńdyí dyi/bên dyi-shwôm.

¹⁸ Mbé ba/chi ba-ri kángkáng busa ḿbú kafâ esa ejí. Me mm*ba/chi m-mîng kámbé ba-fem* n-ri nang kámbé bafip*. Mbé ba/chi ba-wonge ké banshwam efé ba-kye mě ne ejá kyíbóng kyíbóng nké mm*ba/chi n-fwôo atông n-jwo kámbé*.