Ezékyel 7 - Bokyi Bible

Nkuli Kyikû mú Ézerel o/firi Fáráng

¹ Óburúkpâbí o/raa ne me

² o/fu, wǎn-onet, nyín něen ńkyí me Óburúkpâbí mú mu Otu Kyítá mu n-sét ng esí nyí Ézerel. Nyín nkuli kyikû něen mú esí emúmú.

³ Ézerel, nkuli kyikû oo/fyi. Wo a/chi a-ri kafâ esa ejí, ké nǎ, me mu m-pan n ǒ mpan ké ńkyí wo aa/chi. Me n/chi n-só ǒ ewa ké kángkáng biinunut-édúú eyên.

⁴ Me mm*ba/chi m-mîng ǒ a-fem* n-ri ǒ nang bafip*. Me n/chi n-kye ǒ busông ké biinunut-byěm ḿbyí wo aa/chi, eringe nyí adanyît a/fu, me nké mu Óburúkpâbí.

⁵ Nyín něen ńkyí Óburúkpâbí mú mu Otu Kyítá mu o-sét ng, o/fu, afaníkong nyi a-bâ ké abónge ké abónge.

⁶ Kii/man kángkáng. Nyín něen nkuli kyikû. Wo a*fí to*.

⁷ Nkuli kyikû mú ben mú bamu ba-kyú u ké esí mu o-bâ. Nkéré mu o-bâ mú [ajî aa*chi to ké biinchéng-bakye ḿbyí eku*. Chwǒm kii*kyú áku kyi-cibi ne byěm yógeyóge nké nke*.]

⁸ Ké kaǎnyín-nkéré, wo a/chi a-ri kángkáng busa ḿbú kafâ esa ejí. Me mu m-pan n ǒ mpan ké ńkyí wo aa/chi, ne me n/chi n-só ǒ ké kángkáng biinunut-édúú eyên.

⁹ Me mm*ba/chi m-mîng ǒ a-fem* n-ri ǒ nang bafip*. Me n/chi n-kye ǒ busông ké biinunut-byěm ḿbyí wo aa/chi, eringe nyí adanyît a/fu, me nké mu Óburúkpâbí, a-nyît to a/fu, me nké mu n-kyâ ǒ busông.

¹⁰ Dyicí-afaníkong ndyi dyi-bâ dyi-kâm Ézerel. Bunwa mbu bu-jê ng bu-câ kashú. [Byiko etông bii/sú běn byi-kpá.]

¹¹ Bunwa bu-cen n ne dyityém ebên chwóó. Chwǒm kii*waa kámbé* nang esang* nang bunong* nang busa*.

¹² Nkéré mu o-bâ. Dyicí dii/fárâng ńdyí byěm eré ne byěm eshee bii*byí to wǎ chwǒm* ké nǎ, busông ḿbú Osówo mu o-kyâ bu-ta ng nang yeě eringe ebónge. [

¹³ Ncen kasî o*fí mú o/chi o-kpen ka-rí eringe nyí nyǐ o/chi o-já ńkyí kyi/tánê ǎ* ké nǎ, kafâ esa ńké Osówo ka/ta nang yeě. Banet ḿbé mbe byibî-banet baa*man efem*.]

¹⁴ Ba-kpet ng ntán ejwá nang yeě o-kpet byiko ekpá. Nké onet o*fí mú o/chi o-dim byití* ké nǎ, kafâ esa ńké Osówo ka/chi ka-ta nang yeě.

Busông ké Byibî ḿbyí Ézerel

¹⁵ Mbe ba-nwa ng bunwa ké byiká-oshê, ne orwôm ne esong mbyi byi-nwa ng banet ké bufâ-byise. Nang yeě nké o/byí kyíjí ba/chi ba-ju ǎ ké bunwa, ne nang yeě mú mu ké byise o/chi o-kpú orwôm ne esong. [

¹⁶ Banet bakíri ba/chi ba-chêe ba-jâ ké eku wǎ burúú ḿbú mbe ba-ró ng kámbú ké ewo. Mbé kángkáng ba/chi ba-tii ké byibî ebe.]

¹⁷ Abwô nyí nang yeě a-firi ng kyeekyee, ne arông ebe a/chi a-kûtím banê.

¹⁸ Mbé ba/chi ba-fé byídí-dyikán eta, ne ba/chi ba-tím banê ké byiko byimúmú. Ba/chi ba-pwát kámbé ashí, ne ba/chi ba-fé kámbé kángkáng éshwân.

¹⁹ Mbé ba/chi ba-pwó akpuga ebe ké byiká-oshê wǎ biǐbyém-byiryíng, ké nǎ, nang akpuga aa*man enyii kámbé* ké nkéré Osówo o-kú o-tông ng busa-dyityém emen*. Mbé baa*man ekúng kányí ba-chi ńkyí mbe ba-ryuu ng* ba-ryí nang oryî ba-zût*. Akpuga ebe nyi a-chi i kámbé ba-chi i byibî.

²⁰ Ké nkéré obónge, mbé ba/mû ba-tông ng byiko ké byibwáng ebe ḿbyí byinong, nké mbé ba/mû ba-kúng ng kámbyí ba-chi i biinunut-erím-bakye. Ké bubwô ámbu nké Óburúkpâbí oo/chi esang ebe e-firi kyibî-chwǒm.

²¹ Óburúkpâbí o/raa o/fu, me n/chi m-mîng bacinbánet ba-bam kámbé byěm ba-koo, ne bambên byije ba/chi ba-koo kámbé esang kángkáng ba-bên kányí.

²² Me mm*ba/chi n-faa ojá ké nkéré baa/bên [kiǐtí-kyise-kyifen ejí echi*] ńkyí kyinong* ne ké nkéré bambam banet byěm badasé ba-nung ké nkyí* ba-bên kánkyí*. [

²³ Kángkáng byěm byi/firi yógeyóge.] Esí ee/sú ne banju banet, ne eshê ee/sú ne anwa.

²⁴ Me n/chi m-bâ ne eshê nyín nyí e/bên atyém e-shwôm, m-mîng kányí e-koo byise enen. Busa bu/chi bu-man bakân-banyinchéng enen ké nkéré mm/mîng eshê e-bên byikit enen ḿbyí bamu ba-fâ banshwam.

²⁵ Nkéré mú afaníkong mu o-bâ. Ben ba/chi ba-kyé bunyîn-dyityém, ne baa*ba/chi ba-ri kámbú*.

²⁶ Afaníkong a/chi a-róng ké abónge ké abónge, ne byibî-bǎmpém byi/chi byi-kûróng byi-fâ. Ben ba/chi ba-tîm bamkpábé ḿbé badasét byiraa ejí arông ba/fu, basét běn ńkyí mbé ba/ri nkyi kyi-bâ. Banchi kyifen-Osówo baa*ba/chi ba-kyú ne chwǒm ńkyí badatángê banet* ne banet ḿbé bakínkán baa*ba/chi ba-kyú ne bacê ḿbé badakye*.

²⁷ Otu o/chi o-ta dyikán, ne onet-dyishí-oshê o/chi o-mîng achi etî, ne banet ba/chi ba-tím banê ké bushî. Me n/chi n-kye běn busông ké kángkáng ḿbyí baa/chi, ne me n/chi m-pan běn mpan ké eringe ebónge nyí ben ba/mû ba-pan n banet ḿbé áku. Ńkyín kyi/chi kyi-tông kyi/fu, me nké mu Óburúkpâbí.