Ezékyel 5 - Bokyi Bible

Ezékyel o/két Eji Emen

¹ Óburúkpâbí o-raa o/fu, wǎn-onet, yip kashwám ńké nennen a-kwárê kyiti eyên ne eji eyên kángkáng. A-kan kâng eji ányi ké órúmá, a-kyii kányí byikit byichât.

² Shí kyikit-eji kyibónge ké kafâ-oshê ké nkéré baa/koo kámú. Yip ńkyí kyibónge a-két ng kánkyí a-câ ké kashwám eyên ké nkéré a-kú a-byí i kyíjí ké oshê. Kyikit-eji kyibónge ńkyí kyi/waa, pwó kánkyí kyíbóng byiryibyiryi, ne me n/chi n-zóngê ochéé ne nkyí ne kashwám ejí.

³ Tî boǒnyín-eji a-bwá kányí ké ocím-kyídí eyên.

⁴ A-fîm kâng boǒnyín a-fé ké okwâ a-mîng kámbú bu-shí kángkáng. Okwâ o/chi o-fím ké mbú o-tát oshê-Ézerel omúmú.

⁵ Óburúkpâbí mú mu Otu Kyítá o/raa o/fu, bírî achi a-ri Jerúsélem. Me n/tî kámú ké otyém ne otyém mú ejíí ne eshê ekíri ké bakô emen.

⁶ Nké Jerúsélem o/bírî bunwa ne byije ejí, ne o/tông o/fu, mǔ o/bên o-shwôm eshê nyí áku, o-né byěm echi o-shwôm eshê nyí nyi ǎ ké bakô. Jerúsélem o/né byije ejí etî.

⁷ Jerúsélem, kántîk, fwôo atông a-jwo ńkyí me Óburúkpâbí mú mu Otu Kyítá mu n-sét ng. Ké bubwô ḿbú a*fí a-chi i ńkyí byije ejí mbyi byi-sét ng* wo aa/cen ne afaníkong a-shwôm eshê nyí nyi ǒ ké bakô. Wo aa/firi ne édúú nyí eshê ekíri.

⁸ Ké bubwô ámbu, me Óburúkpâbí mú mu Otu Kyítá mu n-sét ng ǒ n/fu, me n/firi onet-bushwôn eyên. Me n/chi n-két mpan o-bên ǒ ké kyikit ńkyí eshê kángkáng edaman eri.

⁹ Ké bubwô ḿbú kángkáng byěm ḿbyí amu a-chi i, ḿbyí bii*nyîn mě* me n/chi n-kye Jerúsélem busông ḿbú m/mû n*da/kye ne* ne mm*ba/chi n-chîkye dyizong ándyi*.

¹⁰ Ké bubwô ámbu, banchí ne bané-bwǎn ké Jerúsélem ba/chi ba-ryí bwǎn ebe ne bwǎn ba/chi ba-ryí banchí ne bané ebe. Me n/chi n-kye ǒ busông m-pwó nang yeě nang yeě mú o/waa okpó byiryibyiryi ké kángkáng byikit.

¹¹ Ké bubwô ámbu, me Óburúkpâbí mú mu Otu Kyítá n/sem byiko ejí n-sét ǒ n/fu, ké nǎ, wo aa/kúng kángkáng biinunut-byěm ḿbyí a/chi a-bên kiǐtí-kyise-kyifen ejí echi, me n/chi n-cere ǒ byiko bii*kpú mě*.

¹² Ké byikim-banet eyên byichât, kyikim kyibónge kyi/chi kyi-kpú orwôm ne esong ké oshê. Ba/chi ba-cere kyikim kyibónge ké bushwám, ké dyishí-bukwóp-oshê. Ne n/chi m-pwó kyikim ńkyí nryî esim kyíbóng byiryibyiryi n-zóngê ne nkyí ochéé ne kashwám ejí.

¹³ Wo a/chi a-ri kángkáng busa-dyityém ne buruu ejí tete kyi-kwárê mě. Ké nkéré ńkyín kángkáng kii/chi, wo a/chi a-bángê a/fu, me Óburúkpâbí nn/raa ne wo, ké nǎ, me nke ka-sa ng mě ne wo ké dyityém eyên ńdyí a*da/fé ne me*.

¹⁴ Nang yeě mú o/fím ké eshê nyí nyi ǒ ké bakô, mú o/chi o-cen o-shwôm, o/chi o-jwó ǒ, o-ciring ǒ.

¹⁵ Ké nkéré kafâ kaa/bírî mě, ne dyityém ejí dyi-kú dyi-sa ng mě ne wo, n-kye ǒ busông, bushî bu/chi bu-róng eshê nyí nyi ǒ ké bakô. Nyǐ e/chi e-tún ǒ ne ecábé, e-fát ǒ kiikuku.

¹⁶ Me n/chi n-chi byiryíng byi-man ǒ, a-waa esong. [Wo] a/chi a-jwo bubân-esong wǎ abán nyí ba/tím ǒ ké byiko ba/fu, wo akpú.

¹⁷ Me n/chi n-twóm esong ne byibî-enyam byi-ba-ju bwǎn eyên, ne n/chi n-twóm byirwóm ne anwa ne byití byi-ba-ju ǒ. Me Óburúkpâbí nké n/raa.