Ezékyel 42 - Bokyi Bible

Byise Byifee ḿbyí byi/kim ne Kiǐtí-Kyise-Kyifen-Osówo echi

¹ Onyinchéng ámu kâng o-kúng mě byi-da-nung ké esim-kafâ-kabám nyí kyíjí, ne o-sí mě byi-wâa ké kyise ńkyí ogba-bushûyû mú kiǐtí-kyise-kyifen-Osówo echi, ńkyí kyi*da/tíbî ne kyise ńkyí nkyi ogba mú óbyísû odaríbî* mú kiǐtí-kyise-kyifen-Osówo echi.

² Kyise ńkyín kyi/mû bajam-bamyíta bafee esim diǐkpú ké butang ne bamyíta bujam esim batánge ké baryên.

³ Nkyí kyi/bírî ogba obónge ké kyicê-otyém-kyikit mú o/mû bamyíta diǐkpú ké baryên, mú o/mû o/fárâng ne kiǐtí-kyise-kyifen-Osówo echi. Ne ké ogba mú áku, nkyí kyi/bírî ké kyikit ńkyí ba/nap ké aká ńkyí esim-kafâ-kabám nyí kyíjí. Ba/bi kyise ánkyi ké byikim byichât, óbe mú kyíbóng o/tíbî o-shwôm mú kyísí.

⁴ Mpúbi mú o/mû bamyíta batánge ké buryên ne [bajam-bamyíta bafee esim diǐkpú ké butang] o/mû ogba-kyise ánkyi, mú kyicê ńkyí bushûyû ne ecím-afyi ké ogba ámu.

⁵ Banfût ḿbé ké kyikim-kyise ńkyí kyíbóng ba/mû sídi ba-shwôm ḿbé ké kyikim ńkyí ké otyém ne ńkyí kyísí, ké nǎ, mbé ba/bi kámbé tíbítíbí ba-shwôm.

⁶ Banfût ké byikim ámbyi kángkáng byichât ba/mû ké ákpamê, ne byikwap byi/mû byi*fí ḿbyí byi/kám kámbé* wǎ byise ḿbyí áku ké kafâ-kabám.

^7-8 Esim-ekpe nyí kyise ánkyi nyí kyíjí e/mû bamyíta bujam esim batánge ké bucîp ké kyikim ńkyí kyísí. Butang emen bu/mû bajam-bamyíta bafee esim diǐkpú, ne banfût ba/mû ké bamyíta bujam esim batánge ḿbé ba/waa. Ké kyikim ńkyí kyíbóng, banfût ba/mû ké butang-kyise kyimúmú.

^9-10 Ké kyikû-banfût ḿbén bafee ké dyishí-kyise ńdyí kyicê ńkyí óbyísû mu o-byí i, [ké kyikit ńkyí ekpe e/kpet,] ba/mû ba/fé ocím-dyifyi mú adanung ké esim-kafâ-kabám nyí kyíjí. Dyizong-kyise ánkyi kyi/mû ké ogba-[busyísen]-kiǐtí-kyise-kyifen-Osówo echi. Nkyí kyi/mû kyi*da/tíbî ne kyise ńkyí ké dyishí-kiǐtí-kyise-kyifen-Osówo echi* ké kyicê ńkyí óbyísû odaríbî.

¹¹ Mpúbi o/mû ké bushú-banfût ámbe wǎ mú mu ké kyicê ńkyí bushûyû. Ba/kan kámú eringe ebónge, ne ba/chi kámú eringe ebónge ne ecím-afyi eringe ebónge.

¹² Dyifyi dyi/mû ké banfût ké ogba-busyísen-kyise ánkyi, ké dyishí ńdyí kyicê ńkyí óbyísû mu o-byí i, ké kyikit ńkyí ekpe e/kpet.

¹³ Onyinchéng ámu o-sét mě o/fu, byise ḿbyín kángkáng byifee byi/já Osówo. Banchi kyifen-Osówo ḿbé mbe ba-nung ng ké bushú ḿbú Óburúkpâbí mbe ba-ryí i eyáré nyí e/já Osówo e-shwôm ké mbyí. Ké nǎ, banfût ḿbén ba/já Osówo, banchi kyifen-Osówo ba-tî ng eyáré nyí e/nwa e-shwôm ké mbé, nyí nyi nyí esang-byichí ne nyí byifen echi ké bubwô-byibî ne nyí ké eyáré-afwá eré.

¹⁴ Ké nkéré banchi kyifen-Osówo baa/ce ké kafâ-kiǐtí-kyise-kyifen-Osówo echi, ne ba-kú ba-ryuu ng ba/fu, mbé ba-câ ké esim-kafâ-kabám nyí kyíjí, mbé ba-man ba-mîng byídí ḿbyí byi/já Osówo, ḿbyí mbé ba/mû ba/fé ké nkéré ba/mû ba-chi i kyifen ba-kyâ Óburúkpâbí ké banfût ḿbén. Mbé ba-man ba-fé byídí byikíri ne ba-kûdim ba-ca ké kyikit ńkyí banet badacibi.

Ocím mú ba/kan Kyikit ńkyí Kiǐtí-Kyise-Kyifen-Osówo echi

¹⁵ Ké nkéré onyinchéng ámu oo/man esim nyí kafâ-kabám-kiǐtí-kyise-kyifen-Osówo echi ekan, nyǐ o/kúng mě byi-cen ké ocím-dyifyi mú kyicê ńkyí óbyísû mu o-byí i, byi-byí kyíjí ne nyǐ kâng o-kan esim-kyikit nyí kyíjí. [

¹⁶ Nyǐ o/kúng kachí ńké odakan byěm o-kan ogba mú óbyísû mu o-byí i, ne o/mû égot-bamyíta ebónge ne bajam-bamyíta bafee esim diǐkpú.

^17-19 Ne o-kan kâng ogba mú bushûyû ne mú busyísen ne mú óbyísû mu o-ríbî ng, ogba nang orá o/kwóp égot-bamyíta ebónge ne bajam-bamyíta bafee esim diǐkpú.]

²⁰ Ké bubwô ámbu, ekpe e/koo kyikit ńkyí kyi/byí égot-bamyíta ebónge ne bajam bafee esim diǐkpú ké egba emúmú. Ekpe e/bwom wǎ kyikit ńkyí kyidakyii chwǒm ńkyí kyi/já Osówo ne ńkyí kyi*da/já Osówo*.