Ezékyel 4 - Bokyi Bible

Ezékyel o/sange eringe nyí ba/chi ba-wáp Jerúsélem ba-fé ké Kafâ

¹ Osówo o/raa o/fu, wǎn-onet, yip kyirim-ecing a-tî kánkyí ké kashú eyên. Tut basáng ké nkyí ba-bwom wǎ oshê-Jerúsélem.

² Chi byěm ḿbyín eringe nyí ba/wáp oshê ámu ba-fé ké kafâ, a-sím abíng ké nkyí, a-kpang dyibwôm ké nkyí a-bi to boompyep-byití ké nkyí ne byichí ḿbyí badadíp afyi-oshê ba-sé a-wáp kánkyí kángkáng.

³ Yip dyicáng-kiǐré a-bi kándyí wǎ ekpe ké otyém ne otyém eyên ne oshê. Bírî oshê kashú, ké nǎ, wo nké amu a-koo ng kámú. Ńkyín nké kyi/chi kyi-kyú banet-Ézerel wǎ ekap.

^4-5 Rí sáre ké kyicê-bubwô-eku eyên, ne [me] n/chi n-tû ǒ kyibî ńkyí oshê mú Ézerel. Wo a/chi a-kyú ányi ké égot-ací ebónge ne bajam-ací kátángekányi esim-ací diǐkpú, a-ri afaníkong ké bubwô-byibî ebe. Me n/kye ǒ busông, dyicí dyibónge dyi-bwom m ké dyije dyibónge ńdyí busông ebe.

⁶ Ké nkéré aa/man ńkyí ányi, bírî kyicê-bubwô-etyebéng eyên a-ri busông ké kyibî ńkyí Júda, ké bajam-ací bafee, dyicí dyibónge dyi-bwom m ké dyije dyibónge ńdyí busông ebe.

⁷ Tî achi eyên ké Jerúsélem mú mbe ba-koo ng, a-fé kámú bushî, a-sét byiraa ejí a-bîn kámú.

⁸ Me n/chi m-bwá ǒ erí eringe nyí wo aa*man ebírî nkó* tete ba-koo oshê kángkáng.

⁹ Kántîk, yip esang-byichí nyí badaryí ké nkéré mú esong. Cibi kányí kángkáng a-chi berêt. Ńkyí ányi nké nkyi chwǒm ńkyí a/chi a-kûryí ké égot-ací ányi nyí a/chi a-rí sáre kyicê eyên kyibónge ńkyí bubwô-eku.

¹⁰ Ba/chi ba-kye ǒ égot-bagarâm-berêt ebónge ne bagarâm-berêt bujam esim diǐkpú ké dyicí, ne ryí kámú o-byí orî-dyicí.

¹¹ A-man a-kyú to ne ocím-omu mú adajwáp. A-jwáp ng bammîk bafee ké dyicí.

¹² A-man a-kúng biǐjínjwóm-abîng-onet a-wóngê okwâ ké nyǐ. Chi berêt ké okwâ ámu. Ryí berêt ámu ké kyikit ńkyí nang yeě nang yeě oda ǒ eri.

¹³ Óburúkpâbí o/raa o/fu, ńkyín nkyi kyi-tông ng eringe nyí banet-Ézerel ba/chi ba-ryí byiryíng ḿbyí byije ejí byi*da/bángê byi/fu, baryí* ké nkéré n/chi m-pwó kámbé byiryibyiryi ké eshê nyí e*fí nyí ebe*.

¹⁴ Nké me n/faa n/fu, aa*wááng* ǎ Óburúkpâbí mú mu Otu Kyítá. Me n*da/bên ne byiko ejí*. Kyi-fím ne bubwásíng, me n*da/ryí ne enyam nyí e/kpú nyǐ eyén* nang nyí kyibî-enyam kyi/ju*. Me n*da/ryí ne byiryíng nang byibónge ḿbyí byimu byi-ciring ng*.

¹⁵ Osówo o-raa kâng o/fu, kyi/nwa. Me n/chi m-mîng ǒ kâng a-wóngê okwâ ké biǐjínjwóm-abîng-mpong, a-chi berêt eyên ké mǔ.

¹⁶ Ne o-chîraa o/fu, wǎn-onet, me n/chi n-chi berêt o-man ké Jerúsélem. Banet ḿbé mbe ányi ba/chi ba-firi ké bafip ne bushî ké nkéré ba-kú ba-kan n byiryíng ḿbyí badaryí ne omu mú badajwáp.

¹⁷ Berêt ne omu byi/chi byi-man kámbé. Mbé baa*ba/chi ba-chînyît ńkyí badachi* ne mbé ba/chi ba-firi ké bukyû ké bubwô-byibî ebe.