Ezékyel 34 - Bokyi Bible

Bambâm Ebû ḿbé Ézerel

¹ Óburúkpâbí o-raa ne me

² o/fu, wǎn-onet, sét byiraa ejí a-bîn batu-ashí ḿbé Ézerel, a-sét kámbé a/fu, ńkyí me Óburúkpâbí mú mu Otu Kyítá mu n-sét ng kámbé n/fu, ben bambâm ebû ḿbé Ézerel, kyi/bên kanong kanong ne ben. Ben bamu ba-tún n byiko enen, nké ba*fí ba-tún n ebû*.

³ Ben bamu ba-jwáp ng abî emen ba-bwá ng byídí ḿbyí ba/chi ké eríp emen, ne bamu ba-ju ng ebû nyí enong enong ba-ryí i.

⁴ Ben ba*da/tún nyí e*fí to ne busa* ba-chi nyí nyi e-rwôm m e-nyange* ba-bwá nyí ba/némê kányí byinêm* ba-bwa esim ne nyí ee/yêe e-jâ kyicê kyikíri* ba-kye nang nyí e/mû ee/tánê*. Ben ba/bwa ba-tún kányí ne kyibî-dyityém.

⁵ Ké nǎ, ebû e/mû e*fí ne mbâm ebû* nyǐ e/firi byiryibyiryi, ne byibî-enyam byi/ju kányí byi-ryí.

⁶ Ké bubwô ámbu, ebû ejí e/yêe kyíbóng-eku. Nyǐ e/mû byiryibyiryi ké ejíí emúmú, ne onet o*fí mú o/tún kányí* o-kan nang kányí ekyé*.

⁷ Kántîk, ben bambâm ebû, fwôo n̂g atông ké ńkyí me Óburúkpâbí mu n-sét ng běn.

⁸ Me Óburúkpâbí mú mu Otu Kyítá mú mu okpó n/sem byiko ejí n-sét n/fu, kyi-nwa ng ńkyí ben badafwôo atông ba-jwo mě. Byibî-enyam byi/nwa ne ebû ejí byi-ju kányí byi-ryí, ké nǎ, mbâm ebû o/mû o*fí*. Bambâm ebû ejí ba*da/kan ebû ányi ekyé*. Mbé ba/mû ba-tún n byiko ebe, *chí ebû*.

⁹ Ké bubwô ámbu, ben bambâm ebû, fwôo n̂g atông ba-jwo mě.

¹⁰ Me Óburúkpâbí mú mu Otu Kyítá mu n-sét ng n/fu, me n-chi i onet-bushwôn enen. Me n/chi n-koo běn ebû ejí. Mm*mîng běn to ba-chîkyú kányí bambâm ebû*. Mm*ba/chi n-chî běn emîng ba-tún byiko enen nké nke*. Me n/chi n-nyángê ebû ejí n-koo běn kányí, ne mm*ba/chi m-mîng běn ba-ryí kányí*.

Mbâm Ebû mú Onong

¹¹ Me Óburúkpâbí mú mu Otu Kyítá mu n-sét ng běn n/fu, me oyén n/chi n-kyé ebû ejí n-nen kányí

¹² ké dyizong-bukwóp bubónge ḿbú mbâm ebû mu o-nen n ebû emen nyí e/mû byiryibyiryi, ne baa/chîbê ne nyǐ kyikit kyibónge. Me n/chi n-kúng kányí ké kángkáng byikit ḿbyí nyǐ e/firi byiryibyiryi ké kyibî-dyicí ándyi m-bwa ne nyǐ esim.

¹³ Me n/chi n-kúng kányí ké eshê-bacinbánet, m-kpaa kányí n-tî kyikit kyibónge m-bwa ne nyǐ esim ké esí nyí ebe. Me n/chi n-tông kányí bukwóp e-bwa esim ké eku ne buce ḿbú Ézerel, ne n/chi n-nen kányí ké baryî ḿbé banong.

¹⁴ Me n/chi m-mîng kányí e-ryí baryî ké eku ne ké ewo ne ké kángkáng byikit-baryî ḿbyí ké esí nyí Ézerel.

¹⁵ Me oyén n/chi n-kyú mbâm ebû mú ebû ejí, ne n/chi n-kyé kyikit ńkyí nyǐ edakyú e-jáng. Me Óburúkpâbí mú mu Otu Kyítá nké n/raa.

¹⁶ Me n/chi n-kyé nyí ee/tánê, m-kpî nyí nyi e-yâa ng e-jâ byicê byikíri m-bwa esim ne nyǐ, ne n/chi m-bwá nyí ba/némê kányí byinêm, ne n/chi n-chi nyí nyi e-rwôm m e-nyange. Nké me n/chi n-ju nyí e/rêe baryên ne nyí shwanshwan, ké nǎ, me mu mbâm ebû mú mu o-chi i ńkyí nkyi kanong.

¹⁷ Kántîk kâng, ǎ ebû ejí, me Óburúkpâbí mú mu Otu Kyítá mu n-sét ng běn, n/fu, me n/chi m-pan běn nang yeě nang yeě mpan m-pap nyí enong ne nyí ee*nwa* n-tî cát, m-pap etám-ebû ne ebúbǔu.

¹⁸ Ben bakíri ba*fí ba-zût ng ké biǐbyâa ḿbyí byinong byinong eryí*. Ben bamu ba-cím m nang ḿbyí ba*fí ba-ryí i*. Ben bamu ba-jwáp ng omu mú cángénéné ba-chi mú ba*fí ba-jwáp ng* o-firi ne biǐntóng.

¹⁹ Ebû ejí nyí áku nyi e-ryí i biǐbyâa ḿbyí ben bamu ba-cím m ba-fâ kyísí, ne nyi e-jwáp ng omu mú ben baa/chi o-firi ne biǐntóng.

²⁰ Ké bubwô ámbu, me Óburúkpâbí mú mu Otu Kyítá mu n-sét ng běn, n/fu, me n/chi m-pan ebû nyí nyi ne busa ne nyí e*fí ne busa* mpan, m-pap běn ne barî.

²¹ Ben ba/tín nyí nyi e-rwôm m ba-tî ké bukô, ne ba/tírîng kányí ké ashí e-byí ké dyibóng-ebû.

²² Nké me n/chi n-nyii ebû ejí. Mm*mîng ba-chîtî kányí ké kyibî-bukwóp*. Me n/chi m-pan ebû ejí nang erá mpan, ne n/chi m-pap nyí enong ne nyí ee*nwa* n-tî cát.

²³ Me n/chi n-kye kányí otu wǎ Otu Dívit mú ḿgbán ejí, o-kyú kányí mbâm ebû obónge ne nyǐ o/chi o-kûtún kányí.

²⁴ Me Óburúkpâbí n/chi n-firi Osówo ebe, ne otu wǎ Otu Dívit mú ḿgbán ejí o/chi o-kyú kányí otu-dyishí. Me nké n/raa.

²⁵ Me n/chi n-ryí ocím ne nyǐ n-sem dyizîn ejí, n-sét kányí n/fu, chwǒm kii*chi kányí*. Me n/chi n-chi kángkáng byibî-enyam ḿbyí mbyi ké esí nyí ebe byi-man eringe nyí ebû ejí edakyú ké dyikán chwǒm kii*chi kányí* ne eringe edarí ké kyizinge.

²⁶ Me n/chi n-jware kányí m-mîng kányí e-kyú e-wáp kaku-ociring ejí. Ányi nké n/chi n-jware kányí ne kyibû ké nkéré edaryuu kánkyí.

²⁷ Asín-byichí a/chi a-zím byirim. Byifát byi/chi byi-nwa byíkwôn, ne nang yeě o/chi o-kyú ké esí emen chwǒm kii*chi ǎ*. Ké nkéré nn/két bamgbokobá ḿbé ba/fé banet ejí wǎ básóng ba-fem, mbé ba/chi ba-nyît kâng ba/fu, me n-chi i Óburúkpâbí.

²⁸ Eshê nyí e/bángê ké bakye esháng ee*ba/chi e-chîbên kámbé byěm* ne byibî-enyam bii*ba/chi byi-chîju kámbé byi-ryí*. Mbé ba-kyú u chwǒm kii*chi kámbé* ne onet o*fí mú o/chi o-fé kámbé bushî*.

²⁹ Me n/chi n-kye kámbé esí nyí edafé byiryíng n-chi esong e-man ké esí nyí ebe. Eshê nyí áku ee*jwó to kámbé*.

³⁰ Nang yeě o/chi o-nyît o/fu, me mu n-ku ng Ézerel, ne o-nyît to o/fu, banet-Ézerel ba-chi i banet ejí. Me Óburúkpâbí mú mu Otu Kyítá nké n/raa.

³¹ Óburúkpâbí mú mu Otu Kyítá o-raa o/fu, ben ebû ejí nyí nyi dyibóng-byitú ejí, nyí mu n-nen n nké bamu banet ejí ne me nké mu Osówo enen.