Ezékyel 3 - Bokyi Bible

¹ Osówo o-raa o/fu, wǎn-onet, ryí nwet mún, a-ca a-da-raa ne banet-Ézerel.

² Me m/bâa kâng ecím ejí, ne nyǐ o/kye mě nwet ámu o/fu, me nryí.

³ Nyǐ o-raa o/fu, wǎn-onet, ryí nwet mún mú n/kye ǒ. Ryí kámú dyifít eyên dyi-sú. Me n/ryí kámú, ne o/mû o-nyîn n wǎ bakút-bukwan.

⁴ Osówo o/raa kâng o/fu, wǎn-onet, ca a-kâm banet-Ézerel a-da-sét kámbé nang ebóng ńkyí me n/sét ǒ n/fu, sét.

⁵ Me n*fí n-twóm m ǒ oshê-bacinbánet mú odasóng eraa* nké mu n-twóm m ǒ a-kâm banet-Ézerel.

⁶ Â me n/twóm ǒ oshê mú badaraa oshê mú odasóng eraa, mú wo aa*jwo* mbé ba/chi ba-fwôo atông ba-jwo ǒ.

⁷ Nké onet-Ézerel o*fí nang obónge mú odabángê o/fu, nyǐ o-fwôo ng atông o-jwo ǒ*. Nang me baa*ba/chi ba-jwo mě*. Mbé kángkáng ba/rêe atyém, ne ba-shwane e ashí.

⁸ Kántîk, me n/chi n-chi ǒ a-rêe dyityém ne dyishí eshwane wǎ mbé.

⁹ Me n/chi n-chi ǒ a-bwom cip wǎ buká, a-shwane wǎ buká ḿbú badakó dámon. *Dachi a-shî bambíri bunwa ámbe*.

¹⁰ Osówo o/raa o-ca kashú o/fu, wǎn-onet, fwôo atông a-jwo, a-zîim kángkáng byěm ḿbyí me mu n-sét ng ǒ.

¹¹ Ne a-ca kâng a-kâm banet-oshê eyên ḿbé ba/kúng kámbé ba-dim ne mbé wǎ básóng, a-sét kámbé ńkyí me Óburúkpâbí mú mu Otu Kyítá mu n-sét ng kámbé, nang ba-fwôo ng atông ba-jwo, nang baa*fwôo*.

¹² Ne Busun-Osówo bu-bêem mě kâng kyíbóng, ne n-jwo kyirime-ejá kyíbóng kyíbóng ké esim ejí ńkyí kyi/fu, kpee busan ḿbú ragerage ḿbú Óburúkpâbí mú kyíbóng kyíbóng.

¹³ Me n/jwo abyibabang nyí biǐnyám ámbyi ké nyi a-díp ng ne barî kyíbóng, ne kyicoge ńkyí biǐkât-mútu ámbyi ńkyí kyi/mû kyi/jê wǎ esí nké nyi e-náng ng.

¹⁴ Busa ḿbú Óburúkpâbí bu/bê bu-kâm mě ne kiǐtí-busa, ne ké nkéré Busun emen bu/mû bu-kúng ng mě, dyityém dyi/ruu mě, kafâ ka-sa mě.

¹⁵ Ne m-bâ kâng ké oshê mú badakó Têl-Ábip, mú mu ké bukô-kace ńké badakó Kéba, ké kyikit ńkyí banet-Ézerel ḿbé ba/mû ba/kúng kámbé ba/mû ba-kyú u. Me n/kyú ányi ací káchâtkányi, ne bushî ké ńkyí me n/ri ne ńkyí n/jwo.

Óburúkpâbí o/cá Ezékyel wǎ Onet-Mbâm

¹⁶ Ké nkéré ací ányi káchâtkányi aa/shwôm, Óburúkpâbí o/raa ne me o/fu,

¹⁷ wǎn-onet, me mu n-chi i ǒ a-firi onet-obâm mú oshê-Ézerel. Wo a/chi a-sét kámbé ekó nyí me mu n-kuri ng ǒ.

¹⁸ Â me n/sét n/fu, kyibî-onet kyi/chi kyi-kpú, nké wo a*da ǎ ekuri ekó a/fu, oyángê édúú emen eringe nyí odanyii dyikpen emen* nyǐ o-kpú u ne byibî, ne me n/chi n-chi ǒ a-ré dyifwá-bukyû emen.

¹⁹ Â wo a/kuri onet-byibî ekó, nké o*da/mîng byibî* nyǐ o-kpú u ne byibî, nké dyikpen eyên dyi-fem m.

²⁰ Â onet mú mu o-chi kanong ké ntûntû o/kpet byibî echi, ne me n/fé ǎ ké kyibî-kyikit, nyǐ o/chi o-kpú â wo a*da ǎ ekuri ekó*. Nyǐ o/chi o-kpú ké bubwô-byibî emen. Me mm*ba/chi n-zîim kanong ńké nyǐ o/mû o/chi* ne me n-chi i ǒ a-ré dyifwá-bukyû emen.

²¹ Â wo a/kuri onet mú mu o-chi i kanong ekó a/fu, o*dachi byibî* ne mu o-jwo ng ǒ, o*da/chîchi kyibî* nyǐ o-waa ng okpó, ne dyikpen eyên to dyi/chi dyi-fem.

Ezékyel oo*ba/chi o-man eraa*

²² Bubwô ḿbú Óburúkpâbí bu/mû mě ké byiko, ne n/jwo ké o/raa ne me o/fu, bûu a-byí a-wâa ḿbú ké owo. Me n/chi n-raa ne wo áku.

²³ Me n/dim kâng n-wâa ḿbú owo, ne áku nké n/ri busan ḿbú ragerage ḿbú Óburúkpâbí wǎ eringe nyí m/mû n/ri ké bukô-kace ńké badakó Kéba. Me n/tíngê bushú kyísí.

²⁴ Nké busa ḿbú Busun-Osówo bu/nung mě ké byiko bu-chi mě m-bûu m-bwom ké byiká ejí. Óburúkpâbí o-sét mě o/fu, ca dyijê a-da-fín byiko eyên ké kyise.

²⁵ Wǎn-onet, ba/chi ba-bwá ǒ erí ne wo aa*ba/chi a-man ebyí a-jâ kyíjí*.

²⁶ Me n/chi n-chi kabyíbabang eyên ka-bok eringe nyí aa*ba/chi a-man ekuri bambíri bunwa ḿbén ekó*.

²⁷ Ké nkéré n/chîraa kâng ne wo, n-chîbwa ne busa-kyiraa eraa n-kye ǒ, wo a/chi a-sét kámbé ńkyí me Óburúkpâbí mú mu Otu Kyítá mu n-sét ng. Banet bakíri ba/chi ba-fwôo atông ba-jwo, bakíri ba/chi ba-né ǒ, ké nǎ, mbé ba-chi i oshê mú bambíri anwa.