Ezékyel 26 - Bokyi Bible

Osówo o/két Mpan o-bên Oshê-Táya

¹ Ké mbwôp kashú-dyicí, ké otukáku ámu, ké aje diǐkpú ne din, kyi-fím ké nkéré ba/kúng bě ba-jâ ne be wǎ básóng, Óburúkpâbí o/raa ne me

² o/fu, wǎn-onet, nyín něen ńkyí banet-Táya mbe ba-jêe ng. Mbé mbe ba-raa ng ne ejá kyíbóng kyíbóng ba/fu, baa/bên Jerúsélem kángkáng. Busa emen ḿbú kasî eryí bu*fí to*. Oo*kan to bujinjang ne be*.

³ Kántîk kâng, nyín něen ńkyí me Óburúkpâbí mú mu Otu Kyítá mu n-raa ng, n/fu, oshê-Táya, me n-chi i onet-bushwôn eyên. Me n/chi m-bâ ne eshê chwóó e-ba-nwa ne wo, ne mbé ba/chi ba-bâ wǎ bunâng-baya ḿbé baryên.

⁴ Mbé ba/chi ba-bên ekpe nyí ba/bi ba-wâng oshê eyên, ne ba/chi ba-bú biǐnyáám-byikit-mbâm eyên ba-pwó kyísí. Me kâng n/chi n-jwoo édúkǎndú kángkáng m-pwó m-mîng buká wááng.

⁵ Bankâm ekworê ba/chi ba-tát boǒsém ebe ké buká ámbu ba/fu, bujwóm, ké kyikit ńkyí mbu ké baya. Me Óburúkpâbí mú mu Otu Kyítá nké n/raa. Eshê e/chi e-bên ǒ,

⁶ ne e/chi e-ju banet ḿbé mbe ba-kyú u ké eshê nyí e*fí ké bukô-baya* ne bushwám ebe. Ne wo kâng a/chi a-nyît a/fu, me nké mu Óburúkpâbí.

⁷ Óburúkpâbí mú mu Otu Kyítá o-raa o/fu, me n/chi m-bâ ne Otu Nébúkanéza mú Bábyílon, mú o/rêe o-shwôm kángkáng batu o-ba-nwa ne wo. Nyǐ o/chi o-fím bushûyû ne bannwa byití chwóó ne bubyî-orá ne bamútu ḿbé bubyî-orá budatut ne basúja ḿbé badayú bubyî-orá.

⁸ Ba/chi ba-ju banet ké bunwa ámbu, ḿbé mbe ba-kyú u ké eshê nyí e*fí bukô-baya*. Banet-bushwôn eyên ba/chi ba-sím abíng, ba-kpang azu-ecing, ba-fé oro-édem ba-ciring ǒ.

⁹ Mbé ba/chi ba-díp ekpe eyên ba-sé ne ba/chi ba-bú biǐnyáám-byikit-mbâm eyên ne biǐré ba-pwó kyísí.

¹⁰ Édúkǎndú nyí bubyî-orá ebe budachi e/chi e-cít ǒ. Kyicoge ńkyí bubyî-orá ebe mbu bu-tut ng bamútu ké nkéré bu-kú bu-shwôm m ké afyi nyí oshê mú baa/bên, kyi/chi kyi-chi ekpe e-náng.

¹¹ Banyû bubyî-orá ebe ba/chi ba-cen ké byiká-oshê eyên ba-ju ng banet ba-câ ne bushwám. Ba/chi ba-bú byikwap eyên ḿbyí byiryên ba-twóp kyísí.

¹² Banet-bushwôn eyên ba/chi ba-bên esang eyên ne kasî eyên ecen. Mbé ba/chi ba-bú ekpe eyên ba-pwó kyísí, ba-páp byise-byěm eyên ḿbyí byinong byinong. Mbé ba/chi ba-kúng aká ne byichí ne ecing kángkáng ba-fé ké baya.

¹³ Me n/chi n-chi a-mîng ekwan eyên kángkáng ne ane eyên nyí amu a-kim m ké dyícîng.

¹⁴ Me n/chi m-mîng buká ḿbú mbu ḿbú bankâm ekworê badatát boǒsém ebe bu-jwóm. Baa*ba/chi ba-chîbwât oshê ámu ba-bi*. Me Óburúkpâbí mú mu Otu Kyítá nké n/raa.

¹⁵ Óburúkpâbí mú mu Otu Kyítá mu o-sét ng oshê-Táya ńkyín o/fu, ké nkéré ba-kú ba-kpógê ng ǒ, bushî bu/chi bu-róng banet ḿbé mbe ba-kyú u ké bukô-baya ké dyiwonge ńdyí banet ḿbé mbe ba-ju ng kámbé mbe ba-wonge e.

¹⁶ Kángkáng batu ḿbé eshê nyí badacen ké baya ḿbé baryên ba/chi ba-shû ké bukyúng-butu ebe. Mbé ba/chi ba-pii ágbádá ebe ne byídí ebe ḿbyí byinong byinong, ba-tím m banê me ké ecing. Bushî ḿbú bu/chi bu-róng kámbé ké ńkyí kyi/chi ǒ bu/chi bu-jê kanong kanong ḿbú bu/chi bu-chi kámbé baa*mîng banê etím*.

¹⁷ Mbé ba/chi ba-kwán ǒ okwan-bukyû mún ba/fu, baa/bên kiǐtí-oshê. Bǎnsukyíkang emen [baa/jé] ké baya. Baya nang bará ba/mû ké bubwô-banet-oshê mún. Ne o/mû o-chi i bushî bu-róng kángkáng banet ḿbé mbe ba-kyú u ké bukô-baya.

¹⁸ Kántîk, ké dyicí ńdyí oshê mún oo/róng, eshê nyí baya ba/wáp kányí ba-fé ké otyém nyi e-tím m banê, ne byiko byi/kaa banet ebe ké dyizong-afaníkong ányi.

¹⁹ Óburúkpâbí mú mu Otu Kyítá o-raa o/fu, me n/chi n-chi ǒ a-firi kafâ dyikáá wǎ eshê nyí baa/bên, nyí onet o*fí o-kyú u*. Me n/chi n-chi baya ḿbé ríbíríbí ba-cít ǒ.

²⁰ Me n/chi n-twóm ǒ ké oshê-bakúsí a-kâm banet ḿbé ba/mû bakpó ké nkéré mú kpákpá. Me n/chi n-chi ǒ a-kyú ké oshê-bakúsí ámu ké byikit ḿbyí baa/bên kámbyí ne banyá, a-firi bucín ne banet ḿbé baa/kpú. Ké bubwô ámbu, banet baa*ba/chi ba-chîkyú ké wo* [a-chîbwa esim] ké burwám-banet bakpó*.

²¹ Me n/chi n-chi ǒ a-kyú ekap nyí edachi bushî, ne wo aa*ba/chi a-chîkyú*. Banet ba-kyé ng ǒ, nké baa*ba/chi ba-ri ǒ*. Óburúkpâbí mú mu Otu Kyítá nké o/raa.