Ezékyel 22 - Bokyi Bible

Byibî ḿbyí Jerúsélem

¹ Óburúkpâbí o-raa ne me

² o/fu, wǎn-onet, wo aa/kpá byiko ḿbyí adapan oshê mú oo/sú ne banju banet mpan dí. Sét kámú wááng kángkáng biinunut-byěm ḿbyí oo/chi.

³ Sét oshê ámu ńkyí me Óburúkpâbí mú mu Otu Kyítá mu n-sét ng n/fu, ké bubwô ḿbú wo aa/ju banet eyên chwóó, ne byiko eyên ḿbyí a/bên ké erím-bakye efé, nkéré eyên mu o-bâ.

⁴ Wo a/chi kyibî ńkyí a/ju banet ámbe a/bên byiko eyên ké erím-bakye nyí a/chi. Ké bubwô ámbu, dyicí eyên ndyi dyi-bâ, ne nkéré eyên oo/fyi. Ké bubwô ámbu nké mm/mîng kángkáng eshê e-fát ǒ kiikuku.

⁵ Eshê nyí jwángjwáng ne nyí tíbítíbí nyi e-jwó ng ǒ ké bubwô ḿbú a*fí a-tî ng byije*.

⁶ Kángkáng banet-ashí-Ézerel ba/bángê ké busa ebe ne mbe ba-ju ng banet.

⁷ Onet o*fí ké kafâ-oshê mú mu o-fâ bonchí ne boné*. Wo amu a-ryí i bacinbánet mpún ne amu a-cít ng banyǐnkú ne bwǎn-byibén.

⁸ Wo ofê o*fí ǒ ne byikit-ociring* ne a*fí a-tî ng byije ḿbyí dyicí-ékwâbashi enen kanong*.

⁹ Banet eyên bakíri ba-sét ng byisédéng kyi-kim ne banet bakíri eringe badaju kámbé. Banet eyên bakíri mbe ba-ryí i byiryíng-byifen ḿbyí ba/chi ba-kye erím-bakye. Banet bakíri mbe ba-câ kashú ne babép ebe.

¹⁰ Banet bakíri mbe ba-rí i ne banyi-banchí ebe. Bakíri mbe ba-bam m banyinyi ḿbé mbe ne bunyinyi ba-rí ne mbé.

¹¹ Bakíri mbe ba-chi i byinam, ne bakíri mbe ba-tírîng ng banyi-bwǎn ebe ne bwǎn-bané ebe ḿbé banyinyi ḿbé ba/pap bonchí ba-bángê ba-rí ne mbé.

¹² Banet eyên bakíri mbé ba-ju ng banet eringe badakye kámbé akpuga. Bakíri mbe ba-koo ng mpún ké akpuga nyí mbé mbe ba-pwoo ng bábe-banet-Ézerel, ne mbé mbe ba-já ng esang ké ocît mú mbe ba-cít ng kámbé. Mbé baa/ráp mě. Óburúkpâbí mú mu Otu Kyítá nké o/raa.

¹³ Me n/chi n-kíbî bambam banet eyên byěm ba-koo ne banju banet eyên égbi.

¹⁴ Wo a/kabe a/fu, dyityém dyi-chî ng ǒ ekyú? a-chîkyú nang ne busa ḿbú adabêem bubwô eyên kyíbóng ké nkéré mm/man ne wo? Me Óburúkpâbí nké n/raa, ne n-chi i ńkyí n/sét.

¹⁵ Me n/chi m-pwó banet eyên byiryibyiryi ké kángkáng eshê, ne n/chi n-chi biinunut-édúú eyên byi-man.

¹⁶ Ne ké bubwô ámbu, eshê nyí áku e/chi e-cábê ǒ. Nké wo a/chi a-nyît a/fu, me n-chi i Óburúkpâbí.

Okwâ-Bure mú Osówo

¹⁷ Óburúkpâbí o-raa ne me

¹⁸ o/fu, wǎn-onet, banet-Ézerel ba*da mě ebyí chwǒm*. Mbé mbe wǎ arugirugi-biǐré nyí a/waa ké nkéré baa/ree kiǐré ńkyí badakó syílyíba ké okwâ-bure.

¹⁹ Ké bubwô ámbu kâng, me Óburúkpâbí mú mu Otu Kyítá mu n-sét ng kámbé n/fu, mbé ba*fí ké chwǒm* wǎ mbyí. Me n/chi m-bâ ne mbé kyikit kyibónge ké Jerúsélem,

²⁰ ké dyizong-bukwóp ḿbú mbe ba-fâ biǐré ké okwâ-bure. Busa-dyityém ejí bu/chi bu-nyange kámbé wǎ eringe okwâ odanyange biǐré.

²¹ Me n/chi m-bâ ne mbé kyikit kyibónge ké Jerúsélem, n-wóngê kámbé okwâ ké dyifít, busa-dyityém ejí bu-nyange kámbé.

²² N/chi n-nyange kámbé ké Jerúsélem wǎ eringe nyí mbe ba-nyange e biǐré ké okwâ-bure. Ne mbé kâng ba/chi ba-nyît ba/fu, mbé mbe ba-ri ng busa-dyityém ḿbú Óburúkpâbí.

Byibî ḿbyí Banet-Ashí-Ézerel

²³ Óburúkpâbí o/chîraa ne me

²⁴ o/fu, wǎn-onet, sét banet-Ézerel a/fu, esí ebe e*fí kanong ké bushú ejí*. Ké bubwô ámbu, me mu n-kyâ kányí busông ké busa-dyityém ejí. [

²⁵ Banet-ashí-Ézerel] mbe wǎ ekpang nyí nyi e-fém m ké enyam nyí nyǐ ee/ju. Mbé mbe ba-ju ng banet ba-koo ng kángkáng akpuga ne kángkáng byěm, ne banyǐnkú ba-firi chwóó ké bubwô-banet ebe eju.

²⁶ Banchi kyifen ejí mbe ba-bên n byije ejí ne ba*fí ne ofê kyi-kim ne ńkyí kyi/já mě*. Mbé ba*fí ba-cá ng ńkyí kyi/já mě* ne ńkyí kyi*da mě ejá*. Mbé ba*fí ba-tángê e eringe chwǒm ńkyí badaciring* kyi/yángê ne ńkyí baa*ciring* ne mbé ba*fí ba-tî ng byije ḿbyí dyicí-ékwâbashi ebe*. Ké bubwô ámbu, banet-Ézerel ba*fí ba-kyâ mě ofê*.

²⁷ Banet-bǎmkpóngé-okákárá mbe wǎ byibî-enyam nyí nyi e-páp ng enyam nyí nyǐ ee/ju. Mbé mbe ba-ju ng banet eringe badajá esang.

²⁸ Bamkpábé ḿbé badasét byiraa ejí mbe ba-cít ng byibî ḿbyín wǎ banet ḿbé mbe ba-cít ng ekpe ne mpén. Mbé mbe ba-ri ng byěm-akat ḿbyí byi*fí ké kafâ* ne mbe ba-sét ng byěm ḿbyí byi*fí ntûntû*. Mbé mbe ba-sét ng ba/fu, mbé mbe ba-raa ng byiraa ḿbyí Óburúkpâbí mú mu Otu Kyítá. Nké me Óburúkpâbí n*da/raa ne mbé*.

²⁹ Banfang-banet mbe ba-ryí i banet mpún ne mbe ba-bam m banet byěm ba-koo ng. Mbé mbe ba-tî ng banet-kyikpu ké búsangé, ne mbe ba-cít ng bacinbánet.

³⁰ Me n/kyé onet mú odaman ebi ekpe ne o-man n ebwom ké byikit ḿbyí ekpe ee/bûu o-nyii oshê eringe nyí busa-dyityém ejí boo*ba/chi bu-bên kámú*. Nké n*da/ri nang onet obónge*.

³¹ Ké bubwô ámbu, me n/chi n-twóm busa-dyityém ejí bu-kâm kámbé, ne n/chi n-ju kámbé ne okwâ ké ḿbyí mbé baa/chi. Óburúkpâbí mú mu Otu Kyítá nké o/raa.