Ezékyel 16 - Bokyi Bible

Jerúsélem mú o*da/fé Dyityém ne Osówo*

¹ Óburúkpâbí o/chîraa ne me

² o/fu, wǎn-onet, sét Jerúsélem biinunut-byěm ḿbyí nyǐ oo/chi.

³ Sét Jerúsélem ńkyí Óburúkpâbí mú mu Otu Kyítá mu o-sét ng ǎ, o/fu, wo ba/mû ba/fwon ǒ ké esí nyí Kínan. Bonchí eyên o/mû onet mú o/fím Ámon, ne boné eyên o/mû onet mú o/fím Hyítat.

⁴ Ké nkéré ba/fwon ǒ, onet mú oda ǒ ekét kákwóm, o-kôo ǒ nang omu, o-sabe ǒ nang bano, o-cít ǒ nang byídí, o/mû o*fí*.

⁵ Onet o*fí mú o/ri ǒ bafip* o-chi nang chwǒm ké bubwô eyên*. Ké nkéré ba/fwon ǒ, onet o*fí mú a/mû a-jê ng ǎ*. Wo ba/mû ba/twóp ǒ ké kyikim-dyikán.

⁶ Ne n-shwôm ányi kâng n-ri ǒ ké amu a-nyibi ng ké baróng ḿbé eyên. Baróng ba/mû ba/cít ǒ kángkáng, nké n*da ǒ emîng a-kpú*.

⁷ Me n/chi ǒ a-kán wǎ dyisín-kyichí. Wo a/kán ne busa ne butang a-firi [búsé-onyinyi.] Abî eyên a/byí kerededet, ne eji eyên ee/kán, nké wo a/mû osíndyíbang.

⁸ Ké nkéré n/chîshwôm, me n/ri n/fu, nkéré oo/fyi mú adakpet enyît kyijé, me n/kúng kyídí ejí n-cít osíndyíbang eyên, ne n/ryí ocím n/fu, n-kyâ ǒ kyijé ejí. Ké ntûntû, me n/ryí ocím n/fu, m-bé ng ǒ, ne wo a-firi mú ejí. Ńkyín nké Óburúkpâbí mú mu Otu Kyítá mu o-sét ng.

⁹ Ne n-kúng kâng omu n-soo ǒ baróng ké byiko. N-sabe ǒ bakút-ólif ké byiko.

¹⁰ Me n/nap ǒ byiko ké byídí ḿbyí byinong byinong. N-kye ǒ abe nyí ba/chi ké ekwop-enyam nyí enong enong, ne kyídí-dyishí-okpówo ne ewuryu-mbúket.

¹¹ Me n/fé ǒ byibwáng ḿbyí ké abwô ne ḿbyí ké kyitông.

¹² Me n/kye ǒ kaǎré-ozóng ne boǒré-atông ne etam-butu nyí enong enong.

¹³ Wo a/mû ne byibwáng ḿbyí gûl ne syílyíba, ne wo kángkáng nkéré a/mû a-fâ byídí ḿbyí ba/chi ké okpówo ne mbúket. Wo a/mû a-ryí i berêt mú ba/chi ké esang-byichí nyí enong enong, ne a/mû ne bakút-bukwan ne bakút-ólif ḿbé adaryí. Bunong eyên bu/mû bu-nwa ng bu-shwôm, ne wo a-firi otu-onyinyi.

¹⁴ Bunong eyên ḿbú mbu kerededet bu/chi ǒ a-firi kiǐtí-onet ké eshê kángkáng, ké nǎ, me m/mû n-chi i ǒ a-nwa éné. Ńkyín nké Óburúkpâbí mú mu Otu Kyítá mu o-sét ng.

¹⁵ Nké wo aa/kúng bunong eyên ne dyizîn eyên ńdyí dii/rêe wǎ mpât mú adarí nang ne yeě mú o/bê.

¹⁶ Wo a/kúng byídí eyên byikíri a-nap byikit eyên ḿbyí amu a-fâ erím-bakye, ne a/kúng byiko eyên a-kye nang yeě wǎ onet-akpara.

¹⁷ Wo a/kúng byibwáng-gûl ne syílyíba ḿbyí m/mû n/kye ǒ a-chi batyép-erím-bakye, a-chi byinam ne nyǐ.

¹⁸ Wo a/kúng byídí ḿbyí byinong byinong ḿbyí n/kye ǒ a-fé erím-bakye, ne a/kye kányí bakút-ólif ne burwan ḿbyí m/mû nn/kye ǒ.

¹⁹ Me n/kye ǒ byiryíng ḿbyí byinong byinong wǎ berêt ne bakút-ólif ne bakút-bukwan, nké wo a/kúng kámbyí a-kye wǎ kyifen echi eringe adakûnyîn erím-bakye. Ńkyín nké Óburúkpâbí mú mu Otu Kyítá mu o-sét ng, o/fu,

²⁰ wo a/yip kâng bwǎn eyên ḿbé banyinchéng ne ḿbé banyinyi ḿbé a/fwon mě a-kye erím-bakye ké kyifen echi. Kyi/mû kyi*da/bên kyi-kwárê ńkyí a*fí a-fâ dyityém ne me*?

²¹ ne a-bwa kâng a-kúng bwǎn ejí a-chi kyifen a-kye erím-bakye dí.

²² Ké nkéré-kiinunut-dyikpen eyên ńdyí akpara, wo a*da/zîim nang kabónge kyi-kim ne dyikpen eyên ńdyí ne bubwásíng* ké nkéré a/mû osíndyíbang a-nyibi ng ké baróng eyên*.

Dyikpen ńdyí Jerúsélem wǎ Onet-Akpara

²³ Óburúkpâbí mú mu Otu Kyítá o-raa o/fu, kyi/bên ne wo kanong kanong. Wo a/chi byibî ámbyi kángkáng,

²⁴ ne ké bukô-bukwóp nang burá, wo a/chi byikit-erím-bakye esháng a-ryí akpara.

²⁵ Wo a/bên bunong eyên ké biǐntóng. Wo a/kúng byiko eyên a-kye nang yeě mú o/bê, ne kángkáng dyicí wo a/firi onet-akpara mú o/bên o-shwôm.

²⁶ Wo a/mîng bambêp babép-barî-banet eyên ḿbé banet-Éjip ba-rí ne wo, ne a/kúng akpara eyên a-chi kafâ ka-sa mě.

²⁷ Kántîk, me nn/yip bubwô ejí kyíbóng ḿbú nda ǒ ekye busông, n-chîkoo kyicê-njware ejí ńkyí kyi/mû kyi/já ǒ. Me nn/kám ǒ n-kye banet-Fyilíta ḿbé adasa kámbé kafâ, ne babép ebép eyên mbe ba-chi i kámbé éshwân.

²⁸ Ké nǎ, banet ḿbé áku ba*da ǒ ekwárê* wo a/dim ne banet ḿbé Asyírya erí. Wo a/mû onet-akpara ebe, nké nang mbé ba*da/man echi ńkyí kyi/kwárê ǒ*.

²⁹ Wo a/mû to onet-akpara mú banet-Bábyílon, mú oshê-bancen busî. Nké nang mbé ba*da/man echi ńkyí kyi/kwárê ǒ*.

³⁰ Ńkyín nké Óburúkpâbí mú mu Otu Kyítá mu o-raa ng, o/fu, wo aa/chi ḿbyín kángkáng wǎ onet-akpara mú o*fí ne éshwân*.

³¹ Wo a/chi byikit ḿbyí adasháng bakye a-ryí akpara ké kyiká-oshê nang kyirá. Nké wo a*da/byí akpuga ekyé wǎ bánen-banet-akpara*.

³² Wo amu wǎ onyinyi mú mu o-chi i byinam ne bacinbánet o-mîng otyép emen kyijé etông.

³³ Onet-akpara ba-kyâ ǎ akpuga. Nké wo a/yárê kángkáng bákyî eyên a-kye kámbé ngu a/fu, bafím kángkáng byikit ba-ba-rí ne wo.

³⁴ Wo akpara nyí eyên nyi buko. Onet o*fí mú o/tírîng ǒ o/fu, wo akyú onet-akpara*. Ba*da ǒ ekye akpuga*. Wo nké a/kye kámbé akpuga. Ké ntûntû, wo amu buko.

Mpan mú Osówo o/pan Jerúsélem

³⁵ Kántîk kâng, ǎ Jerúsélem mú nryî akpara, jwo ńkyí Óburúkpâbí mu o-raa ng.

³⁶ Ńkyín nké Óburúkpâbí mú mu Otu Kyítá mu o-sét ng, o/fu, wo a/pii byídí eyên, a-kúng byiko eyên wǎ onet-akpara a-kye bákyî eyên ne kángkáng biinunut-erím-bakye eyên, ne wo a/ju bwǎn eyên a-chi byifen a-kye erím-bakye.

³⁷ Ké bubwô ḿbún, me n/chi m-kpaa bákyî eyên kángkáng ḿbé bada ǒ ejê ne ḿbé baa*jê ǒ* n-tî kyikit kyibónge. Me n/chi m-bâ ne mbé ba-wâng ǒ, ne m-pii ǒ byídí ké byiko m-mîng kámbé ba-ri ǒ osíndyíbang.

³⁸ Me n/chi n-két mpan o-bên ǒ ké byinam echi ne banet eju. Ne n/chi n-kye ǒ busông ḿbú adakpú bukyû ké busa-dyityém ejí.

³⁹ Me n/chi n-chi ǒ a-firi ké busa ḿbú ebe, ne mbé ba/chi ba-bú byikit eyên ḿbyí amu a-ryí i akpara a-sháng ng bakye. Mbé ba/chi ba-koo ǒ byídí ne byibwáng eyên ba-mîng ǒ osíndyíbang.

⁴⁰ Mbé ba/chi ba-tírîng dyizu-banet ba-tím ǒ aká, ne mbé ba/chi ba-két ǒ byikim byikim ne bushwám ebe.

⁴¹ Mbé ba/chi ba-shí byise eyên ba-mîng dyizu-banyinyi ba-ri busông eyên. Me n/chi n-chi ǒ a-mîng akpara eryí, n-chi ǒ to a-mîng bákyî eyên eyáré ekye.

⁴² Ne busa-dyityém ejí kâng bu/chi bu-man, n-chee dyityém. Me mm*ba/chi n-chîsa kafâ* ne orêm oo*chi mě to*.

⁴³ Wo aa/ráp eringe nyí me n/tî ǒ ké nkéré a/mû wǎsíng, ne wo aa/chi ka-sa mě ké kángkáng byěm ḿbyí wo a/chi. Ké bubwô ámbu nké n/chi ǒ a-ré dyifwá ké mbyí kángkáng. Ebóng ńkyí a/sû babép ké kángkáng biinunut-byěm ḿbyí áku ḿbyí a/chi. Óburúkpâbí mú mu Otu Kyítá nké o/raa.

Wǎn-Onyinyi o-bí ng Boné

⁴⁴ Óburúkpâbí o-raa o/fu, wo, banet ba/chi ba-tím dyitím-ekan ńdyín kyi-kim ne wo, ǎ Jerúsélem, ba/fu, wǎn-onyinyi o-bí ng boné.

⁴⁵ Wo ntûntû amu a-bí ng boné eyên kanong kanong. Otyép emen ne bwǎn emen ba/sa ǎ kafâ. Wo amu wǎ bwǎn-bané eyên ḿbé banyinyi to, ḿbé batyép ebe ne bwǎn ebe badasa kámbé kafâ. Wo ne barî-eshê eyên ba/mû ne boné mú o/mû onet-Hyítat, ne ba/mû ne bonchí mú o/mû onet-Ámon.

⁴⁶ Oshê-Samérya mú kyicê ńkyí bushûyû ne boǒshê emen nké mu ǒ okínkán-oshê. Oshê-Sódom mú kyicê ńkyí busyísen ne boǒshê emen nké mu ǒ wǎsíng-oshê.

⁴⁷ Wo kyi/mû kyi/kwárê ǒ ńkyí adakúng kyiká-bucen ebe a-leme biinunut-édúú ebe dí. Kyi*fí éné*. Ké kaǎnyín-nkéré, édúú eyên e/mû e/bên e-shwôm nyí ebe ké kángkáng byěm ḿbyí wo a/chi.

⁴⁸ Óburúkpâbí mú mu Otu Kyítá mú mu okpó o/raa o/fu, me n/sem byiko ejí n/fu, oshê-Sódom ne boǒshê emen mú mu nche eyên o*da/chi biinunut-byěm ḿbyí wo ne boǒshê eyên baa/chi*.

⁴⁹ Sódom ne boǒshê emen ba/mû ba-tông ng byiko, ké nǎ, mbé ba/mû ne byiryíng chwóó ḿbyí badaryí ne ba/mû ké bunyîn-dyityém ne byikit beem. Nké mbé ba*da/tún banet-kyikpu* ne ḿbé ba*fí ne chwǒm*.

⁵⁰ Mbé ba/mû ba-tông ng byiko ne ba/mû ba/rêe atyém ne ba/chi byěm ḿbyí mbyi byi-sa ng mě kafâ. Ké bubwô ámbu, me n/ju kámbé, wǎ eringe nyí wo amu a-nyît ng.

⁵¹ Oshê mú Samérya o*da/chi byibî byi-byí jangjang kafee ké byibî ḿbyí wo a/chi*. Wo aa/chi biinunut-byěm a-shwôm ḿbyí oshê-Samérya o*da/chi ne*. Byibî eyên mbyi byi-chi i barî-eshê eyên ba-firi wǎ ba*da/chi chwǒm* â ba/kan ǒ ne mbé*.

⁵² Kántîk, wo a-man a-koo éshwân eyên. Byibî eyên byi/bên byi-shwôm ḿbyí barî-eshê eyên ḿbyí mbyi byi-chi i kámbé ba-firi wǎ ba*da/chi chwǒm*. Kántîk, éshwân ewuri ǒ a-tû éshwân eyên, ké nǎ, wo amu a-chi i barî-eshê eyên ba-firi wǎ mbé mbe kpárám.

Ba/chi ba-bwât Eshê-Sódom ne Samérya ba-bi

⁵³ Óburúkpâbí o-raa ne Jerúsélem o/fu, me n/chi n-chi oshê-Sódom ne boǒshê emen ne oshê-Samérya ne boǒshê emen ba-chîfiri ne byěm. N/chi n-chi ǒ to a-firi ne byěm.

⁵⁴ Éshwân e/chi e-chi ǒ ne byiko eyên, ne écábé eyên e/chi e-tông barî-eshê eyên eringe ka/nwa kámbé.

⁵⁵ Mbé ba/chi ba-chîfiri ne byěm, ne ba/chi ba-bwât ǒ ne barî-eshê eyên ba-bi.

⁵⁶ Wo a/mû a*fí a-chi i ayâa kyi-kim ne Sódom ké nkéré a/mû a-tông ng byiko*?

⁵⁷ ne byibî eyên ḿbyí a/chi byi-kûbyí wááng*? Kántîk, wo a/firi wǎ Sódom. Wo a/firi chwǒm ńkyí banet-Édom ne ḿbé Fyilíta ne barî-banet eyên ḿbé amu a-sa ng kámbé kafâ badachi ayâa.

⁵⁸ Wo a-man a-ri afaníkong ké biinunut-byibî-byěm ḿbyí aa/chi. Óburúkpâbí nké oo/raa.

Ocím mú Osówo o/ryí, mú odawaa ne Banyá

⁵⁹ Óburúkpâbí mú mu Otu Kyítá mu o-sét ng o/fu, me n/chi n-chi ǒ ńkyí kyi/kwárê ne wo, ké nǎ, wo a/né ocím mú a/ryí ne me.

⁶⁰ Nké me n/chi n-tî ocím mú n/ryí ne wo ké nkéré a/mû ne bubwásíng, ne n/chi n-ryí ocím ne wo mú adawaa ne banyá.

⁶¹ Wo a/chi a-zîim édúú eyên nyí aa/chi, ne éshwân e/chi e-wuri ǒ ké nyǐ, ké nkéré a/chîkoo Samérya mú mu ǒ okínkán-oshê, ne Sódom mú mu ǒ oshê mú wǎsíng. Me n/chi m-mîng kányí e-kyú ǒ wǎ bwǎn-banyinyi eyên, nang ké ńkyín kyi/mû kyi*fí ké ocím mú n/ryí ne wo*.

⁶² Me n/chi m-bwât ocím ejí mú n/ryí ne wo, ne wo a/chi a-nyît a/fu, me n-chi i Óburúkpâbí.

⁶³ Me n/chi n-pwoo ǒ ké kángkáng byibî-byěm ḿbyí aa/chi. Nké wo a/chi a-zîim kámbyí ne éshwân e/chi e-wuri ǒ e-shwôm nyí aa*man efaa ojá*. Óburúkpâbí mú mu Otu Kyítá nké o/raa.