Ezékyel 13 - Bokyi Bible

Bamkpábé ḿbé badanîm Banet

¹ Óburúkpâbí o-raa ne me

² o/fu, wǎn-onet, sét byiraa ejí a-bîn bamkpábé ḿbé Ézerel ḿbé mbe ba-sét ng byiraa ḿbyí ebe mbé bayén. Sét kámbé a/fu, bafwôo atông ké byiraa ḿbyí Óburúkpâbí.

³ Nyín něen ńkyí Óburúkpâbí mú mu Otu Kyítá mu o-sét ng, o/fu, kyi/bên ne enyam-bamkpábé ḿbén. Mbé mbe ba-sét ng ńkyí nkyi kámbé ké dyityém ne ba*fí ba-ri ng chwǒm*.

⁴ Banet-Ézerel, bamkpábé enen ba*fí ké chwǒm* éné wǎ enyam nyí nyi e-kyú u ké biǐbwô-oshê.

⁵ Nyǐ ee*bám byikit ḿbyí ekpe ee/myii* e-bwât nang ekpe e-bi*. Eringe ebónge to nké Ézerel ee*nwa eku* ké nkéré byití byi-kú byi-bâ ké dyicí ńdyí Óburúkpâbí*.

⁶ Byěm-akat ebe ḿbyí mbe ba-ri ng byi*fí ntûntû* ne byěm ebe ḿbyí mbe ba-sét ng ba/fu, byi-chi i, byi-chi i byisédéng. Mbé mbe ba-sét ng ba/fu, mbé mbe ba-sét ng kyitwóm ejí. Nké me n*da/twóm kámbé*. Nang ké nkyi éné, mbé mbe ba-tî ng okabe ba/fu, byiraa ebe byi-chi i ntûntû.

⁷ Me mu n-sét ng kámbé n/fu, byěm-akat enen ḿbyí bamu ba-ri ng éné byi*fí ntûntû* ne byěm ḿbyí bamu ba-sét ng ba/fu, byi-chi i, byi-chi i byisédéng. Ben bamu ba-sét ng ba/fu, mbyí byi-chi i byiraa ejí. Nké me n*da/raa ne ben*.

⁸ Óburúkpâbí mú mu Otu Kyítá o-raa kâng ne mbé o/fu, byiraa enen byi*fí ké kafâ* ne byěm-akat ḿbyí bamu ba-ri ng mbyi byisédéng. Me m/bírî bunwa ne ben.

⁹ Me n-kú m-bâ běn ekye bamkpábé ḿbé mbe ba-ri ng byěm-akat ḿbyí byi*fí ké kafâ* ne ḿbé mbe ba-sét ng byěm ḿbyí byidachi, ḿbyí kaǎnínǐm. Ben baa*ba/chi ba-kyú ányi ké nkéré banet ejí badacibi ba-sét ńkyí badachi*. Baa*ba/chi ba-bún azîn enen ké azîn-banet-Ézerel*. Ben baa*ba/chi ba-chîbwa esim ké esí enen*. Ben ba/chi ba-nyît kâng ba/fu, me n-chi i Óburúkpâbí mú mu Otu Kyítá.

¹⁰ Bamkpábé ḿbén mbe ba-nîm m banet ejí ké osêt mú mbé mbe ba-sét ng ba/fu, nkyi kanong. Ké ntûntû, kyi*fí kanong*. Banet ejí baa/bi ekpe nyí aká nyí dédé, ne bamkpábé baa/sabe kányí kángkáng mpén.

¹¹ Sét bamkpábé ámbe a/fu, ekpe ebe e/chi e-myii. Me n/chi n-chi omu o-na chwóó. N/chi n-chi abíp a-róng ké nyǐ, ne afú nyí aryên a/chi a-tugi ké nyǐ.

¹² Ekpe ányi e/chi e-myii, ne banet ba/chi ba-bí běn ba/fu, ebóng kanong ńké mpén o/chi.

¹³ Kántîk, ńkyín nké Óburúkpâbí mú mu Otu Kyítá mu o-sét ng, o/fu, me n/chi n-chi ké kafâ esa ejí afú nyí aryên a-tugi, n-chi omu o-na chwóó, n-chi abíp a-róng ekpe e-bûu.

¹⁴ Me nn/sét n/fu, me m-bú u ekpe nyí ba/sabe kányí mpén m-pwó kyísí, n-sé kányí kángkáng m-mîng byikû-ekpe ḿbyí aká byi-waa kafâ dyikáá. Ekpe ányi e/chi e-myii e-ju běn kángkáng. Nang yeě kâng o/chi o-nyît o/fu, me nké mu Óburúkpâbí.

^15-16 Ekpe ne banet ḿbé ba/sabe kányí mpén ba/chi ba-ri busa ḿbú kafâ esa ejí. Me n/chi n-sét běn kâng n/fu, ekpe ne banet ḿbé ba/sabe mpén ké nyǐ, ḿbé mbe bamkpábé ḿbé ba/sét Jerúsélem ba/fu, nkyi kanong, nang ké kyi*fí kanong* bii/tánê. Óburúkpâbí mú mu Otu Kyítá nké o/raa.

Ba/sét kyi-kim ne Bansô Epé

¹⁷ Óburúkpâbí o-raa o/fu, kántîk, ǎ wǎn-onet, bírî achi a-ri banyinyi ḿbé mbe ké burwám-banet eyên, ḿbé mbe ba-só ng epé ba-sét ng byěm ḿbyí byi/chi byi-chi. Sét byiraa ejí a-bîn kámbé,

¹⁸ a-sét kámbé ńkyí Óburúkpâbí mú mu Otu Kyítá mu o-sét ng kámbé. O/fu, kii/bên kanong kanong ne ben banyinyi. Ben bamu ba-zim m nang yeě nang yeě biǐré-bakye ḿbyí badafé ké abwô ne ké ashí eringe nyí akpen nyí banet ḿbé áku adakyú ké busa ḿbú ebe. Ben bamu ba-ryuu ng ba/fu, akpen nyí banet ejí afiri ké busa ḿbú enen, ben ba-ryí mpún ké nkyí.

¹⁹ Ben bamu ba-kyâ mě edángé ké bushú-banet ejí eringe nyí badakoo boǒnyín-esang-byichí ne boǒnyín-byicê-berêt. Ben bamu ba-ju ng banet ḿbé ba/mû ba*da/kwárê ḿbé badakpú* ba-tî banet bakpó ḿbé ba/mû ba/bát ba-kpú. Ké bubwô ámbu, ben bamu ba-sét ng banet ejí byisédéng, ne mbé mbe ba-bángê e ne ben.

²⁰ Kántîk, nyín ńkyí Óburúkpâbí mú mu Otu Kyítá mu o-sét ng, o/fu, biǐré-bakye enen ḿbyí bamu ba-kan n ba/fu, bafé akpen nyí banet ké abwô enen mbyi byi-sa ng mě kafâ. Me n/chi m-pii běn kámbyí ké abwô n-chi banet ḿbé ben bamu ba-níbî ng ba-firi ké byiko ebe.

²¹ Me n/chi m-pii to byídí ḿbyí ba/bwá ké ashí enen n-chi banet ejí ba-fem ne banyá ké abwô enen. Ne ben ba/chi ba-nyît kâng ba/fu, me n-chi i Óburúkpâbí.

²² Ké byisédéng enen, ben bamu ba-chi i banet ḿbé banong, ḿbé me n*fí n-ryuu ng n/fu, n-némê e kámbé* asa a-jwâa kámbé. Ben ba*fí ba-mîng ng banet-byibî ba-mîng byibî echi* ba-nyii nang akpen ebe*.

²³ Ké bubwô ámbu kâng, byěm-akat enen eri ḿbyí byi*fí ké kafâ* ne byěm-kaǎnínǐm enen ḿbyí bamu ba-sét ng bii/man. Me mu n-nyii ng banet ejí ké abwô enen, eringe nyí ben badanyît ba/fu, me nké mu Óburúkpâbí.