Ezékyel 12 - Bokyi Bible

Ezékyel wǎ Onet mú ba/kúng ǎ ké Oshê Emen ba-dim ne Nyǐ

¹ Óburúkpâbí o-raa ne me

² o/fu, wǎn-onet, wo amu a-kyú u ne bambíri bunwa ne me. Mbé mbe ne achi, nké mbé ba*fí ba-ri ng chwǒm*. Mbé mbe ne atông, nké mbé ba*fí ba-jwo ng chwǒm* ké nǎ, mbé ba-chi i bambíri bunwa ne me.

³ Kántîk, ǎ wǎn-onet, wuri byěm eyên a-bwá ké dyiku wǎ onet mú ba/kúng ǎ ké oshê emen, a-dim ne buchú bu-kûjí. Mîng nang yeě o-ri ǒ ké nkéré a-kú a-dim m kyicê kyikíri. [Kakíri bambíri bunwa-banet ámbe ba/chi ba-ri ǒ.]

⁴ Wuri byěm eyên ké nkéré buchú bu*da/jí ne* wǎ onet mú ba/kúng ǎ ké oshê emen ba-dim ne nyǐ, eringe nyí mbé bada ǒ eri. A-mîng kámbé ba-ri ǒ a-kú a-dim m ké dyikurúku wǎ onet mú ba/kúng ǎ ba-dim ne nyǐ.

⁵ Ké nkéré ba-kú ba-tún n ǒ, rim mbwo ké ekpe-kyise eyên a-yip dyiku-byěm eyên a-shwôm ké mǔ.

⁶ Mîng kámbé ba-ri ǒ ké a-kú a-tû ng dyiku eyên, a-cen n a-câ ké kyifip ne achi cítcít, eringe nyí aa*man eri kyicê ńkyí amu a-wâa ng*. Ńkyí adachi kyi/chi kyi-kyú banet-Ézerel wǎ ekó ekuri.

⁷ Me n/chi ńkyí Óburúkpâbí o/sét mě o/fu, me nchi. Ké dyicí ándyi, me n/wuri byěm m-bwá dyiku wǎ onet mú ba/kúng ǎ ké oshê emen ba-dim ne nyǐ. Ké dyikurúku ándyi, ké nkéré kyifip kyi-kú kyi-bâ, me n/sím mbwo ké ekpe ké abwô m-byí kyíjí. Ké nkéré nang yeě nang yeě mu o-tún n achi, me n/tû dyiku-byěm ejí n-dim.

⁸ Ké orî-dyicófóróng, Óburúkpâbí o-raa ne me

⁹ o/fu, wǎn-onet, kántîk mú bambíri bunwa-banet-Ézerel ámbe ba-kú ba-bí ng ǒ ńkyí amu a-chi i,

¹⁰ sét kámbé ńkyí me Óburúkpâbí mú mu Otu Kyítá mu n-sét ng kámbé. Kyitwóm ńkyín kyi/já onet-dyishí mú mu o-níbî ng Jerúsélem, ne kyi/já kángkáng banet ḿbé mbe ba-kyú u ányi.

¹¹ Sét kámbé a/fu, ńkyí wo a/chi nkyi ekap nyí nyi e-tông ng ńkyí kyi/chi kyi-chi kámbé. Mbé baa*ba/chi ba-chîkyú ne oshê* ne ba/chi ba-firi básóng ḿbé ba/kám ké byití.

¹² Onet-dyishí mú mu o-níbî ng kámbé o/chi o-tû dyiku-byěm emen ké kyifip, o-rim ké mbwo mú ba/sím ba-tî ǎ ké ekpe. Nyǐ o/chi o-cít achi oo*nyît kyicê ńkyí mu o-wâa ng*.

¹³ Nké me n/chi m-paam kaǎsém ejí n-kám ǎ ké nké. Ne me n/chi n-kúng ǎ kâng n-dim ne nyǐ Bábyílon, ké kyikit ńkyí o/chi o-kpú, oo*ri kámú*.

¹⁴ Me n/chi m-pwó kángkáng banet-kyibám-butu emen ne bankye bacê emen ne banet ḿbé mbe ba-bám m ǎ byiryibyiryi, ne banet ba/chi ba-kûkyé kámbé ba-ju.

¹⁵ Ké nkéré mm/pwó kámbé byiryibyiryi ké eshê ekíri ne ké eshê-bacinbánet, mbé ba/chi ba-nyît ba/fu, me n-chi i Óburúkpâbí.

¹⁶ Me n/chi m-mîng boǒnyín-banet ebe bu-fem byití ne kyifang ne byirwóm, eringe nyí áku ké eshê ányi, mbé ba/chi ba-nyît eringe édúú ebe ee/bên kanong kanong, ne ba/chi ba-bángê ba/fu, me Óburúkpâbí.

Ezékyel o/tím Banê eringe kyidatông Ekap

¹⁷ Óburúkpâbí o-raa ne me

¹⁸ o/fu, wǎn-onet, tím banê ne bushî ké nkéré a-kú a-ryí i a-jwáp ng.

¹⁹ Sét eshê emúmú a/fu, nyín kyitwóm ńkyí kyi/fím ne Óburúkpâbí mú mu Otu Kyítá mu o-sét ng banet-Jerúsélem ḿbé ba/tôong ba-kyú u ké esí ebe o/fu, mbé ba/chi ba-tím banê ne bushî ké nkéré ba-kú ba-ryí i ba-jwáp ng. Ba/chi ba-bam kángkáng byěm ḿbyí mbyi ké esí ebe ba-koo, ké nǎ, nang yeě mú mu o-kyú u ányi o*fí o-tî ng byije*.

²⁰ Ba/chi ba-bên eshê nyí ee/sú ne banet kántîk, ne esí ebe e/chi e-bírî kyikim-dyikán. Ne mbé kâng ba/chi ba-nyît ba/fu, me nké mu Óburúkpâbí.

Dyitím-Ekan ńdyí dyidanyîn nang yeě, ne Kyitwóm ńkyí kii*nyîn*

²¹ Óburúkpâbí o-raa ne me

²² o/fu, wǎn-onet, ebóng ńkyí banet-Ézerel mbe ba-tím m dyitím-ekan ńdyín ba-bírî ng ba/fu, nkéré mu o-shwôm m o-câ, ne ḿbyí mbe ba-sét ng ba/fu, byi/chi byi-chi mbyi dyikáá.

²³ Kántîk, sét kámbé ńkyí me Óburúkpâbí mú mu Otu Kyítá mu n-sét ng kyi-kim ne ndyí. Me n/chi n-chi ba-mîng dyitím-ekan ándyi. Baa*tím to kándyí ké Ézerel*. Bwa a-sét kámbé a/fu, nkéré oo/fyi, ne byěm ḿbyí ba/fu, byichi, byi-kú byi-chi i ntûntû.

²⁴ Banet ḿbé Ézerel baa*ri to byěm-akat ḿbyí byi*fí ntûntû* nang bamkpábé baa*kyú to ḿbé badanîm banet*.

²⁵ Me Óburúkpâbí mú mu Otu Kyítá n/chi n-raa ne mbé, ne ńkyí n/sét n/fu, kyi/chi kyi-chi, kyi-chi i. Ádángé aa*chi to*. Ben mú bamu bambíri bunwa ne me, n/chi n-chi ké dyikpen enen ńkyí n/kuri běn ekó n/fu, me n-chi i. Óburúkpâbí mú mu Otu Kyítá o/raa o/fu, me nn/sét.

²⁶ Óburúkpâbí o-raa ne me

²⁷ o/fu, wǎn-onet, banet-Ézerel mbe ba-kabe ng ba/fu, byěm-akat eyên ḿbyí amu a-ri ng, ne ḿbyí amu a-sét ng byi/kim ne nkéré mú mu o-bâ ké kashú.

²⁸ Ké bubwô ámbu, sét kámbé a/fu, me Óburúkpâbí mú mu Otu Kyítá mu n-sét ng n/fu, nkéré ebên o*fí to*. Ńkyí me nn/sét kyi-man kyi-chi. Me Óburúkpâbí mú mu Otu Kyítá nké n/raa.