Ezékyel 11 - Bokyi Bible

Osówo o/két Mpan o-bên Jerúsélem

¹ Busun-Osówo bu/yip mě kyíbóng bu-kúng mě bu-dim ne me ké dyifyi ńdyí kiǐtí-kyise-kyifen-Osówo echi ńdyí kyicê ńkyí óbyísû mu o-byí i. Me n/ri banyinchéng bujam esim batánge ányi fáráng ké dyifyi ándyi, cibicibi ne Jazanyâ mú wǎn-Ázu, ne Pelatyâ mú wǎn-Benáya, ḿbé mbe banet-ashí-oshê.

² Osówo o-raa ne me o/fu, wǎn-onet, banyinchéng ḿbén mbe ba-nam m byibî-byěm, ne mbe ba-kyâ byibî-bacê ké oshê mún.

³ Mbé mbe ba-sét ng ba/fu, [be byi-chî ng ekpet byise ebi kántîk.] Oshê mu wǎ katí-byiryíng, ne be byimu wǎ enyam nyí nyi ké kafâ-katí ánke, ne nke ka-ku ng bě ké okwâ eshí.

⁴ Kántîk kâng, ǎ wǎn-onet, sét byiraa ejí a-bîn kámbé.

⁵ Busa ḿbú Busun-Óburúkpâbí bu-nung mě ké byiko, ne Óburúkpâbí o-sét mě o/fu, sét banet-Ézerel kyitwóm ńkyín a/fu, banet-Ézerel, me mu n-nyît ng ḿbyí bamu ba-raa ng, ne ḿbyí bamu ba-nam m.

⁶ Ben baa/ju banet ba-shwôm ké oshê mú baa/chi byiká-oshê bii/sú ne byikwóm-banet.

⁷ Ké bubwô ámbu, nyín ńkyí me Óburúkpâbí mú mu Otu Kyítá mu n-sét ng běn n/fu, oshê mún ké ntûntû o-chi i katí-byiryíng, ne enyam ńnyín e-chi i byikwóm-banet ḿbé baa/ju. Ben baa*ba/chi ba-kyú nyín*. Me n/chi n-ró běn ba-byí ké oshê mún.

⁸ Ben bamu ba-shî ng bushwám? Me n/chi m-bâ ne banet ne bushwám ba-ba-nwa ne ben.

⁹ Me n/chi n-kúng běn ba-byí ké oshê m-bwa ne ben n-kye bacinbánet. Me nn/két mpan n/fu, bakpú.

¹⁰ Ne ba/chi ba-ju běn ké byití ké oshê enen. Nang yeě kâng o/chi o-nyît o/fu, me nké mu Óburúkpâbí.

¹¹ Oshê mún oo*ba/chi o-ku běn wǎ eringe nyí katí nke ka-ku ng enyam ké okwâ eshí*. Me n/chi n-kye běn busông nang ben bamu nyá ké esí nyí Ézerel.

¹² Ben ba/chi ba-nyît ba/fu, me n-chi i Óburúkpâbí. Ba-nyît to ba/fu, ké nkéré ben ba/mû ba-tî ng byije ḿbyí eshê nyí fáráng, ben ba/mû ba-bên n byije ḿbyí ejí, baa*chi eringe nyí byi/sét*.

¹³ Ké nkéré mu n-sét ng byiraa-Osówo, Pelatyâ o/myii o-kpú. Me n/tíngê bushú kyísí n-wonge n/fu, aa*wááng* ǎ Óburúkpâbí mú mu Otu Kyítá. Wo a/chi a-ju nang yeě mú o/waa ké Ézerel dí.

Ocím mú Osówo o/ryí Banet ḿbé ba/kúng Kámbé ba-dim wǎ Básóng

¹⁴ Óburúkpâbí o-raa ne me

¹⁵ o/fu, wǎn-onet, banet ḿbé mbe ba-kyú u ké Jerúsélem mbe ba-raa ng kyi-kim ne wo ne bánen-banet-Ézerel ḿbé mbe ké oshê mú ba/kúng kámbé ba-dim ne mbé wǎ básóng. Mbé ba/fu, banet ḿbé ba/kúng kámbé ba-dim ne mbé wǎ básóng, ba/jang etíbî mú badafé Óburúkpâbí. Nyǐ oo/kye bě esí e-firi nyí eten.

¹⁶ Kántîk, sét bánen-banet ḿbé ba/kúng kámbé ba-dim ne mbé wǎ básóng a/fu, me nké n/twóm kámbé edakyú ké eshê nyí tíbítíbí m-pwó kámbé byiryibyiryi ké eshê ekíri. Nang ké nkyi éné, me n/chi n-kyú ne mbé ké kyikim-nkéré mún, ké esí nyí mbé baa/jé.

¹⁷ Ké bubwô ámbu, sét kámbé ńkyí me Óburúkpâbí mú mu Otu Kyítá mu n-sét ng. Me n/chi n-wuri kámbé ké eshê nyí m/mû m/pwó kámbé byiryibyiryi n-dim ne mbé wǎ básóng, ne n/chi m-bwa esim ne esí nyí Ézerel n-kye kámbé.

¹⁸ Ké nkéré baa/fyi, mbé bapwó kángkáng biinunut-erím-bakye nyí ba/ri.

¹⁹ Me n/chi n-kye kámbé dyityém ńdyí dyifyîfî. Me n/chi n-fîm kámbé dyityém ebe ńdyí dyi/jang erêe n-kye kámbé dyityém ńdyí badachi ńkyí mu n-sét ng.

²⁰ Ne mbé kâng ba/chi ba-tî byije ejí ne ba-chi kángkáng ḿbyí mu n-sét ng ne dyityém ebe. Mbé ba/chi ba-kyú banet ejí ne me n/chi n-kyú Osówo ebe.

²¹ Nké me n/chi n-kye banet ḿbé mbe ba-fâ biinunut-erím-bakye busông. Me n/chi n-kye kámbé busông ké ḿbyí mbé baa/chi. Me Óburúkpâbí mú mu Otu Kyítá nké n/raa.

Busan-Osówo ḿbú Ragerage bu/mîng Jerúsélem

²² Biǐnyám ámbyi byi-kpet ebyí kyíbóng, ne biǐkât-mútu byi/dim ne mbyí. Busan-Osówo mú Ézerel ḿbú ragerage bu/mû áku kyíbóng-ashí ebe.

²³ Busan-Osówo ámbu kâng bu-mîng oshê bu-dim bu-jâ ké kaku ńké nke ké kyicê-oshê ńkyí óbyísû mu o-byí i.

²⁴ Ké chwǒm-akat eri, Busun-Osówo bu/yip mě kyíbóng bu-bwa ne me esim n-kâm banet ḿbé ba/kúng kámbé ba-dim ne mbé wǎ básóng ké Bábyílon. Ne chwǒm-akat ńkyí m/mû n-ri ng kyi-rím,

²⁵ ne n-sét banet ḿbé ba/kúng kámbé ba-dim wǎ básóng kángkáng byěm ḿbyí Óburúkpâbí oo/tông mě.