Ézara 9 - Bokyi Bible

Ézara o/jwo ba/fu, Banet-Ézerel mbe ba-bé ng Banet ḿbé ba*fí Banet-Ézerel*

¹ Ké nkéré baa/chi ńkyín kángkáng, banet-ashí bakíri ḿbé banet-Ézerel ba/bê ba-ba-sét mě ba/fu, banet-Ézerel ne banchi kyifen-Osówo ne bǎmgbán-banchi kyifen-Osówo ba*fí ba-tî ng byiko ebe cát* ne banet ḿbé eshê nyí e/fárâng ne mbé* banet ḿbé Ámon ne Mówep ne Éjip ne Kínan ne Hyítat ne Périzit ne Jébus ne Ámórit. Mbé mbe ba-chi i azong-byibî-byěm abónge nyí banet ámbe mbe ba-chi i.

² Banet-Ézerel ba/mû mbe ba-bé ng banyinyi ḿbé mbe bacinbánet, ne ké bubwô ámbu, banet ḿbé mbe kanong ké bushú ḿbú Osówo baa/bên byiko ebe. Banet-ashí ne banet-bǎmkpóngé-okákárá nké ba/bên ba-shwôm.

³ Ne n/ját byídí ejí ké kiǐtí-bafip ké nkéré n/jwo ńkyín, ne m/pwát dyishí ne kyiti ejí m-byak kyísí.

⁴ Me n/kyú ányi ké bafip tete nkéré mú kyifen-dyikurúku echi o-fyi, ne kángkáng banet ḿbé ba/mû ba-shî ng ké ńkyí Osówo mú Ézerel o/fu, kyi-kim ne byibî ḿbyí banet ḿbé ba/fím Bábyílon ba-fyi ba/kpet ebê ba-kâm mě.

⁵ Ké nkéré mú kyifen-dyikurúku echi oo/fyi, me m/bûu ké kyikit ńkyí m/mû m/byak kyísí ké bafip ne bajárejáre-byídí ejí ké byiko. Me n/tím arông kyísí m-bêem abwô ejí kyíbóng ké nshwam efé n-kye Osówo Óburúkpâbí ejí.

⁶ Me n/fu, ô Osówo, me éshwân nyi e-chi i mě e-shwôm nyí ndabêem dyishí ejí ké bushú eyên. Byibî eten mbyi byi-sú u byi-nyâam m byi-shwôm ashí eten. Mbyí mbyi byi-nyâam m byi-câ wǎ bubóng.

⁷ Kyi-fím ké nkéré mú banchí eten ḿbé kpákpá tete kyi-byí kántîk, be banet eyên bii/chi byibî kanong kanong. Ké bubwô-byibî eten, be ne batu eten ne banchi kyifen-Osówo eten bii/firi ké abwô nyí batu ḿbé bacinbánet, ne ba/ju bě, ba-bam bě byěm ba-koo, ba-kám bě ba-dim ne be wǎ básóng. Baa/fé bě éshwân wǎ eringe nyí ba/tôong ba-fâ kyirún.

⁸ Ô Osówo Óburúkpâbí eten, wo aa/nwa dyityém ne be kántîk ké kaǎnyín-nkéré, ne aa/mîng bě be banet bakíri byi-fem ké búsóng byi-ba-kyú ké bunyîn-dyityém ké kyikit ńkyín ńkyí kyi/já ǒ. Wo aa/kye bě dyikpen ńdyí dyifyîfî nang ké byi/mû ké búsóng.

⁹ Be byi/mû básóng, nké wo a*da bě emîng byi-waa ké búsóng*. Wo a/chi batu ḿbé Pésha ba-bwom bě ké esim ba-kye bě busa ḿbú byidakpen byi-ca kashú byi-bwât to kiǐtí-kyise-kyifen eyên echi ńkyí ba/mû baa/bên byi-bi, byi-ri kyikit-dyirem nyín ké Júda ne Jerúsélem.

¹⁰ Ô Osówo mú eten, kántîk, be byi-sét ng ebóng ké ḿbyí bii/chi něen kángkáng. Be bii/chîné byije etî

¹¹ ḿbyí wo a/kye bamkpábé ḿbé badasét byiraa eyên, ḿbé ba/mû bǎmgbán eyên ba/kye bě. Mbé ba/sét bě ba/fu, esí nyí be byimu byi-wâa ng edakyú nyi esí-byibî, ké nǎ, banet ḿbé mbe ba-kyú u ké nyǐ baa/chi kányí e-sú ne biinunut-byěm.

¹² Ba/sét bě ba/fu, be byi*dachi byi-cibi dyibé ne banet ámbe* ne byi*dachi byi-chwáp kámbé ba-já kanong* nang bunyîn-dyityém* â be byimu byi-ryuu ng byi/fu, byi-kyú u ké bunyîn-dyityém ké esí ńnyín* ne byi-bwa ne nyǐ byi-kye bwǎn eten*.

¹³ Nang ké kángkáng byěm bii/chi bě ké busông ḿbú bubwô-byibî eten ne byibî-byěm eten echi, be byimu byi-nyît ng byi/fu, wo mú Osówo eten aa/kye bě busông ḿbú bu*da/fyi eringe nyí bu/kwárê* ne aa/bángê bě byi-kpen.

¹⁴ Be byi-cen n nǎ kâng ne byi-chîné byije eyên byi-cibi dyibé ne byibî-banet ḿbyín. Â be byi/chi éné, kafâ ka/chi ka-sa ǒ ka-shwôm ńké ada bě eju kángkáng aa*mîng onet nang obónge o-waa*.

¹⁵ Osówo Óburúkpâbí mú Ézerel, wo aa*ryí acît*. Nké wo aa/mîng bě byi-kpen. Be byimu byi-sét ng ǒ byibî eten. Be bukwóp bu*fí bě ḿbú byidabwom ké bushú eyên*.