Ézara 8 - Bokyi Bible

Banet ḿbé ba/fyi ké Bábyílon

¹ Nyín ocím-banet mú batu-ashí-byikû-banet ḿbé ba/mû ba/kúng kámbé ba-dim Bábyílon, ḿbé ba/fyi Jerúsélem ne me ké kyikû ké nkéré Otu Atazékez o/mû otu mú Pésha.

^2-14 Géshwom mú kyikû-banet ńkyí Fyinéhas, ne Dányel mú kyikû-banet ńkyí Étama, ne Hatúshi mú wǎn-Shekanyâ mú kyikû-banet ńkyí Otu Dívit, ne Zákaryâ mú kyikû-banet ńkyí Pároshi, cibicibi ne bajam-banet-kyikû-banet emen káchâtkányi esim-banet diǐkpú, ḿbé ba/mû ba/tî banwet kyi-kim ne banchí ebe ḿbé kpákpá, ne Elyehónya mú wǎn-Zéraya mú kyikû-banet ńkyí Páhat-Mówep, cibicibi ne égot-banet ebónge, ne Shekanyâ mú wǎn-Jaházel mú kyikû-banet ńkyí [Zátu,] cibicibi ne égot-banet ebónge ne bajam batánge, ne Ébet mú wǎn-Jónátan mú kyikû-banet ńkyí Ádin, cibicibi ne bajam-banet bafee esim-banet diǐkpú, ne Jesháya mú wǎn-Atalyâ mú kyikû-banet ńkyí Élam, cibicibi ne bajam-banet bachât esim-banet diǐkpú, ne Zebadyâ mú wǎn-Mákel mú kyikû-banet ńkyí Shefátya, cibicibi ne bajam-banet banyii, ne Obadyâ mú wǎn-Jéhel mú kyikû-banet ńkyí Jówap, cibicibi ne égot-banet ebónge esim-banet onyiryiká ne bachât, ne Shélomit mú wǎn-Josefyâ mú kyikû-banet ńkyí [Bányi,] cibicibi ne bajam-banet nyíryinyi, ne Zákaryâ mú wǎn-Bebyâ mú kyikû-banet ńkyí Bebyâ, cibicibi ne banet bujam esim nyíryinyi, ne Johánan mú wǎn-Hakátan mú kyikû-banet ńkyí Ázagat, cibicibi ne bajam-banet batánge esim-banet diǐkpú, ne Elyífélet ne Jwêl ne Shemáya ḿbé kyikû-banet ńkyí Adónyikam, cibicibi ne bajam-banet bachât, ḿbé mbé nké ba/fyi ńdyí ací a/chîrí, ne Otyâ ne Záku ḿbé kyikû-banet ńkyí Byígeba, cibicibi ne bajam-banet bachât esim-banet diǐkpú.

Ézara o/já Bǎmgbán-Banchi kyifen-Osówo

¹⁵ Me n/kó kángkáng burwám-banet ḿbén n/fu, bacibi ké kace ńké badakó Ahába, ne be byi/kyú ányi ké ací achât. Me n/ri n/fu, banchi kyifen-Osówo mbe kô ké burwám-banet ámbe, nké bǎmgbán-banchi kyifen-Osówo ba*fí*.

¹⁶ Me n/twóm n/fu, bakó banet-ashí ḿbén ashí kátángekányi, Elyǎza ne Áryel ne Shemáya ne Enáta ne Járip ne Enátan ne Nátan ne Zákaryâ ne Meshúlam ne bantánge byěm ashí afee, Jwârip ne Enátan.

¹⁷ Me n/twóm kámbé ba-kâm Édo mú otu-dyishí mú banet ḿbé Kasefyâ n/fu, babí ǎ ne banet emen ḿbé mbe banet-bǎmkpóngé-kiǐtí-kyise-kyifen-Osówo echi ba/fu, otwóm bě banet ḿbé badakûbángê byitwóm-Osówo ké kiǐtí-kyise-kyifen-Osówo echi.

¹⁸ Ké bubwô ḿbú ochwâp mú Osówo, mbé ba/twóm bě Sherebyâ mú mu ne bubong ne mu ḿgbán-nchi kyifen Osówo mú o/fím kyikû-banet ńkyí Mahályi, ne bwǎn emen ne bwǎn-bané emen ashí onyiryiká ne achât ba/bê ne nyǐ ké kyikû.

¹⁹ Mbé ba/twóm bě to Hashabyâ ne Jesháya ḿbé kyikû-banet ńkyí Merári ne bwǎn-bané ebe ashí bujam.

²⁰ Égot-banet-bǎmkpóngé-kiǐtí-kyise-kyifen-Osówo echi ebónge ne banet bujam ḿbé Otu Dívit ne banet-bǎmkpóngé-okákárá emen ba/mû ba/cá banchí ebe ḿbé kpákpá ba/fu, bakûchwáp bǎmgbán-banchi kyifen-Osówo. Mbé kángkáng ba/mû ba/sáng kámbé azîn kyísí.

Ézara o/kye Busa o/fu, bacíp Esong ba-fé Nshwam

²¹ Ányi ké kace-Ahába nké n/kye busa n/fu, be ashí kángkáng byicíp esong byi-bwa ne byiko eten kyísí ké bushú ḿbú Osówo eten byi-bí ǎ byi/fu, otông bě kiǐfáng ké bucen eten, o-bwom bě ké esim ne bwǎn eten ne kángkáng byěm eten.

²² Éshwân e/mû e/chi e-wuri mě â m/mû m/bí Otu Atazékez n/fu, okye mě basúja ḿbé badayú bubyî-orá, ḿbé bada bě ebám eringe nyí banet-bushwôn eten nang bará baa*nwa ne be ké bukwóp-bucen eten* ké nǎ, me m/mû n/sét ǎ n/fu, Osówo eten mu o-jware ng nang yeě mú mu o-tî ng dyityém ne nyǐ, nké o-sa ng kafâ ne o-kyâ nang yeě busông mú mu o-bírî ng ǎ esim.

²³ Ké bubwô ámbu, be byi/cíp esong byi-fé nshwam byi-kye Osówo byi/fu, obwom bě ké esim, ne nyǐ o/jwo banshwam eten.

Eyáré nyí ba/kye ké Kiǐtí-Kyise-Kyifen-Osówo echi

²⁴ Me n/cá Sherebyâ ne Hashabyâ ne banet bakíri diǐkpú ké burwám-banet-ashí-banchi kyifen-Osówo.

²⁵ Ne me n/kan gûl ne syílyíba ne byiféng ḿbyí Otu Atazékez ne banet-bacê emen ne banet-bǎmkpóngé-okákárá emen ne banet-Ézerel ba/mû ba/kye ba/fu, byijá kiǐtí-kyise-kyifen-Osówo echi, n-kye banchi kyifen-Osówo ámbe.

^26-27 Nyín něen burô-byěm ḿbyí n/kye kámbé. N/kye kámbé batôn-syílyíba ḿbé métirik bujam ne bafee, ne bajam-byiféng batánge ḿbyí ba/chi ké syílyíba ḿbyí burô emen bu/mû bajam-bakyílogaram bachât esim diǐkpú, ne égot-bakyílogaram-gûl onyiryiká ne efee, ne acáng nyí ba/chi ké gûl bujam nyí burô emen bu/mû bakyílogaram nyíryinyi, ne kyicê-acáng nyí anong afee nyí ba/chi ké borôn, nyí nyi jangjang ne acáng nyí ba/chi ké gûl.

²⁸ Me n/sét banchi kyifen-Osówo ámbe n/fu, ben ba/já Osówo Óburúkpâbí mú banchí enen ḿbé kpákpá, ne kángkáng byiféng ḿbyí ba/chi ké syílyíba ne gûl ḿbyí ba/bê ǎ ne mbyí wǎ eyáré nyí bunyîn-dyityém byi/já ǎ to.

²⁹ Tún n̂ kámbyí kanong tete ba-ribi kiǐtí-kyise-kyifen-Osówo echi. Kan n̂ kámbyí ké nkéré baa/ribi ké nfût mú banchi kyifen-Osówo ba-kye banet-ashí-banchi kyifen-Osówo ne bǎmgbán-banchi kyifen-Osówo ne banet-ashí ḿbé banet-Ézerel ké Jerúsélem.

³⁰ Ne banchi kyifen-Osówo ne bǎmgbán ebe kâng ba/koo basyílyíba ne bagûl ne byiféng ḿbyí badakúng ba-dim ne mbyí ké kiǐtí-kyise-kyifen-Osówo echi ké Jerúsélem.

Byi/fyi ké Jerúsélem

³¹ Kyi/mû ké ací diǐkpú ne afee ké mbwôp kashú-otukáku nké be byi/dim ké kace-Ahába byi-wâa Jerúsélem. Osówo eten o/mû ne be, ne o/bwom bě ké esim o*da/bángê banet-bushwôn eten ba-nwa ne be ké bucen eten*.

³² Ké nkéré be byi/ribi ké Jerúsélem, be byi/jáng ké ací achât.

³³ Ké ací anyii, be byi/ce ké kiǐtí-kyise-kyifen-Osówo echi byi-da-kan syílyíba ne gûl ne byiféng ámbyi byi-bwa ne mbyí byi-kye Mérémot mú nchi kyifen-Osówo mú wǎn-Oráya. Elyǎza mú wǎn-Fyinéhas ne bǎmgbán-banchi kyifen-Osówo bafee, Józábat mú wǎn-Jéshwa ne Nuwadyâ mú wǎn-Byínwe ba/mû ne nyǐ ké kyikû.

³⁴ Ba/pan byěm ámbyi byimúmú ne ba/kan kámbyí, ne ba/sáng kámbyí to ba-tî kyísí kerededet.

³⁵ Kángkáng banet ḿbé ba/fím Bábyílon ba-fyi ba/bê kâng ne byěm-eyáré ḿbyí badashí wǎ byifen echi ba-kye Osówo mú Ézerel. Mbé ba/kye batyép-bampong diǐkpú ne bafee ké dyishí-banet-Ézerel kángkáng ne bajam-etyítǎm banyii esim onyiryiká ne din ne bajam-bwǎn-etám-ebû bachât esim onyiryiká ne efee. Mbé ba/kye to ebúbǔu diǐkpú ne efee eringe nyí badasoo byiko ebe ké byibî. Kángkáng byitú ḿbyín ba/shí kámbyí wǎ byifen echi ba-kye Óburúkpâbí.

³⁶ Mbé to ba/kúng nwet mú Otu Atazékez o/mû o/kye kámbé ba-kye batu-ashí ne banet-bǎmkpóngé-okákárá ḿbé kyikim-esí ńkyí kyicê-kace ńké Yuférétyis ńkyí esû edaríbî, ḿbé ba/bángê kâng ne mbé ne Osówo efé ké kiǐtí-kyise-kyifen-Osówo echi.