Ézara 7 - Bokyi Bible

Ézara o/ribi ké Jerúsélem

¹ Ké nkéré aje aa/shwôm chwóó, ńdyí Otu Atazékez o/mû otu mú Pésha, onyinchéng obónge o/mû kô mú o/mû o-bángê e Ézara. Nyǐ o/kyé kyikû ńkyí banchí emen ḿbé kpákpá kyi-fím ké Éron mú o/mû otu-nchi kyifen-Osówo. Nyǐ o/kyé o-ri o/fu, Ézara o/mû wǎn mú Seráya mú o/mû wǎn mú Azaryâ. Azaryâ o/mû wǎn mú Hyíkya

² mú o/mû wǎn-Shálum. Shálum o/mû wǎn mú Zádok mú o/mû wǎn-Ahítup.

³ Ahítup o/mû wǎn mú Amaryâ mú o/mû wǎn-Azaryâ. Azaryâ o/mû wǎn-Méreyot.

⁴ Méreyot o/mû wǎn mú Zéraya mú o/mû wǎn-Óze. Óze o/mû wǎn mú Búkyi

⁵ mú o/mû wǎn-Abyíshwa. Abyíshwa o/mû wǎn mú Fyinéhas mú o/mû wǎn-Elyǎza mú wǎn-Éron.

^6-7 Ézara o/mû nkwâa nwet mú o/mû o-nyît ng Byije kanong kanong ḿbyí Osówo Óburúkpâbí mú Ézerel o/kye Músis. Otu Atazékez o/kye Ézara kángkáng byěm ḿbyí nyǐ o/bí, ké nǎ, Ézara o/mû ne njware mú Osówo Óburúkpâbí. Ké aje káchâtkányi ké butu ḿbú Otu Atazékez, Ézara o/dim ké Bábyílon o-wâa Jerúsélem ne banet-Ézerel ké kyikû, ḿbé ba/mû banchi kyifen-Osówo ne bǎmgbán-banchi kyifen-Osówo ne bankim ane ne bambâm kyise ne banet-bǎmkpóngé ḿbé kiǐtí-kyise-kyifen-Osówo echi.

^8-9 Mbé ba/dim ké Bábyílon ké mbwôp kashú-dyicí ńdyí mbwôp kashú-otukáku, ne ké ochwâp mú Osówo, mbé ba/ribi ké Jerúsélem ké mbwôp kashú-dyicí ké etukáku etánge.

¹⁰ Ézara o/mû o/tî dyikpen emen ké Byije-Óburúkpâbí ekwâa ne kámbyí etî ne ké banet-Ézerel etángê kángkáng byěm ḿbyí Byije ámbyi byi/sét.

Nwet mú Otu Atazékez o/kye Ézara

¹¹ Otu Atazékez o/kye Ézara mú nchi kyifen-Osówo ne nkwâa nwet mú mu o-nyît ng Byije ḿbyí Óburúkpâbí o/kye banet-Ézerel nwet mú o/fu,

¹² me, Otu Atazékez mú Pésha nké mu n-sáng ng n-kye Ézara mú nchi kyifen-Osówo ne nkwâa Byije ḿbyí Osówo mú kyíbóng.

¹³ Me n/kye busa n/fu, bamîng kángkáng banet-Ézerel ne banchi kyifen-Osówo ebe ne bǎmgbán-banchi kyifen-Osówo ebe ḿbé mbe ba-kyú u ké oshê ejí kángkáng, ḿbé mbe ba-ryuu ng ba/fu, mbé ba-câ Jerúsélem ne wo ké kyikû baca.

¹⁴ Me ne bankye bacê ejí ashí káchâtkányi byimu byi-twóm m ǒ byi/fu, akyé kyikû kyi-kim ne eringe nyí byěm mbyi byi-câ ké Jerúsélem ne Júda eringe adari â mbe ba-tî ng Byije ḿbyí Osówo eyên kanong kanong ḿbyí ba/fé ǒ ké abwô.

¹⁵ Kúng eyáré-gûl ne syílyíba nyí me ne bankye bacê ejí byimu byi-ryuu ng byi/fu, byi-kyâ Osówo mú Ézerel mú kiǐtí-kyise-kyifen emen echi nkyi ké Jerúsélem a-ca ne nyǐ áku.

¹⁶ Kúng to kángkáng akpuga nyí wo a/koo ké kyikim-esí kyimúmú ńkyí Bábyílon ne eyáré nyí banet-Ézerel ne banchi kyifen-Osówo ebe ba/kye ké kiǐtí-kyise-kyifen-Osówo ebe echi ké Jerúsélem.

¹⁷ Yip akpuga ńnyín a-ré batyép-bampong ne etyítǎm ne bwǎn-etám-ebû ne esang-byichí ne bato a-kye ké kyikit-kyifen echi ńkyí kiǐtí-kyise-kyifen-Osówo echi ké Jerúsélem.

¹⁸ Wo ne banet-oshê eyên ba-man n echi nang ebóng ńkyí bamu ba-ryuu ng ké akpuga nyí adawaa eringe nyí Osówo enen o/sét.

¹⁹ Áku ké Jerúsélem, a/chi a-kye Osówo kángkáng byiféng ḿbyí baa/kye ǒ ba/fu, wo achi bǎmkpóngé ké kiǐtí-kyise-kyifen-Osówo echi.

²⁰ Nang ebóng chwǒm kyikíri ńkyí kiǐtí-kyise-kyifen-Osówo echi ńkyí amu a-ryuu ng, a-man n ekoo kánkyí ké kiimbam-oshê.

²¹ Me mu n-kyâ busa n/fu, kángkáng banet-bǎmkpóngé-akpuga etî, ḿbé mbe ké kyikim-esí ńkyí kyicê-kace ńké Yuférétyis, ńkyí esû edaríbî bakye Ézara mú nchi kyifen-Osówo ne nkwâa Byije ḿbyí Osówo mú kyíbóng kángkáng byěm kerededet ḿbyí nyǐ mu o-ryuu ng,

²² kyi-byí nang égot-bakyílogaram-syílyíba onyiryiká ne efee, ne bajam-égot-bakyílogaram-esang-byichí efee esim diǐkpú, ne égot-balyíta-bato diǐkpú, ne égot-balyíta-bakút-ólif diǐkpú, ne bano ḿbé badakwárê.

²³ Wo a-man a-kám byiko eyên a-kye kángkáng byěm ḿbyí Osówo mú kyíbóng mu o-ryuu ng ké kiǐtí-kyise-kyifen emen echi eringe nyí nyǐ oo*sa kafâ ne me* nang ne banet ḿbé ba/chi ba-kyú batu ké nkéré me n*fí to*.

²⁴ Kyije kyi/fu, wo a*dachi a-koo akpuga-dyishí ne banchi kyifen-Osówo* ne bǎmgbán-banchi kyifen-Osówo* ne bankim ane* ne bambâm kyise* ne banet-bǎmkpóngé ḿbé kiǐtí-kyise-kyifen-Osówo echi* ne nang yeě mú mu ne abwô ké kiǐtí-kyise-kyifen-Osówo echi ánkyi*.

²⁵ Wo, ǎ Ézara, ké bubong eyên ḿbú Osówo eyên oo/kye ǒ, fîm banet-ashí ne bampan banet mpan ḿbé badakûtún kángkáng banet ḿbé kyikim-esí ńkyí kyicê-kace ńké Yuférétyis ńkyí esû edaríbî, ḿbé dyikpen ebe ndyi ké Byije ḿbyí Osówo eyên. A-man a-tángê nang yeě mú o*fí o-nyît ng Byije ámbyi*.

²⁶ Nang yeě mú o*fí o-chi i eringe Byije ḿbyí Osówo eyên* nang ḿbyí oshê ejí byi/sét* ba/chi ba-kye ǎ busông abeabe ḿbú bukyû ekpú nang ḿbú bada ǎ eró o-jâ oshê okíri nang ḿbú bada ǎ ekoo byěm emen nang ḿbú bada ǎ efé mgbokobá.

Ézara o/kye Osówo Akpee

²⁷ Me Ézara n/fu, kpee n̂g Osówo Óburúkpâbí mú banchí eten ḿbé kpákpá. Nyǐ oo/chi Otu Atazékez o-kú o-bángê e ekye kiǐtí-kyise-kyifen-Osówo echi ké Jerúsélem ofê ké bukwóp ḿbún.

²⁸ Ké ochwâp mú Osówo, me n/já kanong ké bushú ḿbú Otu Atazékez ne ké ḿbú bankye bacê emen ne ké ḿbú kángkáng biǐtí-banet-bǎmkpóngé-okákárá emen. Osówo Óburúkpâbí ejí oo/fé mě dyityém ne mm/man echi batu-ashí ḿbé byikû-banet ḿbyí Ézerel chwóó ba-fyi ne me ké kyikû.