Ézara 6 - Bokyi Bible

Ba/ri Busa ḿbú Otu Sárus o/mû o/kye

¹ Otu Daráyas mú Pésha o-kye busa kâng o/fu, bakyé kyikû ké banwet-butu ḿbé ba/sáng ba-tî ké Bábyílon.

² Nké kyi/mû ké oshê mú Ékabatána ké kyikim-esí ńkyí Médya nké ba/ri nwet mú ba/sáng byiraa ḿbyín ba/fu,

³ ké mbwôp kashú-dyije ńdyí butu ḿbú emen, Otu Sárus o/kye busa o/fu, babwât kiǐtí-kyise-kyifen-Osówo echi ké Jerúsélem ba-bi wǎ kyikit ńkyí badachi byifen ne eyáré eshí. Bunyâam-kiǐtí-kyise-kyifen-Osówo echi bukyú to bamyíta bujam esim káchâtkányi ne baryên emen bakyú bamyíta bujam esim káchâtkányi.

⁴ Ba/chi ba-twôom otáng-byicê-byichí obónge ké etáng-aká echât nang erá ké ekpe ebi. Ba/chi ba-fîm akpuga-butu ba-kye ké kángkáng byěm ḿbyí ba/chi ba-chi ké bǎmkpóngé ámbe.

⁵ O/fu to, bakúng byiféng ḿbyí ba/chi ké gûl ne syílyíba ḿbyí Otu Nébúkanéza o/kúng ké kiǐtí-kyise-kyifen-Osówo echi ké Jerúsélem ba-bwa ne mbyí ké bachíchí-byikit ebe ké kiǐtí-kyise-kyifen-Osówo echi ké Jerúsélem.

Otu Daráyas o/kye Busa o/fu, baca Kashú ne Bǎmkpóngé

⁶ Otu Daráyas o-sáng kâng o-twóm ejá něen o/fu, mu n-sáng ng n-kye Tatanyâ mú otu-dyishí mú kyikim-esí nyí kyicê-kace ńké Yuférétyis ńkyí esû edaríbî ne Shéta-Buzánya ne bánen-bǎmkpóngé-okákárá n/fu, *da n̂g ekim kiǐtí-kyise-kyifen-Osówo echi*.

⁷ *Da n̂g echi ba-chi byiraa kyi-kim ne bǎmkpóngé ḿbé kyise ánkyi*. Mîng n̂g otu-dyishí mú kyikim-esí ńkyí Júda ne banet-ashí-banet-Jûs ba-bwât kiǐtí-kyise-kyifen-Osówo echi, ké kyikit ńkyí kyi/mû kpákpá.

⁸ Me kántîk mu n-sét ng ké busa ejí n/fu, chwáp n̂g kámbé ké kiǐtí-kyise-kyifen-Osówo echi ebi. Fîm m̂ akpuga-dyishí nyí ba/koo ké kyikim-esí ánkyi ba-kye kerededet ké byěm-bǎmkpóngé-kiǐtí-kyise-kyifen-Osówo echi eringe nyí bǎmkpóngé ámbe baa*bwom*.

⁹ Kángkáng dyicí, *da n̂g echi ba-mîng ekye banchi kyifen-Osówo ké Jerúsélem nang ebóng nké mbé ba/sét ba/fu, mbé mbe ba-ryuu ng* nang byisu-batyép-bampong nang etám-ebû nang bwǎn-etám-ebû ḿbyí badashí wǎ eyáré ba-kye Osówo mú kyíbóng* nang esang-byichí nang bano nang bato nang bakút-ólif*.

¹⁰ Chi n̂g ńkyín eringe nyí mbé badaman echi byifen ḿbyí Osówo mú kyíbóng odakoo, ba-fé to nshwam ba-kye Osówo ba/fu, ojware mě ne bwǎn ejí ḿbé banyinchéng.

¹¹ Me mu n-chî ng enye n-kyâ busa n/fu, nang yeě nké o/né echi ńkyín, ba/chi ba-fîm kyicê-kyichí ké kyise emen ba-bwât dyishí dyibónge ba-rim ǎ kyi-sát ké byiko. Ne kyise emen kyi/chi kyi-firi kiǐbwô-kyise.

¹² Kyi/bát Osówo mú o/cá Jerúsélem o/fu, okyú kyikit ńkyí bada ǎ ekye ofê okpógê otu nang oshê orá mú o/né echi ńkyí n/sét něen, ne mu o-kan n o/fu, nyǐ o-bên n kiǐtí-kyise-kyifen-Osówo echi ńkyí nkyi ányi. Me Otu Daráyas nké nn/kye busa ḿbún. Chi n̂g kángkáng ńkyí n/sét.

Ba/jware Kiǐtí-Kyise-Kyifen-Osówo echi

¹³ Ne Tatanyâ mú otu-dyishí mú kyikim-esí ánkyi ne Shéta-Buzánya ne bábe-banet-bǎmkpóngé-okákárá kâng ba/chi kerededet wǎ eringe Otu Daráyas o/kye busa.

¹⁴ Banet-ashí-banet-Jûs ba/ce kashú kanong ne kiǐtí-kyise-kyifen-Osówo echi ebi ké busa ḿbú Hágya ne Zákaryâ ḿbé bamkpábé ḿbé badasét byiraa-Osówo ba/kye kámbé. Mbé ba/man kiǐtí-kyise-kyifen-Osówo echi wǎ eringe nyí Osówo mú Ézerel ne Otu Sárus ne Otu Daráyas ne Otu Atazékez ḿbé Pésha ba/kye busa.

¹⁵ Mbé ba/man kiǐtí-kyise-kyifen-Osówo echi ebi ké ací achât ké otukáku mú badakó Áda, ké nkéré Otu Daráyas oo/rí aje nyâchât ké butu.

¹⁶ Banet-Ézerel kâng ne banchi kyifen-Osówo ne bǎmgbán-banchi kyifen-Osówo ne kángkáng banet ḿbé áku ḿbé ba/fyi Bábyílon ba/jware kiǐtí-kyise-kyifen-Osówo echi ne bunyîn-dyityém.

¹⁷ Ké ojware ámu, mbé ba/yárê bajam-batyép-bampong batánge ne égot-etám-ebû ebónge ne égot-bwǎn-etám-ebû efee wǎ byifen echi, ne ebúbǔu diǐkpú ne efee wǎ eyáré nyí byifen echi ké byibî, ebónge ké dyishí-kyire-Ézerel nang kyirá.

¹⁸ Mbé to ba/nap banchi kyifen-Osówo ne bǎmgbán-banchi kyifen-Osówo ba-tî ké bǎmkpóngé-kiǐtí-kyise-kyifen-Osówo echi ké Jerúsélem wǎ eringe nyí ba/sét ké Nwet-Byije-Músis.

Dyijî-Kyifen ńkyí Shwôm

¹⁹ Banet ḿbé ba/fyi Bábyílon ba/chi dyijî-kyifen ńkyí Shwôm ké nkéré mbwôp kashú-otukáku mú nnyinyěng-dyije o/rí ací diǐkpú ne anyii.

²⁰ Kángkáng banchi kyifen-Osówo ne bǎmgbán ebe ba/mû baa/soo byiko ebe, ne ba/firi kpárám. Bǎmgbán-banchi kyifen-Osówo ba/ju bwǎn-etám-ebû ḿbé badachi byifen ḿbyí dyijî-kyifen ńkyí Shwôm ké dyishí ńdyí kángkáng banet ḿbé ba/fyi Bábyílon ne ńdyí banchi kyifen-Osówo ne ńdyí ebe mbé bayén.

²¹ Kángkáng banet-Ézerel ḿbé ba/fyi Bábyílon ne kángkáng banet ḿbé baa/mîng akwóp nyí banet ḿbé áku ḿbé baa*nyît Osówo* ḿbé mbe ba-kyú u ké esí nyí Ézerel ne banet ḿbé ba/bwa esim ké Osówo Óburúkpâbí mú Ézerel efé, ba/ryí byifen ámbyi.

²² Mbé ba/chi dyijî-kyifen ńkyí berêt ké ací káchâtkányi ne bunyîn-dyityém. Mbé ba/mû baa/sú ne bunyîn-dyityém, ké nǎ, Óburúkpâbí o/chi otu mú Asyírya o-kyú kanong ne mbé, ne o/chwáp kámbé ké bǎmkpóngé ebe ḿbé kiǐtí-kyise-kyifen-Osówo echi ńkyí Osówo mú Ézerel ebi.