Ézara 4 - Bokyi Bible

Ba*da/bángê ba/fu, babwât Kiǐtí-Kyise-Kyifen-Osówo echi ba-bi*

¹ Banet-bushwôn-banet-Júda ne banet-Běnjámin ba/jwo ba/fu, banet ḿbé ba/fyi Bábyílon ba-kú ba-bwât ng kiǐtí-kyise-kyifen-Osówo echi ńkyí Osówo Óburúkpâbí mú Ézerel ba-bi.

² Ké bubwô ámbu, mbé ba/dim Zerubábel ne batu-ashí-byikû-banet edari, ba-raa ba/fu, mîng n̂g bě byi-fé abwô ne ben byi-bi kiǐtí-kyise-kyifen-Osówo echi. Be byimu byi-fâ Osówo obónge mú ben bamu ba-fâ, ne be byimu byi-chi i byifen byi-kyâ ǎ kyi-fím ké nkéré mú Esahádon mú otu-Asyírya o/twóm bě o/fu, be byikyú nyín.

³ Zerubábel ne Jóshwa ne batu-ashí-byikû-banet ba-sét kámbé ba/fu, be byi*fí byi-ryuu ng byi/fu, ben chwáp n̂g bě byi-bi kiǐtí-kyise-kyifen-Osówo echi byi-tî Osówo Óburúkpâbí eten*. Be bayén byi-bi ng kánkyí wǎ eringe nyí Otu Sárus mú Pésha o/kye bě busa.

⁴ Banet kâng ḿbé ba/mû mbe ba-kyú u ké esí ányi ba/kan eringe badafé banet-Jûs bushî, ba-jwâa kámbé asa ba-mîng ebi kiǐtí-kyise-kyifen-Osówo echi.

⁵ Mbé to ba/kye banet-bǎmkpóngé-okákárá ḿbé Pésha ngu eringe nyí baa*bwom banet-Jûs ké esim*. Mbé ba/chi ńkyín ba-ca kashú tete Otu Sárus o-man butu emen ba-nung ké nkéré mú butu ḿbú Otu Daráyas.

Ba*da/bángê ba/fu, babwât Jerúsélem ba-bi*

⁶ Ké kiimkpet kyikû-butu ḿbú Otu Zérekez, banet-bushwôn-banet-Jûs ḿbé ba/mû ba-kyú u ké Júda ne ké Jerúsélem ba/bê ne byiraa ḿbyí ba/sáng ba-bât kámbé.

⁷ Ne ké nkéré butu ḿbú Otu Atazékez mú Pésha, Byishílam ne Myíteredat ne Tábyil ne burwám-banet ebe ba/sáng léta ba-kye otu. Léta ámu ba/mû ba/sáng kámú ké ejá-Aramîk, ne ba/yángê kányí ba-fé ké ejá ekíri ké nkéré ba/kó kámú.

⁸ Réhum to mú onet-dyishí ne Shímasha mú nsâng banwet-kyikim-esí ánkyi ba/sáng léta mún ba-kye Otu Atazékez kyi-kim ne Jerúsélem, ba/fu,

⁹ léta mún be Réhum mú onet-dyishí ne Shímasha mú nsâng banwet-kyikim-esí ńkyín ne banet eten ne bampan banet mpan ne kángkáng banet-bǎmkpóngé-okákárá bakíri ḿbé ba/fím Érek ne Bábyílon ne Súsa ké esí nyí Élam,

¹⁰ cibicibi ne banet bakíri ḿbé Ashubányipal mú mu kiǐtí ne busa o/fîm kámbé ké byise ebe ba-ba-kyú ké oshê-Samérya ne ké byicê byikíri ké kyikim-esí nyí kyicê-kace ńké Yuférétyis ńkyí esû edaríbî.

¹¹ Ńnyín byiraa ḿbyí mbyi ké léta ámu. Ba/fu, be bǎmgbán-Otu Atazékez ḿbé ké kyicê-kace ńké Yuférétyis ńkyí esû edaríbî nké byimu byi-sáng ng byi-kye Otu Atazékez byi/fu,

¹² be byimu byi-ryuu ng byi/fu, wo anyît ké butu eyên a/fu, banet-Jûs ḿbé ba/fím byikit eyên byikíri ba-kú ba-kyú u ké Jerúsélem, ne ba-kú ba-bwât ng kyibî-oshê ámu mú odabírî bunwa kángkáng nkéré. Mbé baa/kpet ekpe nyí edawáp oshê ebi ne ba/chi ba-man kányí abeabe.

¹³ Be byimu byi-sét ng ǒ ké butu eyên byi/fu, â ba/bwât oshê mún ba-bi, ne â ba/man ekpe nyí edawáp kámú, banet-Jûs ba/chi ba-mîng akpuga-dyishí ekye, ne akpuga-butu eyên a/chi a-shû kyísí.

¹⁴ Kántîk, ké nǎ, be byimu ké bubwô eyên, be byi*fí byi-ryuu ng byi/fu, ńkyín kyichi* ne ké bubwô ámbu, be byi/kabe

¹⁵ byi/fu, wo akye busa ba-kyé kyikû ké byěm ḿbyí banchí eyên ḿbé kpákpá ba/sáng ba-tî. Â wo a/kyé, wo a/chi a-ri a/fu, oshê mún kángkáng nkéré mu o-bírî ng bunwa, ne a/chi a-ri a/fu, kyi-fím ne karé, oshê mún oo/kye batu ne banet-ashí-eshê afaníkong. Kángkáng nkéré, banet-oshê mún baa*nwa eníbî*. Ké bubwô ḿbún nké kyi/cen ne ba-bên oshê mún.

¹⁶ Ké bubwô ámbu, be byi/bángê byi/fu, â ba/bwât oshê mún ba-bi, ne â ba/bi ekpe nyí edawáp kámú e-man, wo ké butu eyên aa*ba/chi a-chîman eníbî kyikim-esí ńkyí ké kyicê-kace ńké Yuférétyis ńkyí esû edaríbî*.

¹⁷ Otu o/twóm ejá o-faa něen o/fu, mu n-sáng ng n-ta Réhum mú onet-dyishí ne Shímasha mú nsâng banwet mú kyikim-esí ánkyi ne banet ebe ḿbé mbe ba-kyú u ké Samérya ne kyikim-esí ńkyí áku kángkáng ńkyí kyicê-kace ńké Yuférétyis ńkyí esû edaríbî kyiraa.

¹⁸ Léta mú ben ba/sáng mě ba/yángê ba-kó ké ejá ekíri ba-sét mě.

¹⁹ Me n/kye busa n/fu, bakyé kyikû, ne baa/ri ba/fu, kyi-fím ne karé, Jerúsélem oo/bírî bunwa ne byiraa ḿbyí otu odasét, ne oo/sú ne bambíri bunwa ne bancen ne afaníkong.

²⁰ Batu ḿbé mbe ne busa ba/kyú batu ányi ne baa/níbî kyikim-esí kyimúmú ńkyí kyicê-kace ńké Yuférétyis ńkyí esû edaríbî, ba-koo ng akpuga-dyishí ne akpuga akíri.

²¹ Ké bubwô ámbu, ben ba-man ba-kye busa ba/fu, banet ámbe ba-man ba-mîng ebwât oshê ba-bi tete me n-kye busa bukíri.

²² Chi ńkyín babap eringe nyí baa*ba/chi ba-chîchi kyibî kyi-kim ne byěm ḿbyí ejí*.

²³ Ńdyí ba/kó léta mún mú o/fím ne Otu Atazékez ba-sét Réhum ne Shímasha ne banet ebe, mbé ba/dim ochéé óchee ba-wâa Jerúsélem ba-da-chi banet-Jûs ké busa ba-mîng oshê ebi.

Ba/chîkpet Bǎmkpóngé ké Kiǐtí-Kyise-Kyifen-Osówo echi

²⁴ Bǎmkpóngé ḿbé ba/mîng echi ké kiǐtí-kyise-kyifen-Osówo echi ba/waa éné tete ké nnyinyěng-dyije mú Otu Daráyas o/ryí butu ké Pésha.