Ézara 3 - Bokyi Bible

Ba/chîkpet Osówo efé

¹ Ké nkéré kyi/byí etukáku káchâtkányi, banet ḿbé Ézerel kángkáng ba/bwa esim ba-firi ké eshê ebe. Mbé kángkáng kâng ba/cibi ké Jerúsélem,

² ne Jóshwa mú wǎn-Jehózádak ne bábe-banchi kyifen-Osówo, ne Zerubábel mú wǎn-Shátyel, cibicibi ne bwǎn-bané emen ba/bwât kyikit-kyifen-Osówo mú Ézerel echi ba-bi eringe mbé badaman eshí byitú-kyifen echi ké nkyí, eringe nyí ba/sáng ké Nwet-Byije-Músis mú o/mû onet mú Osówo. [

³ Nang ké] banet ḿbé ba/mû ba/fím ba-fyi ba/mû mbe ba-shî ng banet ḿbé ba/mû ba-kyú u ké esí ányi, ńdyí mbé mbe ba-fyi ng, mbé ba/bwât kyikit-kyifen-Osówo echi ba-bi, ké kyikit ńkyí kyi/mû kpákpá. Mbé kâng ba-chîkpet byitú eshí ḿbyí kyifen echi kángkáng dyicófóróng ne dyikurúku ké nkyí.

⁴ Mbé ba/chi dyijî-kyifen ńkyí boompyep ebi wǎ eringe nyí byije byi/sét. Kángkáng dyicí, mbé ba/chi byifen eringe byije byi/sét ké dyicí ándyi.

⁵ Mbé ba/kye to eyáré nyí byifen echi kángkáng nkéré ké byirim-byitú eshí ne nyí badachi kyifen ké dyijî-kyifen ńkyí otukáku mú ofyîfî, ne ké kángkáng ajî-byifen ḿbyí áku ḿbyí mbe ba-fâ Óburúkpâbí, cibicibi ne kángkáng eyáré nyí ba/kye Óburúkpâbí ké bunyîn-dyityém.

⁶ Nang ké banet ba/mû ba*da/kpet ne ebwât kiǐtí-kyise-kyifen-Osówo echi ebi* mbé ba/kpet echi byifen ba-kye Óburúkpâbí ké mbwôp kashú-dyicí, ké etukáku káchâtkányi.

Ba/kpet ebwât ebi Kiǐtí-Kyise-Kyifen-Osówo echi

⁷ Banet-Ézerel ba/kye akpuga nyí badakye banet ḿbé mbe ba-bi ng ekpe, ne ḿbé kápyínta, ne ba/kye byiryíng ne bato ne bakút-ólif ba/fu, batwóm kámbyí ké eshê nyí Táya ne Sádon, ba-yángê ba-koo byichí ḿbyí badakó séda, ḿbyí byi/fím Lebánon, ḿbyí ba/mû ba/chi ba-fím ne mbyí ké baya ḿbé Medeterényan ké Jópa ba-bâ ne mbyí. Ba/koo busa ne Otu Sárus mú Pésha ne ba-chi ḿbyín kángkáng.

⁸ Ké bubwô ámbu, mbé ba/kpet bǎmkpóngé ké nnyinyěng-otukáku mú dyije ńdyí mbé ba/fyi, ké kyikit ńkyí kiǐtí-kyise-kyifen-Osówo echi, ké Jerúsélem. Zerubábel ne Jóshwa ne kángkáng banet-oshê ebe, ḿbé banchi kyifen-Osówo ne bǎmgbán-banchi kyifen-Osówo ne kángkáng banet ḿbé baa/bwa esim ké Jerúsélem ba/cibi abwô ké bǎmkpóngé. Kángkáng bǎmgbán-banchi kyifen-Osówo ḿbé baa/rí nang aje bujam ba/tî kámbé banet-ashí-bǎmkpóngé-kiǐtí-kyise-kyifen-Osówo echi ebwât ebi.

⁹ Jéshwa mú ḿgbán-nchi kyifen-Osówo ne bwǎn emen ḿbé banyinchéng ne bwǎn-bané emen ne Kadyímyel ne bwǎn emen ḿbé banyinchéng ḿbé ba/fím kyikû-banet ńkyí [Hodabyâ] ba/cibi burwám ba-firi banet-ashí ké bǎmkpóngé ḿbé kiǐtí-kyise-kyifen-Osówo echi ebi. Bǎmgbán-banchi kyifen-Osówo ḿbé ba/fím kyikû-banet ńkyí Hénadat ba/chwáp kámbé.

¹⁰ Ké nkéré ba/kpet kyikû-ekpe ńkyí kiǐtí-kyise-kyifen-Osówo echi ebi, banchi kyifen-Osówo ba/fé byídí-ociring ebe ba-bwom ké byikit ebe ne bantán ké abwô, ne bǎmgbán-banchi kyifen-Osówo ḿbé kyikû-banet ńkyí Ásap ba/bwom ányi ne basámba. Mbé ba/kye Óburúkpâbí akpee wǎ eringe nyí ba/mû ba/sét kámbé kyi-fím ké nkéré-Otu Dívit.

¹¹ Mbé ba/kwán akpee nyí Óburúkpâbí ba-kye barî ba/fu, Óburúkpâbí o/nwa dyityém, ne kyijé emen ne Ézerel nkyi ne banyá. Nang yeě o/wonge ne busa emen kángkáng o-kpee Óburúkpâbí, ké nǎ, baa/kpet kyikû-kiǐtí-kyise-kyifen-Osówo echi.

¹² Bujê-bakínkán-banchi kyifen-Osówo ne bǎmgbán-banchi kyifen-Osówo ne batu-ashí-byikû-banet ba/mû ba/ri mbwôp kashú-kiǐtí-kyise-kyifen-Osówo echi, ne ké nkéré mbé mbe ba-ri ng ké mbe ba-fâ kyikû-ekpe ńkyí kiǐtí-kyise-kyifen-Osówo echi ńkyín, mbé ba/tii kakânkakân. Nké banet bakíri ḿbé ba/mû ányi ba/jêe ne ejá kyíbóng kyíbóng.

¹³ Onet o*fí mú odaman enyît dyiwonge ńdyí bunyîn-dyityém ne ńdyí bukyû etii* ké nǎ, kyicoge ńkyí mbé ba/mû ba-coge ng kyi/mû kyi/jê ńkyí badaman ejwo tíbítíbí.