Ézara 10 - Bokyi Bible

Okabe kyi-kim ne eringe Banet-Ézerel badamîng Abé ebé ne Banet ḿbé ba*fí Banet-Ézerel*

¹ Ké nkéré Ézara mu o-tíngê e kyísí o-fâ nshwam ké bushú-kiǐtí-kyise-kyifen-Osówo echi o-tii ng o-sét ng byibî ḿbyín, banet-Ézerel chwóó ḿbé banyinchéng ne ḿbé banyinyi ne ḿbé bwǎsíng ba/wâng ǎ ba-tii kanong kanong.

² Shekanyâ kâng mú wǎn-Jéhel mú kyikû-banet ńkyí Élam o-sét Ézara o/fu, be bii/mîng dyityém efé ne Osówo ké abé nyí byimu byi-bé ng ne banyinyi-bacinbánet. Nké nang ké nkyi éné, achi nyí be byidatî nyi kô.

³ Kántîk, byi-man byi-ryí Osówo eten ocím mú shwaneshwane byi/fu, byi-ró ng banyinyi ḿbén ne bwǎn ebe. Be byi/chi byi-chi ńkyí wo ne banet bakíri ḿbé mbe ba-tî ng Byije ḿbyí Osówo ba/sét bě ba/fu, be byichi. Be byi/chi byi-chi ńkyí Byije-Osówo mbyi byi-ryuu ng

⁴ Nyín bǎmkpóngé ḿbé wo oyén adachi. Ca kashú a-chi kánkyí. Be byimu ne wo ké kyikû.

⁵ Ézara kâng o-kpet echi banet-ashí-banchi kyifen-Osówo ne banet-ashí-bǎmgbán-banchi kyifen-Osówo ne banet-ashí ḿbé banet ḿbé áku ba-ryí ocím mú shwaneshwane ba/fu, mbé ba-chi i ńkyí Shekanyâ o/kabe.

⁶ Ézara o-dim kâng ké bushú-kiǐtí-kyise-kyifen-Osówo echi o-wâa ké nfût mú Jehohánan mú wǎn-Elyǎship [o-da-rí] aku, byiryíng o*da/ryí* nang chwǒm o*da/jwáp* ké nǎ, nyǐ o/mû mu o-tii ng bukyû ké bubwô ḿbú banet-Ézerel baa/né dyityém efé ne Osówo.

⁷ Ba/twóm ba-sét ké Jerúsélem ne Júda kángkáng ba/fu, kángkáng banet ḿbé ba/fím Bábyílon ba-fyi mbe ne ncibi ké Jerúsélem

⁸ ké busa ḿbú banet-ashí ḿbé banet-Ézerel. Â onet mú o/né ebê ne kyi-shwôm ací achât, ba/chi ba-koo byěm emen kángkáng, ne oo*ba/chi o-chîkyú onet-oshê*.

⁹ Ké ací ányi achât, ányi ké ací-otukáku bujam ké etukáku kátángekányi, kángkáng banyinchéng ḿbé mbe ba-kyú u ké oshê mú Júda ne mú Běnjámin ba/bê Jerúsélem ba-ba-cibi ké kafâ-kabám-kiǐtí-kyise-kyifen-Osówo echi. Omu o/mû o-na ng kanong kanong, ne ké bubwô ámbu ne ḿbú ncibi mú mu kiǐtí, nang yeě o/mû mu o-tím m banê.

¹⁰ Ézara o-bûu nensang o-raa ne mbé o/fu, ben baa/chi kyibî ne baa/bê ne kyibî ké Ézerel ké banyinyi-bacinbánet ḿbé bamu ba-bé ng.

¹¹ Kántîk kâng, sét n̂g Osówo Óburúkpâbí mú banchí enen ḿbé kpákpá byibî enen. Ba-chi ńkyí kyida ǎ enyîn dyityém. Pap n̂g bacinbánet ḿbé mbe ba-kyú u ké esí eten, ba-ró banyi enen ḿbé bacinbánet.

¹² Banet-Ézerel ba-faa ne ejá kyíbóng kyíbóng ba/fu, be byi-chi i nang ebóng ńkyí wo a/fu.

¹³ Nké mbé ba/nye ba-raa ba/fu, banet ba/jê ba-shwôm, ne omu mu o-na ng kanong kanong. Be bii*man ebwom něen kyíjí gbúúl*. Ńkyín *chí chwǒm ńkyí badachi ké dyicí dyibónge* nang ké ací afee* ké nǎ, be bujê chwóó byimu abwô ké kyibî ńkyín.

¹⁴ Mîng banet-ashí eten ba-waa ké Jerúsélem ba-tún achi ké kyiraa ńkyín, ne tî n̂g nkéré mú nang yeě mú mu ne onyi-ocinónet odabê ne banet-ashí ne bampan banet bampan ḿbé oshê emen. Ké bukwóp ḿbún, kafâ esa ńké Osówo ka-kim ne kyiraa ńkyín ka/chi ka-rím.

¹⁵ Onet o*fí mú o/né okabe mún* kyi-cibi ne Jónátan mú wǎn-Ásahel* ne Jazáya mú wǎn-Tyíkyíba* ḿbé Meshúlam ne Shabetyâ mú ḿgbán-nchi kyifen-Osówo ba/bángê ne mbé*.

¹⁶ Banet ámbe ba/bángê ne okabe ámu. Ké bubwô ámbu kâng, Ézara [o-fîm] banet ké burwám-banet-ashí-kyikû-banet o-sáng azîn ebe kyísí. Ké mbwôp kashú-dyicí ké etukáku diǐkpú, mbé ba/kpet kyikû ekyé,

¹⁷ ne ké nnyinyěng-etukáku echât, mbé ba/kyé kyikû kyi-kim ne kángkáng byiraa ḿbyí banyinchéng ḿbé ba/mû ne banyi-bacinbánet.

Banyinchéng ḿbé ba/mû ne Banyi ḿbé mbe Bacinbánet

¹⁸ Ńnyín něen azîn-banyinchéng ḿbé ba/mû ne banyi ḿbé ba/mû bacinbánet. Azîn-banchi kyifen-Osówo ké kyikû-banet ké kyikû-banet. Ké kyikû-banet ńkyí Jóshwa ne bwǎn-bané emen ḿbé bwǎn-Jehózádak, banyinchéng ḿbé ba/mû ne banyi ḿbé mbe bacinbánet ba/mû Masáya ne Elyǎza ne Járip ne Gedalyâ.

¹⁹ Mbé ba/ryí ocím mú badaman dyibé ne banyi ebe, ne mbé ba/yárê otyítǎm wǎ kyifen echi ké dyishí-byibî ebe.

²⁰ Ké kyikû-banet ńkyí Éma, ba/mû Hánanyi ne Zebadyâ.

²¹ Ké kyikû-banet ńkyí Hárim, ba/mû Masáya ne Elája ne Shemánya ne Jéhel ne Ozáya.

²² Ké kyikû-banet ńkyí Páshu, ba/mû Elyěnya ne Masáya ne Éshimal ne Netánel ne Józábat ne Elása.

²³ Bǎmgbán-banchi kyifen-Osówo ḿbé ba/mû ne banyi ḿbé mbe bacinbánet ba/mû Józábat ne Shímye ne Keláya, mú ba/mû ba-kó ng ǎ to Kelyíta, ne Petáya ne Júda ne Elyǎza.

²⁴ Nkim ane o/mû obónge mú odabángê Elyǎship, mú o/mû ne onyi mú mu ocinónet. Bambâm kiǐtí-kyise-kyifen-Osówo echi ḿbé ba/mû ne banyi ḿbé mbe bacinbánet ba/mû Shálum ne Télem ne Orí.

²⁵ Banet bakíri ḿbé ba/mû ne banyi ḿbé mbe bacinbánet ké kyikû-banet ńkyí Paróshi ba/mû Ramyâ ne Ezáya ne Makyíja ne Myijámin ne Elyǎza ne Makyíja ne Benáya.

²⁶ Ké kyikû-banet ńkyí Élam, ba/mû Matanyâ ne Zákaryâ ne Jéhel ne Ábidyi ne Jérémot ne Elája.

²⁷ Ké kyikû-banet ńkyí Zátu, ba/mû Elyěnya ne Elyǎship ne Matanyâ ne Jérémot ne Zábat ne Azíza.

²⁸ Ké kyikû-banet ńkyí Bebyâ, ba/mû Jehohánan ne Hanánya ne Zabyâ ne Atalyâ.

²⁹ Ké kyikû-banet ńkyí Bányi, ba/mû Meshúlam ne Máluk ne Adyâ ne Jáshup ne Shâl ne Jérémot.

³⁰ Ké kyikû-banet ńkyí Páhat-Mówep, ba/mû Ádina ne Kélal ne Benáya ne Masáya ne Matanyâ ne Bézalel ne Byínwe ne Manáse.

^31-32 Ké kyikû-banet ńkyí Hárim, ba/mû Elyǎza ne Eshíja ne Makyíja ne Shemáya ne Shímyon ne Běnjámin ne Máluk ne Shemaryâ.

³³ Ké kyikû-banet ńkyí Háshum, ba/mû Matenyâ ne Mátata ne Zábat ne Elyífélet ne Jeremyâ ne Manáse ne Shímye.

^34-37 Ké kyikû-banet ńkyí Bányi, ba/mû Madyâ ne Ámáram ne Ówel ne Benáya ne Bedyâ ne Kélúhyi ne Banyâ ne Mérémot ne Elyǎship ne Matanyâ ne Matenyâ ne Jásu.

^38-42 Ké kyikû-banet ńkyí Byínwe, ba/mû Shímye ne Shelemyâ ne Nátan ne Adyâ ne Makanadebyâ ne Shásha ne Sharyâ ne Azárel ne Shelemyâ ne Shemaryâ ne Shálum ne Amaryâ ne Josêf.

⁴³ Ké kyikû-banet ńkyí Nébo, ba/mû Jéyel ne Matyítya ne Zábat ne Zebyína ne Jadyâ ne Jówel ne Benáya. [

⁴⁴ Kángkáng banyinchéng ḿbén ba/mû ne banyi ḿbé mbe bacinbánet. Mbé ba/man abé ne mbé ne ba/ró kámbé ne bwǎn ebe.]