Ézara 1 - Bokyi Bible

Otu Sárus o/kye Busa o/fu, Banet-Jûs bafyi

¹ Ké mbwôp kashú-dyije ńdyí Otu Sárus mú Pésha o/mû otu, Óburúkpâbí o/chi ńkyí nyǐ o/sét ké ocím mú mkpábé mú odasét byiraa emen, mú odabángê Jeryimáya kyi-chi ntûntû. Nyǐ o/chi Otu Sárus o-kye busa ḿbún něen ne o-sáng kámbú o-twóm ké kángkáng byikit ḿbyí mbyi ké butu emen o/fu, bakó banet ba-jwo, o/fu,

² nyín něen busa ḿbú Otu Sárus mú Pésha o/kye. Osówo Óburúkpâbí mú kyíbóng oo/chi mě me otu mú ejíí emúmú, ne oo/kye mě busa ḿbú ndabi kiǐtí-kyise-kyifen emen echi n-tî ǎ ké Jerúsélem, ké Júda.

³ Kyi/bát Osówo okyú ne ben kángkáng mú bamu banet emen. Ben ba-man ba-ca Jerúsélem ba-da-bwât kiǐtí-kyise-kyifen echi ńkyí Óburúkpâbí mú mu Osówo mú Ézerel, mú mbe ba-fâ ǎ ké Jerúsélem ba-bi.

⁴ Â onet emen nang orá mú ba/mû ba/ró ǎ ké oshê emen mu o-ryuu ng ochwâp mú odafyi, barî-banet ebe bakye kámbé ochwâp mún. Bachwáp kámbé ne syílyíba ne gûl ne byěm ne boonyam-atû cibicibi ne eyáré nyí badakye ké kiǐtí-kyise-kyifen-Osówo echi, ké Jerúsélem.

⁵ Ne banet-ashí kâng ḿbé byikû-banet ḿbyí Júda ne Běnjámin ne banchi kyifen-Osówo ne bǎmgbán ebe ne kángkáng banet ḿbé Osówo oo/chi kyi-ta kámbé ké atyém, ba/kpá byiko ḿbyí badadim ba-da-bwât kiǐtí-kyise-kyifen-Óburúkpâbí echi, ké Jerúsélem ba-bi.

⁶ Barî-banet ebe kángkáng ba/chwáp kámbé ba-kye kámbé byěm chwóó. Ba/kye kámbé byiféng ḿbyí ba/chi ké syílyíba, ba-kye kámbé gûl ne byěm ne boonyam-atû ne byěm byikíri ḿbyí byinong ne eyáré nyí badakye ké kiǐtí-kyise-kyifen-Osówo echi.

⁷ Otu Sárus o/bwa esim ne acáng ne bammîk ḿbé Otu Nébúkanéza o/mû o/yip ké kiǐtí-kyise-kyifen-Osówo echi ké Jerúsélem o-tî kámbyí ké kyise-kyifen echi ńkyí bakye emen, o-kye kámbé.

⁸ Otu Sárus o/kúng kámbyí o-kye Myíteredat mú onet-dyishí-akpuga emen erôo, mú o/sáng kyísí o-kye Shishíbaza mú onet-dyishí-Júda. Ocím-byěm mú ba/kye o/mû něen,

^9-10 acáng nyí ba/chi ké gûl, nyí kyifen echi a/mû bujam esim diǐkpú, acáng nyí ba/chi ké syílyíba, nyí kyifen echi a/mû égot etánge, acáng akíri a/mû bujam esim kátángekányi, acáng nyí ba/chi ké gûl, nyí boǒníng a/mû bujam esim diǐkpú, acáng nyí ba/chi ké syílyíba, nyí boǒníng a/mû égot efee ne acáng diǐkpú, byiféng byikíri byi/mû égot etánge.

¹¹ Kángkáng acáng nyí ba/chi ké gûl ne syílyíba ne byěm byikíri ḿbyí Shishíbaza o/yip o-dim ne mbyí ké nkéré nyǐ ne banet ḿbé áku, ḿbé ba/mû ba/ró kámbé ké oshê ebe ba/fím Bábyílon ba-dim Jerúsélem ba/mû égot bujam esim káchâtkányi.