Esitá 8 - Bokyi Bible

Ba/sét Banet-Jûs ba/fu, babwom Bunwa

¹ Ké dyicí ándyi dyibónge, Otu Zérekez o/kye Esitá kángkáng byěm ḿbyí Háman mú onet-bushwôn-banet-Jûs. Esitá o-sét otu o/fu, nyǐ ne Moredekyâ ba/fím ne barî. Kyi-fím nkéré ámu kyi-ca kashú, ba/mîng Moredekyâ o-kûnung o-ri otu.

² Otu o-pii ókpâl mú emen mú mu ne ekap nyí emen, mú nyǐ o/mû o/kye Háman, o-bwa ne mǔ o-kye Moredekyâ. Esitá o-chi Moredekyâ onet-dyishí-byěm ḿbyí Háman.

³ Esitá kâng o-tím arông kyísí o-tii, ne o-chîraa ne otu. O-tîm otu arông o/fu, ochi eringe nyí badamîng kyibî ńkyí Háman o/mû o/nam kyi-kim ne banet-Jûs.

⁴ Otu o-nabe ochí-gûl emen o-tông Esitá, ne Esitá kâng o-bûu o-raa o/fu,

⁵ â kyi-nyîn n átá-otu, ne â me mu n-nyîn n ǒ, ne â nkyi ǒ kanong, kamgbe, kye kyije eringe baa*chi ńkyí Háman o/kye busa o/fu, baju kángkáng banet-Jûs ké kyikim-esí ńkyín*.

⁶ Me n-cíp ng kánkyí nǎ, â afaníkong ńnyín a/bê a-kâm banet ejí, ba-ju bwǎn-bané ejí.

⁷ Otu o-raa kâng ne Esitá ne Moredekyâ o/fu, ké ntûntû, me nn/shwân Háman ké ńkyí o/nam kyi-kim ne banet-Jûs, ne nn/kúng byěm emen n-kye Esitá.

⁸ Nké kyije ńkyí ba/kye ké dyizîn ńdyí otu ne ekap emen ké nkyí kii*nwa eyángê*. Â kyi/nyîn ǒ, sáng nang ebóng ńkyí kyi/nyîn ǒ a-kye banet-Jûs. Sáng nang ké dyizîn ńdyí ejí a-fé ekap nyí ejí.

⁹ Ńkyín kyi/chi ké dyicí ńdyí otukáku mú badakó Síban, mú mu ké etukáku echât â oo/rí ací bujam ne achât. Moredekyâ o-kó bansâng nwet-otu o-sét ba-sáng baléta ba-kye banet-Jûs ne banet-ashí ne batu-ashí ne biǐtí-banet-bǎmkpóngé ḿbé kángkáng bajam-byikim-eshê nyâchât esim káchâtkányi kyi-fím ké Ńdya kyi-byí ké Sudân. Ba/sáng baléta ḿbén ba-kye kyikim-oshê nang kyirá ké ejá nyí oshê ámu ne ké eringe nyí oshê ámu odasáng byěm, ne ba/kye to banet-Jûs ké ejá nyí ebe ne ké eringe nyí mbé badasáng byěm.

¹⁰ Moredekyâ o-sét ba-sáng baléta ámbe ké dyizîn ńdyí Otu Zérekez ba-fé kámbé ekap nyí otu. Banyû bubyî-orá ba-kúng baléta ámbe ba-yú ké bubyî-orá ḿbú budakwáng, ḿbú bu/fím ké kyibám-otu.

¹¹ Baléta ámbe ba/sét ba/fu, otu o/bángê o/fu, banet-Jûs ké oshê nang orá ba-man n ecibi barî ba-tóbê eringe nyí mbé badabwom bunwa ba-nyii byiko ebe. Â banet ḿbé ba/kám byiyám, ḿbé ba/fím nang nyá, ba/kye kámbé bunwa, mbé babwom ba-nwa ne mbé ba-ju kámbé, cibicibi ne banyi ebe ne bwǎn. Baju kámbé kángkáng ba-kúng byěm ebe.

¹² Kyije ńkyín kyi-kpet ng ké ochíchí-dyicí mú ba/mû ba/tî ba/fu, ba-ju ng banet-Jûs, ányi ké otukáku mú badakó Áda, mú ké etukáku diǐkpú ne efee ké nkéré oo/rí ací diǐkpú ne achât.

¹³ Ba/sét kyije ńkyín ba-chi nang yeě nang yeě ké kyikim-oshê nang kyirá o-nyît eringe nyí banet-Jûs badakpá byiko ḿbyí badasó banet-bushwôn ebe ewa ké nkéré dyicí ándyi dii/fyi.

¹⁴ Otu o-kye busa banyû bubyî-orá ba-yú bubyî-orá ḿbú otu ba-dim babap. Ba/chi to nang yeě ké Súsa o-nyît kyije ánkyi.

¹⁵ Moredekyâ o-mîng kyibám-butu. Nyǐ o/fé byidóng-butu ḿbyí kpárádádát ne bulûbulu ne ágbádá nyí ba/chi ké kyídí ńkyí shíshét ne etam-butu nyí enong enong nyí ba/chi ké gûl. Banet-Súsa kâng ba-jêe ne ejá kyíbóng kyíbóng nyí bunyîn-dyityém.

¹⁶ Kyi-kim ne banet-Jûs, atyém ebe a/shû kámbé kyísí ne ba-firi ké bunyîn-dyityém ne okabe mú mbé baa/kpógê.

¹⁷ Ké oshê nang orá ne ké kyikim-oshê nang kyirá nké ba/kó ńkyí otu o/sét, banet-Jûs ba/kyú ké dyijâng ne dyijî ne bunyîn-dyityém. Ké ntûntû, bujê-banet bakíri ba/bírî ba-firi banet-Jûs, ké nǎ, mbé ba/kpet eshî kámbé.