Esitá 6 - Bokyi Bible

Otu o/kye Moredekyâ Ofê

¹ Ké buchú ámbu bubónge, otu o*da/man erê* ké bubwô ámbu, nyǐ o/bí o/fu, babâ ne banwet-byěm esáng ḿbé kyikim-esí ńkyí kyi/já banet-Pésha ba-kó ba-sét ǎ.

² Ké kyicê ńkyí ba/kó, ba/kó to kyi-kim ne eringe nyí Moredekyâ o/sét kyi-kim ne eringe nyí Byigatána ne Teréshi, ḿbé ba/mû bǎmgbán ashí afee ḿbé ké kyibám-otu, ḿbé ba/mû ba-bám m banfût ḿbé otu ba/nam otu dyiju.

³ Otu o-bí o/fu, ebóng ofê ne eyáré ḿbyí bii/kye Moredekyâ ké ńkyí nyǐ o/chi něen. Bǎmgbán emen ba-faa ba/fu, chwǒm kyi*fí nang kyibónge ńkyí baa/chi ba-kye ǎ*.

⁴ Otu o-bí o/fu, onet-dyishí-bǎmkpóngé ejí mu nang obónge ké kyibám ejí? Háman o/mû o/nung ké kafâ-kabám-otu abeabe. Nyǐ o/mû o/bê ebasét otu o/fu, oshwân Moredekyâ ké kyikit-banet eshwân ńkyí baa/chi ba-tî.

⁵ Bǎmgbán-otu kâng ba-faa ba/fu, Háman mu nyín o-bám m o/fu, nyǐ o-ri ng ǒ. Otu o-faa o/fu, sét n̂g ǎ o-bâ ké kafâ.

⁶ Háman kâng o-nung ké kafâ, ne otu o-sét ǎ o/fu, onet mu kô mú mu n-ryuu ng n/fu, bakye ǎ ofê kanong kanong. Nchi ebóng n-kye onet ámu. Háman o-kabe ké dyityém o/fu, yeě mú otu odaryuu o/fu, bakye ǎ ofê kanong kanong kyi-cibi ne me.

^7-8 Nyǐ o-faa kâng otu o/fu, kye busa ba-bâ ne byidóng-butu ḿbyí wo oyén amu a-fâ ba-kye onyinchéng ámu. Kye busa ba-cít kabyî-orá eyên etam-butu.

⁹ A-fu kâng onet-dyishí-bǎmkpóngé eyên obónge mú kiǐtí ké burwám-biǐtí-banet o-fé onyinchéng ámu byidóng ḿbyín o-chi ǎ o-yú ké kabyî-orá o-sí ǎ o-câ ké otyém-oshê. Okûsét ké nkéré ba-kú ba-cen n ba-câ o/fu, kû n̂g eri eringe nyí otu odachi onet mú nyǐ mu o-ryuu ng o-kye ǎ ofê.

¹⁰ Otu kâng o-sét Háman o/fu, ca babap a-bâ ne byidóng ne kabyî-orá a-kye Moredekyâ mú onet-Jûs. Chi ǎ kángkáng byěm ḿbyí wo a/sét. Wo a/chi a-ri ǎ ké o/kyú me ké ocím-dyifyi-kyibám ejí.

¹¹ Háman kâng o-da-kúng byidóng ne kabyî-orá, o-fé Moredekyâ byidóng ámbyi. Moredekyâ o-yú ké kabyî-orá, ne Háman o-sí ǎ o-ca ké otyém-oshê. O-sét ng banet o-câ o/fu, ri n̂g eringe nyí otu odachi onet mú nyǐ mu o-ryuu ng o/fu, nyǐ o-kyâ ǎ ofê.

¹² Moredekyâ kâng o-bwa esim ké ocím-dyifyi-kyibám-otu, ányi Háman oo/jé ochéé óchee ké kyise emen o-tii ng o-câ ne abwô ké bushú cítcít.

¹³ O-sét onyi emen ne kángkáng bacín emen kángkáng byěm ḿbyí bii/chi ǎ. Onyi emen ne banet-bubong-bacín-Háman ámbe kâng ba-sét ǎ ba/fu, busa eyên boo/kpet eman bu-jâ bu-kâm Moredekyâ. Nyǐ o-chi i onet-Jûs ne aa*man ǎ ekpógê*. Nyǐ o-kpógê ng ǒ ké ntûntû.

¹⁴ Ké nkéré mú mbé ba/tôong ba-pem m, bǎmgbán ḿbé ké kyibám-otu ba-ribi ochéé óchee ba-ba-yip Háman o-dim dyijî ńdyí Esitá.