Esitá 4 - Bokyi Bible

Moredekyâ o/bí Ochwâp mú Esitá

¹ Ké nkéré Moredekyâ o/jwo kángkáng byěm ḿbyí bii/chi, nyǐ o/ját byídí emen ké byiko ké bafip. Ne o-fé kâng byídí-dyikán eta, o-pwó atông ké dyishí, o-cen ké oshê o-tii ng kakânkakân ne ejá kyíbóng kyíbóng

² tete o-byí ké ocím-dyifyi mú kyibám-otu. Nyǐ o*da/nung ké kafâ* ké nǎ, baa*bángê onet nang obónge mú o/fé byídí-dyikán eta o-nung*.

³ Ké byikim-eshê byimúmú ḿbyí ba/jwo kyije ńkyí otu o/kye, banet-Jûs ba/mû ba-tii ng ne ejá kyíbóng kyíbóng. Mbé ba/cíp esong ba-tii bukyû, ne bujê ebe chwóó ba/fé byídí-dyikán eta ba-rí ké atông.

⁴ Ké nkéré bǎmgbán ḿbé ba/pê kámbé ne bwǎn-banyinyi ḿbé mbe bǎmgbán-Esitá ba/sét Esitá ńkyí Moredekyâ mu o-chi i, dyityém emen dyi*da ǎ enyîn*. O-twóm byídí o/fu, bakye Moredekyâ o-fé o-mîng byídí-dyikán eta efé. Nké Moredekyâ o*da/koo kámbyí*.

⁵ Esitá o-kó kâng Hátak mú otu o/fîm ǎ o-tî wǎ ḿgbán mú Esitá, o-sét ǎ o/fu, oca o-kâm Moredekyâ o-bí ǎ ńkyí nkyi kyi-chi i, ne dyishí emen.

⁶ Hátak o-dim o-kâm Moredekyâ ké otyém-oshê ké ocím-dyifyi-kyibám-otu.

⁷ Moredekyâ o-sét ǎ kángkáng byěm ḿbyí bii/chi ǎ, ne ocím-akpuga mú Háman oo/ryí ocím o/fu, nyǐ o-fâ ké akpuga-butu â ba/ju kángkáng banet-Jûs.

⁸ Nyǐ o/kye Hátak kiǐbáá-nwet ńkyí ba/sáng kyije ánkyi ńkyí ba/kye ké Súsa, kyi/fu, baju banet-Jûs. Moredekyâ o-sét Hátak o/fu, okúng kánkyí o-da-kye Esitá o-sét ǎ eringe nyí nkyi, ne osét ǎ o-kâm otu o-da-tîm ǎ arông o-ri banet emen bafip.

⁹ Hátak o/chi éné,

¹⁰ ne Esitá o-twóm Hátak ne kyitwóm ńkyín o/fu, oda-sét Moredekyâ o/fu,

¹¹ â onet nang obónge, onyinchéng nang onyinyi, mú ba*da ǎ ekó* nké o/nung ké kafâ-kabám ńké ké kafâ ké kafâ o-ri bushú-otu, onet ámu o-man o-kpú. Kyije ńkyí ba/kye éné. Nang yeě kyi-fím ké bankye bacê-otu kyi-byí ké banet ḿbé ké byikim-eshê mbe ba-nyît ng kánkyí. Bukwóp mbu bubónge kǎnchí ḿbú onet odaman eshwôm kyije ńkyín. Â otu o/níbî ochí emen mú gûl o-nabe kámú o-tông onet, baa*ju to onet ámu*. Nké kii/byí otukáku kyi-fím ké nkéré mú o/twóm o/fu, me mbâ.

¹² Ké nkéré Moredekyâ o/jwo kyitwóm ńkyí Esitá o/twóm ba-sét ǎ,

¹³ Moredekyâ o/twóm ba-kuri Esitá ekó o/fu, *dachi a-kabe a/fu, wo amu ne ényángenyánge a-shwôm banet-Jûs ḿbé áku* ké nǎ, wo amu a-kyú u ké kyibám-otu*.

¹⁴ Â wo a/cíbî pyêp ké dyizong-nkéré mún, ochwâp o/chi o-fím ne Osówo o-kâm banet-Jûs ne mbé ba/chi ba-fem. Nké wo a/chi a-kpú, ne kyikû ńkyí bonchí eyên kii*ba/chi kyi-chîchi*. Nang ké nkyi éné, yeě mu o-nyît ng, kakíri kyi/mû ké bubwô-dyizong-nkéré mún nké kyi/chi ne ba-chi ǒ onyi-otu.

¹⁵ Esitá o-faa Moredekyâ o-sét ǎ o/fu,

¹⁶ ca a-da-kó kángkáng banet-Jûs ké Súsa ba-cibi kyikit kyibónge. Cíp n̂g esong ba-fé nshwam ba-kye mě. *Da n̂g echi ba-ryí nang chwǒm* ba-jwáp nang chwǒm* ké ací achât ne bachú bachât. Bǎmgbán ejí ḿbé bwǎn-banyinyi ne me oyén byi-kû ng echi dyizong dyibónge. Ké nkéré ńkyí ánkyi kii/man, me n/chi n-ca n-kâm otu, nang ké kyije kyi*da/bángê*. Â ńkyí n/chi m-kpú, ké nǎ, n/chi kánkyí, m-bángê e m-kpú.

¹⁷ Moredekyâ kâng o-da-chi kángkáng byěm ḿbyí Esitá o/sét ǎ o/fu, ochi.