Esitá 3 - Bokyi Bible

Háman o/nam Banet-Jûs Dyiju

¹ Ńdyí ka/chîrí, Otu Zérekez o/tín onyinchéng obónge mú odabángê Háman o-tî ǎ ké kyikit-bǎmkpóngé ńkyí o/firi otu-dyishí mú o/nye otu abwô ké esim. Háman o/mû wǎn-Hamédata mú onet-kyikû ńkyí Ágak.

² Otu o-kye busa o/fu, kángkáng banet-ashí-bǎmkpóngé emen bakûtím arông kyísí ba-tíngê kyísí ba-kye Háman. Mbé kángkáng ba/chi éné, kyi-cibi ne Moredekyâ mú o/né echi kánkyí.

³ Banet-ashí ḿbé áku ḿbé bǎmkpóngé-otu ba-bí ǎ chwǒm ńkyí kyi/chi ńkyí nyǐ o*fí o-chi i ńkyí otu o/sét*.

⁴ Ba-tírîng ǎ kángkáng dyicí ba/fu, ochi eringe nyí otu o/sét. Nké nyǐ o*da/jwo kámbé*. Nyǐ o/sét kámbé o/fu, me n-chi i onet-Jûs, ne mm*man etíngê kyísí n-fé Háman*. Ké bubwô ámbu, mbé ba/sét Háman kyi-kim ne nkyí, ba/fu, mbé ba-ri ng â Háman o/chi o-mîng Moredekyâ o-ca kashú ne édúú ányi.

⁵ Kyi/sa Háman kanong kanong ké nkéré o/ri o/fu, Moredekyâ oo*ba/chi o-tím arông o-tíngê kyísí o-fé ǎ*.

⁶ Ne ké nkéré nyǐ o/jwo ba/fu, Moredekyâ o-chi i onet-Jûs, Háman o/raa ké dyityém o/fu, nyǐ o-chi i kyi-shwôm ńkyí nyǐ odakye Moredekyâ busông kǎnchí. Nyǐ o-nam o/fu, nyǐ o-ju ng onet-Jûs nang orá ké kyikim-esí kyimúmú ńkyí kyi/já banet-Pésha.

⁷ Ké mbwôp kashú-otukáku mú badakó Nyísan, ké dyije ńdyí Otu Zérekez oo/rí aje diǐkpú ne afee ké butu, Háman o/kye busa o/fu, batwóp dyímám ńdyí ba/mû ba-kó ng kándyí Púrim, ba-nyît dyicí ne otukáku ńdyí dyi/kwárê ńdyí badachi ńkyí nyǐ o/nam. Ba-fîm dyicí ńdyí ací diǐkpú ne achât ké otukáku mú badakó Áda, ányi ké etukáku diǐkpú ne efee.

⁸ Háman o-sét kâng otu o/fu, kyikim-banet nkyi nyín pwôopwôo ké esí eyên emúmú, ne ba-ri ng kámbé nang ké kyikim-oshê nang kyirá. Mbé mbe ba-chi i édúú nyí e*fí eringe ebónge ne nyí banet ḿbé áku*. Mbé to ba*fí ba-chi i ńkyí byije eten byi/sét*. Ké bubwô ámbu, kii*chwáp ǒ ńkyí be byidamîng kámbé*.

⁹ Â kyi/nyîn ǒ, ǎ átá-otu, kye kyije a/fu, baju kámbé. Â wo a/chi éné, me m-man n ǒ eryí ocím n/fu, me n/chi m-man efé ké akpuga-otu égot-bakyílogaram syílyíba e-shwôm etánge etánge ké bajam byikit onyiryiká ne byifee.

¹⁰ Otu o-pii ókpâl emen mú badakúng ba-nye ké byije ne byi-firi byije-oshê o-kye Háman, mú onet-bushwôn-banet-Jûs.

¹¹ Otu o-sét ǎ o/fu, banet ámbe ne akpuga ebe mbyi ké abwô eyên. Chi ńkyí kyi/nyîn ǒ ne mbé.

¹² Ké bubwô ámbu, ké ací diǐkpú ne achât nyí mbwôp kashú-otukáku, Háman o/kó bansâng banwet-otu o-kó kyije ánkyi o/fu, basáng kánkyí ké ejá-oshê nang orá ne ké bubwô-nwet ḿbú mbe ba-sáng ng ké kyikim-esí ńkyí kyi/já banet-Pésha nang kyirá ba-twóm ba-kye kángkáng banet-ashí ne batu-ashí ne biǐtí-banet-bǎmkpóngé. Ba/sáng ba-kye ké dyizîn ńdyí Otu Zérekez ba-nye kánkyí ne ókpâl emen.

¹³ Banzónge ochéé ba-kúng kyije ńkyín ba-ca ne nkyí ké kyikim-oshê nang kyirá ké esí nyí e/já banet-Pésha. Kyije ánkyi kyi/fu, ké dyicí dyibónge, ké ací diǐkpú ne achât nyí otukáku mú Áda, baju kángkáng banet-Jûs, byisat ne bakâa, banyinyi ne bwǎsíng. Baju kámbé ba*dachi ba-ri kámbé bafip* ne bakoo byěm ebe.

¹⁴ Byěm ḿbyí ba/sáng ké kyije ánkyi ba/tî kámbyí wááng ké kyikim-oshê nang kyirá eringe nyí nang yeě odakpá byiko ké nkéré-dyicí ándyi dii/fyi.

¹⁵ Ké busa ḿbú otu, ba/sét kyije ánkyi wááng ké dyityém-oshê mú Súsa, ne banzónge ochéé ba/kúng bǎmpém ámbe ba-byí ké byikim-eshê. Otu ne Háman ba/kyú me ba-jwáp bato, ké nkéré oshê mú Súsa o/firi yógeyóge.