Esitá 1 - Bokyi Bible

Báshítyi mú Onyi-Otu o/né echi ńkyí Otu Zérekez o/sét

^1-2 Otu Zérekez o/kyú ké kakyúng-butu emen ké oshê mú badakó Súsa, mú dyityém-oshê-Pésha, wǎ otu mú bajam-byikim-esí nyâchât esim káchâtkányi, kyi-fím ké Ńdya tete kyi-byí Sudân.

³ Ké nkéré oo/rí aje achât ké butu emen, nyǐ o/chi dyijî o-kye banet-ashí-bǎmkpóngé emen. Bannwa byití ḿbé Pésha ne Médya ba/mû to ké dyijî ándyi cibicibi ne batu-ashí ne biǐtí-banet ḿbé byikim-esí ámbyi.

⁴ Ké etukáku jangjang nyâchât, nyǐ o/tông kángkáng esang ne bunong ḿbyí kiǐtí-kyibám-butu emen.

⁵ Ké nkéré ńkyí ányi kii/shwôm, Otu Zérekez o/chi dyijî o-kye kángkáng banyinchéng ḿbé ké dyityém-oshê mú badakó Súsa, cibicibi ne banet-esang ne ḿbé kyikpu. Dyijî ándyi dyi/rí kyipyán gbât, ne ba/tî kándyí ké kafâ-kabám-otu.

⁶ Ba/nap kafâ-kabám ánke ne byídí-ékpígí ḿbyí mbyi bulûbulu ne ḿbyí kpárádádát, ḿbyí ba/kúng erí nyí ba/chi ké kyídí ńkyí shíshét ba-bwá ké ékpâl-syílyíba nyí ké byikwap ḿbyí ba/chi ké aká nyí badakó mábel. Ba/tî byichí-bukyúng ḿbyí ba/chi ké gûl ne syílyíba ké kafâ-kabám ńké ba/fé aká nyí adashwane kasî, nyí kpárádádát nyí badakó mábel ne pâl ne nyí shíshét nyí badakó fétasapa ne nyí bulûbulu nyí badakó túkos.

⁷ Ba/fé bato ba-kye banet ké bammîk ḿbé ba/chi ké gûl. Mmîk o*fí nang obónge mú o/bí orî*. Ne otu o/mû o-kyâ kángkáng banet bato emen. [

⁸ Bato ejwáp ba/mû ba*fí ne bunyerenyere* ké nǎ, otu o/mû oo/kye bǎmgbán-kyibám-butu emen busa o/fu, nang yeě nang yeě ojwáp eringe nyí mu o-ryuu ng.]

⁹ Ké nkéré ámu to, onyi-otu mú mbwôp kashú mú odabángê Báshítyi o/mû o-chi i ḿbé banyinyi dyijî.

¹⁰ Ké nkéré mú dyijî ńdyí otu dii/rí ací káchâtkányi, otu o/mû o-jwáp ng bato o-jêe ng. Ké bubwô ámbu, nyǐ o/kó bǎmgbán ḿbé ba/pê kámbé ashí káchâtkányi, ḿbé ba/mû bǎmgbán emen nyǐ oyén. Bǎmgbán ámbe ba/mû ba-bángê e Mehúman ne Byízáta ne Hábóna ne Byígáta ne Abagáta ne Zéta ne Kákas.

¹¹ Nyǐ o/kye kámbé busa o/fu, babâ ne Báshítyi mú onyi emen ne etam-butu emen cítcít ké dyishí. Otu-onyinyi mún o/mû o-nwa ng bunong, ne otu o/mû mu o-ryuu ng o/fu, nyǐ o-tông ng banet-ashí-bǎmkpóngé emen ne kángkáng bacinbánet emen bunong ḿbú onyi emen.

¹² Nké ké nkéré bǎmgbán ámbe ba/sét onyi-otu ńkyí otu o/sét, nyǐ o/né ece. Ńkyín kyi/chi kafâ ka-sa otu kanong kanong.

¹³ Kyi/mû édúú nyí otu odabí banet okabe mú onong kyi-kim ne byije ḿbyí oshê. Ké bubwô ámbu, nyǐ o/kó bankye bacê emen ḿbé badanyît ńkyí kyidachi.

¹⁴ Banet ḿbé nyǐ odafwam ebí bacê ba/mû Kashéna ne Shéta ne Adamáta ne Tashíshí ne Méres ne Maséna ne Memúkan. Banet-ashí-bǎmkpóngé ḿbén ashí káchâtkányi ba/mû ne busa ba-shwôm nang yeě ké oshê ámu.

¹⁵ Nyǐ o/sét kámbé o/fu, me Otu Zérekez n/twóm bǎmgbán ejí n/fu, bada-kó Báshítyi mú onyi ejí o-bâ. Nyǐ o/né ebê. Kyije kyi/fu, be byichi ǎ nǎ.

¹⁶ Memúkan o-faa kâng otu ne banet-ashí-bǎmkpóngé emen o/fu, Báshítyi mú onyi-otu o*da/dángê otu nké nke* nké oo/dángê to banet-ashí-bǎmkpóngé-otu. Ké ntûntû, oo/dángê onyinchéng nang orá ké kyikim-esí ńkyí kyi/já bě.

¹⁷ Onyinyi nang orá ké kyikim-esí ńkyín o-kpet ng etún otyép fúú â o-jwo ng o-bâ ńkyí onyi-otu oo/chi. Mbé ba/chi ba-raa ba/fu, Otu Zérekez o/kye busa o/fu, Báshítyi mú onyi emen obâ o-kâm ǎ, nké nyǐ o/né.

¹⁸ Ké nkéré mú banyi ḿbé banet-ashí-bǎmkpóngé-otu ḿbé Pésha ne Médya ba/chi ba-jwo kyi-kim ne édúú nyí onyi-otu, mbé ba/chi ba-kûsét batyép ebe kyi-kim ne nkyí ne dyicí dyi-kûshwôm. Banyi ké kángkáng byikit baa*ba/chi ba-chîkye batyép ebe ofê* ne batyép ba/chi ba-kûsa kafâ ne banyi ebe.

¹⁹ Â kyi/nyîn ǒ, ǎ átá-otu, kye busa ba-je ba/fu, Báshítyi mú onyi eyên o*dachi o-chîbwom ké bushú-otu*. Kye busa ba-sáng kánkyí ké byije ḿbyí Pésha ne Médya eringe nyí kii*nwa to eyángê*. A-kúng kâng kyikit emen wǎ onyi-otu a-kye onyinyi okíri mú mu kanong o-shwôm.

²⁰ Ké nkéré kyiraa ńkyí a/je něen kii/ta kángkáng byikit ḿbyí kiimbâng-kyikim-esí ńkyín, onyinyi nang orá o/chi o-kûkye otyép emen ofê kanong kanong, nang otyép emen mu nfang-onet nang mu onet-kyikpu.

²¹ Okabe mún o/nyîn otu ne banet-ashí emen, ne otu o/chi ńkyí Memúkan o/kabe.

²² Ké kyikim-oshê nang kyirá, nyǐ o/twóm kyitwóm ké ejá-oshê ámu ne eringe nyí oshê ámu badasáng byěm kyísí [o/fu,] otyép nang orá okyú onet-dyishí-kyibám ńkyí emen ne nyǐ nké mu ne busa ḿbú odasét ne kyi-man.