Émos 8 - Bokyi Bible

Akat nyí Kaakye-Byirim-Byichí

¹ Óburúkpâbí mú mu Otu Kyítá o-chî mě etông akat akíri. Ké akat ányi, n/ri kaakye ne byirim-byichí ḿbyí bii/bwam ké kafâ.

² Óburúkpâbí o-bí mě o/fu, Émos, wo a/ri ebóng. Me n-faa n/fu, n/ri kaakye ne byirim-byichí ḿbyí bii/bwam ké kafâ. Óburúkpâbí o-sét mě o/fu, nkuli kyikû mú banet ejí ḿbé Ézerel oo/fyi. Mm*ba/chi n-chîyángê dyityém ejí kyi-kim ne busông ḿbú n/fu, n-kyâ kámbé*.

³ Ké dyicí ándyi, ekwan nyí mbe ba-kwán n ké [kyibám-butu] e/chi e-bírî e-firi bukyû ḿbú dyikán eta. Byikwóm-banet byi/chi byi-firi ké kángkáng byikit. Ba-yip ng kámbyí [ba-twóp ng pyêppyêp.]

Afaníkong nyí Ézerel

⁴ Fwôo n̂g atông ba-jwo ńkyín, ben banet ḿbé bamu ba-cít ng banet ḿbé ba*fí ne chwǒm* ba-kan n to ba/fu, ba-ju ng banet-byikpu ḿbé mbe ké oshê.

⁵ Ben bamu ba-sét ng byiko enen ba/fu, be bii*man ebám tete dyijî-kyifen kyi-shwôm ne byi-shee esang-byichí eten*. Ékwâbashi e-man n nkéré orá, eringe nyí byidachîkpet byěm eshee. Nkéré ámu nké byidafé kasî ké byěm, byi-yángê byiféng ḿbyí byimu byi-kan n byěm byi-shee ng, byi-yángê to érúmá eringe nyí byidaryí banet ḿbé mbe ba-ré ng byěm ne be mpún.

⁶ Byi-man n eshee esang-byichí nyí ee*nwa* ké ocím-kasî mú kyíbóng kyíbóng. Byi/chi byi-ri onet-kyikpu mú oo*man eré dyifwá emen* mú oo*man eré nang abe* ne byi/chi byi-ré ǎ wǎ ósóng.

⁷ Óburúkpâbí mú mu Osówo mú Ézerel oo/sem dyizîn emen o/fu, me mm*ba/chi n-ráp byibî-byěm ebe ḿbyí mbe ba-chi i*.

⁸ Ne ké bubwô ámbu, esí e/chi e-náng, ne nang yeě nang yeě mú mu ké esí ńnyín o/chi o-firi ké bafip. N/chi n-náng oshê omúmú, o-yú kyíbóng o-shû kyísí wǎ kace ńké Nâl.

⁹ Nkéré mu o-bâ mú n/chi n-chi óbyísû o-ríbî ne busun mánmán, buchú bu-jí ne esû. Me Óburúkpâbí mú mu Otu Kyítá nké n/raa.

¹⁰ N/chi n-yángê ajî-byifen enen ne ekwan enen nyí bunyîn-dyityém byi-bírî bukyû etii. N/chi n-chi běn ba-pwát ashí enen, ba-bwá byídí-dyikán eta, ne ben ba/chi ba-firi wǎ bonchí ne boné ḿbé mbe ba-ta ng dyikán ńdyí kaancen-wǎn ebe mú o/kpú. Dyicí ándyi dyi/chi dyi-ruu banet wǎ buruu tete dyi-ribi ké nkuli kyikû.

¹¹ Nkéré mu o-bâ mú n/chi n-twóm esong e-bâ ké oshê. Esong e/chi e-nwa banet, nké ee*ba/chi e-kyú nyí byiryíng*. Omu o/chi o-kûjê kámbé, nké kyijé ánkyi *chí ńkyí omu oyén*. Esong ne kyijé-omu ńkyí kyitwóm ńkyí Óburúkpâbí nké byi/chi byi-kûnwa kámbé. Me Óburúkpâbí mú mu Otu Kyítá nké n/raa.

¹² Banet ba/chi ba-kûyêe ba-fím m bushûyû ba-ribi ng busyísen, ba-fím m kyicê ńkyí esû nyi e-byí i ba-ribi ng ké ńkyí nyi e-ríbî ng. Mbé ba/chi ba-kyé kyikit ńkyí kyitwóm ńkyí Óburúkpâbí nkyi ké kángkáng byikit, nké baa*ba/chi ba-ri kánkyí*.

¹³ Ké dyicí ándyi, nang byisat ne ásé ḿbé ba*fí ba-rwôm m* ba/chi ba-myii ké kyijé-omu.

¹⁴ Banet ḿbé mbe ba-ryí i ocím ba-sem m erím-bakye nyí ké Samérya ba-raa ng ba/fu, ké dyizîn ńdyí orím-bukye mú Dǎn, ne ké dyizîn ńdyí orím-bukye mú Byíshíba, banet ámbe ba/chi ba-myii baa*bûu to*.