Émos 7 - Bokyi Bible

Akat nyí Agurubí

¹ Óburúkpâbí mú mu Otu Kyítá o/tông mě akat. Ké akat ányi, me n/ri ké Óburúkpâbí o/chi dyibóng-agurubí dyi-byí ké nkéré mú mbe ba-két ng biǐbyâa ba-bâ, ḿbyí badakye byitú ḿbyí otu, ne biǐbyâa ámbyi byi/mû bii/kpet byíkíbi byikíri etím.

² Ké akat ejí ányi, me n/ri ké agurubí ányi a/ryí kángkáng biǐbyâa ḿbyí byikpó ḿbyí mbyi ké esí ányi. Ne me kâng n/fu, Óburúkpâbí mú mu Otu Kyítá, pwoo banet eyên. Mbé ba-cen n nǎ ne ba-kpen. Mbé ba/tôong degedege.

³ Óburúkpâbí o/yángê dyityém kâng, ne o-raa o/fu, ńkyí wo a/ri kii*ba/chi kyi-chi*.

Akat nyí Okwâ

⁴ Óburúkpâbí mú mu Otu Kyítá o-chî mě etông akat akíri. Ké akat ányi, me n/ri ǎ ké mu o-kpá ng byiko ḿbyí odakye banet emen busông ḿbú okwâ. Okwâ ámu o/shí kiǐtí-baya ḿbé ké kafâ-esí, o-kpet eshí esí.

⁵ Me n-raa kâng n/fu, mîng, ǎ Óburúkpâbí mú mu Otu Kyítá. Banet eyên ba-cen n nǎ ne ba-kpen. Mbé ba/tôong degedege.

⁶ Óburúkpâbí o-chîyángê dyityém emen kâng, ne o-raa o/fu, nang ńkyín kii*ba/chi kyi-chi*.

Akat nyí Orí

⁷ Óburúkpâbí mú mu Otu Kyítá o-chî mě etông akat akíri. Ké akat ányi, me n/ri ǎ ké o/bwom ké bukô-ekpe nyí ba/bi ba-kan ké orí, ne nyǐ o/níbî orí ámu ké bubwô emen.

⁸ O-bí mě o/fu, Émos, wo a/ri ebóng. Me n-faa n/fu, n/ri orí. Nyǐ o/raa kâng o/fu, me mu n-kúng ng orí mún n-tông n/fu, banet ejí mbe wǎ ekpe-kyise nyí e*fí dángdáng*. Me mm*ba/chi n-chîyángê dyityém ejí kyi-kim ne busông ḿbú n/fu, n-kyâ kámbé*.

⁹ N/chi m-bên biǐnyáám-byikit ḿbyí kyikû-banet ńkyí Ázik mbe ba-kyâ ofê. N/chi m-bên byise-ociring ḿbyí ké Ézerel. N/chi m-man ne kyikû-butu ńkyí Otu Jérobâm mú Ézerel.

Émos ne Amazáya

¹⁰ Amazáya mú nchi kyifen-Osówo, mú mu ké Bétel, o-twóm kâng kyitwóm kyi-kâm Otu Jérobâm o/fu, Émos o/kyú ne banet ḿbé Ézerel mu o-nam m ǒ dyiju. Byiraa emen ḿbyí mu o-sét ng byi/chi byi-bên oshê.

¹¹ Nyǐ mu o-sét ng něen o/fu, Otu Jérobâm o/chi o-kpú ké byití, ne ba/chi ba-kúng banet ḿbé Ézerel ké esí ebe ba-dim ne mbé eshê ekíri wǎ básóng.

¹² Amazáya o-raa kâng ne Émos o/fu, kyi/kwárê, ǎ mkpábé mú odasét byiraa-Osówo. Bwa esim ké Júda a-da-sét byiraa eyên áku. Mbé bakpêe ǒ akpuga ké byiraa ḿbyí amu a-sét ng.

¹³ *Dachîsét byiraa nyín ké Bétel nang kabónge*. Nyín kyikit ńkyí otu mu o-fâ Osówo, kyise-kyifen-Osówo echi ńkyí oshê omúmú.

¹⁴ Émos o-faa Amazáya o/fu, me nn*chi dyizong-mkpábé mú odasét byiraa-Osówo mú bada ǎ ekye akpuga*. Me n-chi i mbâm ebû, ne mu n-tún n byichí ḿbyí byidazím byirim.

¹⁵ Nké Óburúkpâbí o/kúng mě ké bǎmkpóngé ejí wǎ mbâm ebû ne o-kye mě busa o/fu, me nca n-da-sét banet emen ḿbé Ézerel byiraa emen.

¹⁶ Kántîk, fwôo atông a-jwo ńkyí Óburúkpâbí o/sét. Wo a/sét mě a/fu, me n*dachîsét byiraa-Osówo* a/fu, me n*dachîraa kyi-kim ne banet ḿbé Ézerel*.

¹⁷ Ké bubwô ámbu, ǎ Amazáya, Óburúkpâbí oo/raa ne wo o/fu, onyi eyên o/chi o-kûryí akpara ké byiká-oshê, ne ba/chi ba-ju bwǎn eyên ké byití. Ba/chi ba-kyii esí eyên ba-kye banet bakíri. Wo oyén a/chi a-kpú ké oshê mú banshâng bakye. Ne ba-man ba-kúng banet ḿbé Ézerel ké esí ebe ba-dim ne mbé wǎ básóng.