Émos 6 - Bokyi Bible

Ba/bên Oshê mú Ézerel

¹ Kyi/chi kyi-bên kanong kanong ne ben mú bamu ba-kyú u dyikpen ńdyí byiryíí ké Záyon, ne ben mú ba/fu, chwǒm kii*chi běn ké Samérya* ben biǐtí-banet ḿbé kiǐtí-oshê mún, mú Ézerel, ben mú banet mbe ba-bâ ba-kâm běn ba/fu, ben bachwáp kámbé.

² Ca n̂g ba-da-tún achi ké oshê mú Káne ba-ri. Ba-ca to kashú ba-ribi ké kiǐtí-oshê mú Hámat, ba-shû ba-ribi ké oshê mú Fyilíta mú badakó Gât. Eshê ányi e/mû e/nwa e-shwôm byibám-butu ḿbyí Júda ne Ézerel? Esí ebe e/mû e/rêe e-shwôm nyí enen*?

³ Ben ba/né ebángê ba/fu, dyicí-busông ndyi dyi-bâ, nké ńkyí ben bamu ba-chi i nkyi kyi-chi i dyicí ándyi dyi-firi jwángjwáng.

⁴ Kyi/chi kyi-bên kanong kanong ne ben banet ḿbé bamu ba-kyú u ké byichí ḿbyí byinong byinong, ba-nabe ng byiká, ba-chi i ajî ké enyam-mpong ne ebû.

⁵ Ben ekwan e-nyîn n běn ekpet, ba-kwán n ba-kim m dyícîng wǎ eringe nyí Otu Dívit o/mû o-kwán n o-kim m.

⁶ Ben ba-fâ bato ba-sú ké abâng pwat ne ba-jwáp, ba-sabe ng bakút ḿbé badanyîn kyinung ba-shwôm, nké ben ba*fí ba-tii ng oshê mú Ézerel mú oo/róng*.

⁷ Ké bubwô ámbu, ben nké ba/chi ba-kyú bambwôp kashú-banet ḿbé ba/chi ba-yip kámbé ba-jâ ne mbé eshê ekíri wǎ básóng. Ajî enen nyí bamu ba-chi i a/chi a-man.

⁸ Osówo Óburúkpâbí mú mu Otu Kyítá mú o/rêe o-shwôm oo/kuri běn ekó ńnyín nyí shwanshwan o/fu, byiko etông ḿbyí banet ḿbé Ézerel mbyi byi-sa ng mě kafâ. Byise ebe ḿbyí byinong byinong byi*fí byi-nyîn n mě*. N/chi n-yip dyityém-oshê ebe ne kángkáng byěm ḿbyí mbyi ké mǔ n-kye onet-bushwôn ebe.

⁹ Â banyinchéng ba/waa ké kyikû-banet ashí diǐkpú, ba/chi ba/kpú. [

¹⁰ Onet mú o/chi o-tî kyipe-bukyû ńkyí wǎn-boné emen mú oo/kpú nké o/chi o-kúng onet mú odakpú éné ké kafâ-kyise o-byí ne nyǐ kyíjí. Ntî kyipe-bukyû ámu o/chi o-kó nang yeě mú o/tôong okpó ké kyise, o-bí ǎ o/fu, onet okíri o/tôong ányi ne wo? Ejá e/chi e-faa e/fu, aa*wááng*. Ntî kyipe-bukyû ámu o/chi o-faa kâng o/fu, cíbî pyêp. Byi-man byi-bám byiko ḿbyí bii*raa kyi-kim nang ne dyizîn ńdyí Óburúkpâbí*.]

¹¹ Â Óburúkpâbí o/kye busa, byise ḿbyí byiryên ne ḿbyí boǒníng byi/chi byi-sêe rugirugi.

¹² Bubyî-orá bu-zóngê e ké aká? Banet ba-kpang ng kyifát ké kafâ-baya? Nké ben ba-pín n ntûntû o-bírî bukye ḿbú badaryí ba-kpú, ba-yángê ńkyí nkyi kanong kyi-firi kyibî.

¹³ Ben bamu ba-tông ng byiko ba/fu, ben ba/koo oshê mú Lódéba. Ben bamu ba-tông ng byiko ba/fu, be byimu byi-shwane e mú byi/koo oshê mú Kanyâm.

¹⁴ Osówo Óburúkpâbí oyén mú o/rêe o-shwôm o/raa o/fu, banet ḿbé Ézerel, me n/chi n-twóm basúja ḿbé banet-bushwôn enen ba-ba-koo oshê enen. Basúja ámbe ba/chi ba-cít běn kyi-fím ké owo mú Hámat ké kyicê ńkyí bushûyû tete kyi-ribi ké owo mú Áraba ké kyicê ńkyí busyísen.