Émos 5 - Bokyi Bible

Osówo o/kó Banet ḿbé Ézerel o/fu, basaa Byiko, ba-mîng Byibî echi

¹ Fwôo n̂g atông, ǎ banet ḿbé Ézerel, ba-jwo okwan-bukyû mún mú mu n-tii ng běn. N/fu,

² oshê-búsé mú Ézerel oo/róng, oo*ba/chi o-chîbûu* oo/róng o-waa kǎnchí kyísí, ne onet o*fí mú o/chi o-chwáp kámú o-bûu*.

³ Óburúkpâbí mú mu Otu Kyítá o/raa o/fu, oshê mú Ézerel obónge o/twóm égot-basúja etánge, nké bajam batánge nké nke ba/fyi. Oshê okíri o/twóm bajam-basúja batánge, nké ashí diǐkpú nké nke ba/fyi.

⁴ Óburúkpâbí o/sét banet ḿbé Ézerel o/fu, bâ n̂g ba-kâm mě, ne ben ba/chi ba-kpen.

⁵ *Da n̂g ece ké Byishíba ba/fu, ba-da ng mě ekye ofê*. *Da n̂g ekan ba/fu, ben ba-kyé ng mě ké Bétel*. Bétel o/chi o-tánê. *Da n̂g ece ké Gyígal*. Ba/chi ba-kám banet ḿbé Gyígal ba-dim ne mbé wǎ básóng.

⁶ Bâ n̂g ba-kâm Óburúkpâbí, ne ben ba/chi ba-kpen. Â ba*da/bê* nyǐ o/chi o-shí banet ḿbé Ézerel wǎ okwâ, baa*kpá byiko*. Okwâ ámu o/chi o-shí banet ḿbé Bétel, ne onet o*fí mú o/chi o-man erîp kámú*.

⁷ Ben banet ḿbé bamu ba-né ng ntûntû ba-ryí i acît, ba-cít ng banet ké byěm ḿbyí byi/já kámbé, ba/firi ké busông.

⁸ Óburúkpâbí nké o/chi azu-ékpére nyí badakó Pyilyâdas ne Oráyan. Nyǐ mu o-chi i kyifip kyi-bírî dyicí, o-chi dyicí dyi-bírî buchú. Nyǐ mu o-kó ng omu mú mu ké baya ḿbé baryên o-yip kámú o-pwó ké esí. Nyǐ o-bángê e Óburúkpâbí.

⁹ Nyǐ mu o-bên n biǐtí-banet ne byikit ebe ḿbyí mbe ba-bwom m ba-nwa byití.

¹⁰ Nang yeě mú o*fí o-bángê e ne acît eryí* mú mu o-sét ng ntûntû ké esuk, o-sa ng běn ben banet ḿbé Ézerel kafâ.

¹¹ Ben baa/cít banet-byikpu, ba-koo kámbé byiryíng ebe. Ké bubwô ḿbún, ben baa*ba/chi ba-kyú byise ḿbyí byinong byinong ḿbyí bamu ba-bi ng* nang bato ḿbé biǐnyínǒng-byifát ḿbyí bamu ba-chi i baa*ba/chi ba-jwáp*.

¹² Me mu n-nyît ng eringe nyí byibî enen byi/rêe, ne bujê-byibî ḿbú ben baa/chi. Ben bamu ba-fâ banet ḿbé banong ké busông, ba-koo ng bangu, ne bamu ba-két ng mpan-acît eryí o-bên n banet-byikpu ké esuk.

¹³ Ne ké bubwô ámbu, pyêp ecíbî ké nkéré mú kyibî-nkéré ńkyín mu chwǒm-bubong ńkyí onet odachi.

¹⁴ Kyú n̂g ne okabe mú badachi chwǒm ńkyí nkyi kanong, *chí ńkyí nkyi kyibî* eringe nyí ben badakpen. Ne Osówo Óburúkpâbí mú o/rêe o-shwôm kâng o/chi o-kyú ké ntûntû ne ben, eringe nyí ben bamu ba-raa ng ba/fu, nyǐ mu ne ben.

¹⁵ Kyibî kyikû běn esa kafâ, kyinong kyikû běn ejê ba-kûsét ntûntû ké esuk. Katô Osówo Óburúkpâbí mú o/rêe o-shwôm o/chi o-ri banet ḿbé oshê mún, ḿbé ba/tôong bakpó bafip.

¹⁶ Ké bubwô ámbu, Osówo Óburúkpâbí mú mu Otu Kyítá mú o/rêe o-shwôm o/raa o/fu, ba/chi ba-jwo dyiwonge ne bukyû etii ḿbú bafip ké kyiká-oshê nang kyirá. Nang banchi byifát ba/chi ba-kó kámbé ba-ba-tii bukyû ámbu, cibicibi ne banet ḿbé mbe ba-yámê e kámbé ba/fu, batii bukyû.

¹⁷ Bukyû etii bu/chi bu-róng ké kángkáng byifát. Kángkáng ḿbyín byi/chi byi-chi, ké nǎ, me mu m-bâ m-ba-kye běn busông. Óburúkpâbí nké o/raa.

¹⁸ Kyi/chi kyi-bên kanong kanong ne ben mú bamu ba-tî ng achi ké dyicí ńdyí Óburúkpâbí. Ebóng kanong ńké dyicí ándyi dyida běn echi. Ké nǎ, dyicí ándyi dyi/chi dyi-kyú běn dyicí ńdyí kyifip, *chí ńdyí kiinwángé*.

¹⁹ Dyi/chi dyi-kyú běn wǎ onet mú mu o-chêe ng ekpang o-da-kwárê ne njúkpang, ne wǎ onet mú o/fyi ké kyise o-ba-twôom bubwô ké ekpe efyi e-jwóm ǎ.

²⁰ Dyicí ńdyí Óburúkpâbí dyi/chi dyi-bâ ne kyifip, *chí kiinwángé*. Dyi/chi dyi-kyú dyicí ńdyí kyifip, ńdyí kiinwángé kii*chi nang kaǎnyín*.

²¹ Óburúkpâbí o/raa o/fu, ajî-byifen enen mbyi byi-sa ng mě kafâ. Me n/né kámbyí.

²² Â ba/bê ne byifen ḿbyí badafwá byirim-enyam byi-shí ne ḿbyí badakye byiryíng, mm*ba/chi n-koo kámbyí*. Mm*ba/chi n-koo byitú enen ḿbyí baa/nen byi-rêe ba/fu, ba-bâ ng echi byifen ba-kye mě*.

²³ Mîng n̂g kyicoge-ekwan enen nyí bamu ba-kwán n. N*fí n-ryuu ng n/fu, n-jwo ng ácîng enen nyí bamu ba-kim m*.

²⁴ Nké mu n-ryuu ng n/fu, ntûntû esét osen wǎ kace, ne kanong echi kasen to wǎ kace ńké kaa*núng ne banyá*.

²⁵ Banet ḿbé Ézerel, me n*da běn ebí n/fu, chi n̂g byifen ba-kye mě ké bajam-aje ámbe bafee* ḿbé me n/kúng běn ba-cen ké kyikim-dyikán*.

²⁶ Nké kántîk, ké nǎ, ben baa/fé erím-bakye nyí Sákut, mú mu osówo ne otu enen, ne nyí Káwan, mú mu osówo-ékpére enen, ben ba/chi ba-tû erím-bakye ányi ba-dim ne nyǐ,

²⁷ ké nkéré nn/kúng běn ba-dim wǎ básóng ké esí nyí adashwôm Damásákus. Óburúkpâbí mú odabángê Osówo mú o/rêe o-shwôm nké o/raa.