Émos 4 - Bokyi Bible

¹ Ben banyinyi ḿbé Samérya, fwôo n̂g atông ba-jwo ńkyín, ben mú bamu ba-rêe ng baryên wǎ bampong ḿbé mbe ba-man n enen kámbé ké Báshan. Ben mú bamu ba-bên n banet ḿbé mbe kyeekyee bútûp etî, ba-cít ng banet-byikpu, ba-sét ng batyép enen ba/fu, bakû běn ekye bato kángkáng nkéré.

² Eringe nyí Óburúkpâbí mú mu Otu Kyítá mu kanong, nyǐ oo/ryí ocím o/fu, ací nyi a-bâ nyí ba/chi ba-tut běn ké byílôp ba-dim ne ben. Nang yeě ké burwám enen o/chi o-kyú wǎ kakworê ńké baa/kám kánké ké byílôp.

³ Ba/chi ba-tut běn ba-ca ne ben ké kyikit-ekpe ńkyí kii/bûu, ńkyí nkyi fáráng, ba-yip běn ba-twóp kyíjí.

Banet ḿbé Ézerel ba/né ekwâa ńkyí Osówo o/tángê Kámbé

⁴ Óburúkpâbí mú mu Otu Kyítá o/raa o/fu, ben banet ḿbé Ézerel, â bamu ba-ryuu ng ba/fu, ben ba-man ba-chi kyibî, ca n̂g ké kyikit-ociring ńkyí ké Bétel ba-da-chi kyibî. Ca n̂g ké Gyígal ba-da-chi kyibî ne busa enen kángkáng. Ca n̂g kashú ba-bâ ne byitú ḿbyí badakûbachi kyifen kángkáng dyicófóróng, ba-kûbê ne eyáré enen ké kángkáng ací achât.

⁵ Ca n̂g kashú ba-yip ng berêt enen ba-chi i kyifen-asǎma ekó ba-kyâ Osówo, ba-kûtông byiko kyi-kim ne byifen byikíri ḿbyí bamu ba-chî ng echi ba-nye ng. Dyizong-chwǒm ńdyín nké dyida běn enyîn echi.

⁶ Me nké m/bê ne esong ké kángkáng eshê enen, nké ben ba*da/bwa esim ba-kâm mě*.

⁷ Me n/kám omu ké nkéré mú byíkwôn enen mbyi byi-ryuu ng kámú kanong kanong. Me n/twóm omu o-na ké oshê obónge, n-né etwóm ké oshê okíri. Omu o/na ké kyifát kyibónge, kyifát kyibónge ńkyí áku kyi-kpú.

⁸ Banet ḿbé eshê chwóó, ḿbé ba/mû baa/kyee ké kyijé-omu, ba/dim ba-wâa ké oshê obónge mú ba/mû ba/kabe ba/fu, mbé ba-ri ng omu ba-jwáp, nké omu o/mû o*fí mú o/kwárê kámbé*. Nang ké byěm ḿbyín byi/chi, ben ba*da/bwa esim ba-kâm mě*.

⁹ N/twóm kiinsóngé-bufú kyi-shí byíkwôn enen. Agurubí a-ryí kángkáng byifát enen ne byichí enen ḿbyí byidazím byirim. Nké ben ba*da/bwa esim ba-kâm mě*.

¹⁰ Me n/twóm kyirwóm kyi-kâm běn wǎ eringe nyí n/twóm kyi-kâm banet ḿbé Éjip. N-ju byisat enen ké byití, n-kúng bubyî-orá enen n-dim ne mbú. Me n/chi kyinung-byikwóm-banet kyi-sú běn ké éfâ-nzóng, ké byikit ḿbyí ben ba/bi boompyep-byití enen. Nké ben ba*da/bwa esim ba-kâm mě*.

¹¹ N/ju kyicê-banet enen wǎ eringe nyí n/ju banet ḿbé Sódom ne Gomóra. Kyicê-banet enen ḿbé ba/fem ba/mû wǎ kiǐshíshí-kyikwón ńkyí kyi/kám okwâ, ńkyí ba/nyii ba-fîm ké okwâ. Nké Óburúkpâbí o/fu, ben ba*da/bwa esim ba-kâm mě*.

¹² Ké bubwô ámbu kâng, ǎ banet ḿbé Ézerel, me n-kú m-bâ běn ekye busông. Ne ké nǎ, me n/chi n-chi ńkyín, kpá n̂g byiko ḿbyí n/chi m-pan běn mpan.

¹³ Osówo nké o/chi eku ne afú. Nyǐ nké mu o-chi i onet o-nyît okabe emen. Nyǐ nké mu o-yángê e dyicí dyi-bírî buchú. Nyǐ mu o-cen n kyíbóng-ejíí. Nyǐ o-bángê e Osówo Óburúkpâbí mú o/rêe o-shwôm.