Émos 3 - Bokyi Bible

¹ Banet ḿbé Ézerel, fwôo n̂g atông ba-jwo kyitwóm ńkyín ńkyí Óburúkpâbí o/sét kyi-kim ne ben, ben oshê omúmú mú nyǐ o/fîm kámú o-byí ké Éjip.

² Ké kángkáng eshê nyí nyi ké ejíí, ben kǎnchí nké n/nyît běn, ba-jê mě. Ńkyín nké nkyi kyi-chi i byibî enen byi-jang erángê ké bushú ejí, ne ké bubwô ámbu, n/chi m-man n-kye běn busông.

Bǎmkpóngé ḿbé Mkpábé mú odasét Byiraa-Osówo

³ Banet ashí afee ba-man n edim bucen burwám? â ba*da/pem kpáá kyikû ké esim*?

⁴ Ekpang e-man n efém dyikáá ké kyizinge? â e*da/ri enyam nyí edakám*? Wǎn-ekpang o-wonge e dyikáá ké kafâ-bucim? â o*da/kám chwǒm*?

⁵ Kanurung ka-kpú u ké kaǎtám ńké ba*da/fé chwǒm*? Kaǎtám ka-mee ng dyikáá? â chwǒm kyi*da/ta kánké*?

⁶ Ntán-byití o-man n eróng ké oshê? mú oo*chi banet ba-shî*? Busông bu-man n enung ké oshê? â Óburúkpâbí o*da/twóm kámbú*?

⁷ Óburúkpâbí mú mu Otu Kyítá oo*man echi chwǒm nang kyibónge* â o*da/bwóp ne kashú o-sét bǎmgbán emen ḿbé mbe bamkpábé ḿbé badasét byiraa emen*.

⁸ Yeě oo*shî* â ekpang e/fém*. Â Óburúkpâbí mú mu Otu Kyítá o/sét, yeě oo*ba/chi o-sét kyitwóm emen*.

Busông ḿbú Banet-Samérya ba/chi ba-ri

⁹ Sét n̂g banet ḿbé mbe ba-kyú u ké byibám-butu ḿbyí ké Éjip ne Áshídot ba/fu, bâ n̂g kyikit kyibónge ké eku nyí e/wáp Samérya e-fé ké kafâ, ba-ba-ri ocît mú mbe ba-cít ng banet-byikpu ké kafâ-oshê ámu.

¹⁰ Óburúkpâbí o/raa o/fu, banet ḿbén mbe ba-yip ng byěm ḿbyí ba/koo ké busa, ba-yip ké kajii ba-fé ké byibám-butu. Ba*fí ba-nyît ng nang eringe nyí badasét ntûntû*.

¹¹ Ne ké bubwô ámbu, onet-bushwôn ebe o/chi o-wáp esí ebe o-fé ké kafâ, o-bên byikit ḿbyí mbe ba-rem m ba-nwa ng byití, o-bên byibám-butu ebe.

¹² Óburúkpâbí o/raa o/fu, wǎ eringe nyí mbâm ebû mu o-ri ng byiká-ebû nké nke byifee, ne ntáng okíri butông-ebû nké nke, nyí ekpang ee/kám e-ryí, éné to nké boǒnyín-banet ḿbé Samérya ba/chi ba-fem, ḿbé mbe ba-kyú u ba-jêem m kántîk ké [byichí ḿbyí byinong byinong.]

¹³ Óburúkpâbí mú mu Otu Kyítá mú o/rêe o-shwôm mu o-raa ng o/fu, fwôo n̂g atông kántîk, ba-kuri kyikû-banet ńkyí Jekôp ekó.

¹⁴ Ké dyicí ńdyí n/chi n-kye banet ḿbé Ézerel busông ké byibî ebe, n/chi m-bên byikit-byifen echi ḿbyí ké Bétel. N/chi m-bú bakô-kyikit-kyifen echi nang kyirá, ne byikit ámbyi kángkáng byi/chi byi-bûu byi-tyem kyísí.

¹⁵ N/chi m-bên byise ḿbyí mbe ba-kyú u ké kyifang ne ḿbyí mbe ba-kyú u ne burwom. Byise ḿbyí ba/nap kámbyí ké asháng-eshwa byi/chi byi-bûu byi-myii. N/chi m-bên kiimbâng-kyise nang kyirá.