Émos 2 - Bokyi Bible

Oshê mú Mówep

¹ Óburúkpâbí o/raa o/fu, banet ḿbé Mówep baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/shí byikúú ḿbyí otu mú Édom byi-bírî atông, ba*da/kye kámbyí ofê*.

² N/chi n-twóm okwâ ké esí nyí Mówep, n-shí byikit ḿbyí mbe ba-rem m ba-nwa ng byití, ḿbyí mbyi ké Kérot. Banet ḿbé Mówep ba/chi ba-kpú ké nkéré baa/jwo kyicoge-byití, ké nkéré mú basúja ba-kú ba-nyán n, biintán byi-rime e.

³ N/chi n-ju otu mú Mówep ne kángkáng banet-ashí ḿbé ké esí nyí Mówep.

Oshê mú Júda

⁴ Óburúkpâbí o/raa o/fu, banet ḿbé Júda baa/chi kyibî kampén chwóó, ne ké bubwô ḿbún, m-man n-kye kámbé busông. Mbé baa/né byěm ḿbyí n/tángê kámbé, ne ba*da/tî byije ejí*. Esówo ányi ebónge nyí e*fí ké kafâ* nyí banchí ebe ḿbé kpákpá ba/kye kányí ofê nké ee/nîm kámbé ba-róng.

⁵ Ké bubwô ámbu, n/chi n-twóm okwâ ké Júda n-shí byikit ḿbyí ké Jerúsélem, ḿbyí mbe ba-rem m ba-nwa ng byití.

Mpan mú Osówo o/pan Banet ḿbé Ézerel

⁶ Óburúkpâbí o/raa o/fu, banet ḿbé Ézerel baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/kúng banet ḿbé mbe ba-chi i kanong ba-shee wǎ básóng. Ké nǎ, banet ámbe ba*fí ba-man n eré afwá nyí ba/ryí* banet-kyikpu ḿbé baa*man eré nang abe*.

⁷ Mbé [ba/cím] banet ḿbé ba*fí ne busa* ba-fé kyísí, ba-tut banet-byikpu ké bukwóp ba-twóp kú. Wǎn ne bonchí ba/rí ne [búsé] bubónge, ne ké bubwô ámbu, ba/bên dyizîn ejí.

⁸ Ké kángkáng byikit-byifen echi, banet ba/rí ké byídí ḿbyí banet-kyikpu ba/sí kámbé butông ké afwá nyí ba/ryí kámbé. Ké kiǐtí-kyise-kyifen echi ńkyí Osówo ebe, mbé ba/jwáp bato ḿbé ba/koo ne banet ḿbé ba/ryí kámbé afwá.

⁹ Nké, ǎ banet ejí, kyi/mû ké dyishí enen nké n/ju banet ḿbé Ámórit, banet ḿbé ba/mû ba/kwóp wǎ biǐwó, ba-shwane e wǎ nsan.

¹⁰ Me n/fîm běn ké oshê mú Éjip, n-tông běn kiǐfáng ba-shwôm ké kyikim-dyikán ké bajam-aje bafee, ne n-yip esí nyí banet ḿbé Ámórit n-kye běn e-firi nyí enen.

¹¹ Me n/cá kyicê-bwǎn enen n/fu, bakyú bamkpábé ḿbé badasét byiraa ejí, n-fîm kyicê-byisat enen n/fu, bakyú banet ḿbé me n/cá n-kye byiko ejí. Ńkyín kyi*fí éné ǎ banet ḿbé Ézerel*? Me Óburúkpâbí nké n/raa.

¹² Nké ben ba/chi banet ḿbé me n/cá n-kye byiko ejí ba-jwáp bato, ba-nyán bamkpábé ḿbé badasét byiraa ejí ba/fu, ba*dachîsét kyitwóm ejí*.

¹³ Kántîk, n/chi n-shiryi běn n-fé kyísí, ne ba/chi ba-kûbyé wǎ mútu mú o/jang etû dyitû.

¹⁴ Nang banet ḿbé badakwáng ochéé baa*ba/chi ba-fem*. Banet ḿbé mbe ne busa, busa ebe bu/chi bu-man, ne basúja baa*ba/chi ba-man enyii akpen ebe*.

¹⁵ Banet ḿbé badaman eché abán baa*ba/chi ba-chîman ebwom*. Ḿbé badaman ezóngê ochéé baa*ba/chi ba-fem*. Banet ḿbé mbe ba-yú u ké bubyî-orá baa*ba/chi ba-man echêe ne akpen ebe*.

¹⁶ Ké dyicí ándyi, nang basúja ḿbé badajang ekán byití ba/chi ba-pwó byiyám-byití ebe ba-chêe. Óburúkpâbí nké o/raa.