Émos 1 - Bokyi Bible

¹ Nyín byiraa-ekpábé ḿbyí Émos mú o/mû mbâm ebû, mú o/fím Tékówa. Ké aje afee ne esí nyí e/náng e-kûnáng, ké nkéré mú Otu Ozáya o/mû otu mú Júda ne Otu Jérobâm mú wǎn-Otu Jehóháshi o/mû to otu mú Ézerel, Osówo o/sét Émos byiraa ḿbyín kyi-kim ne Ézerel.

² Émos o/raa o/fu, Óburúkpâbí mu o-raa ng ké kaku ńké Záyon ne ejá kyíbóng kyíbóng. Ejá emen nyi e-fím m ké Jerúsélem e-bâ wǎ etare, ne nyi e-chi i aro a-jwóm ne biǐbyâa ḿbyí mbyi ké kaku ńké Kámel byi-bwam shéét.

Mpan mú Osówo o/pan Eshê nyí nyi e-kyú u e-kim ne Ézerel Oshê mú Syírya

³ Óburúkpâbí o/raa o/fu, banet ḿbé Damásákus baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/tî banet ḿbé Gyílet wǎ básóng, ké bukwóp ḿbú boo*nwa*.

⁴ Ké bubwô ámbu, n/chi n-twóm okwâ o-shí kyibám-butu ńkyí Otu Házil o/bi, ne n/chi n-shí byikit ḿbyí badarem ba-nwa byití, ḿbyí Otu Benhádat.

⁵ N/chi n-sé afyi nyí Damásákus, n-fîm banet ḿbé mbe ké owo mú Áben ne otu mú Bétédin. Ba/chi ba-kúng banet ḿbé Syírya ba-dim ne mbé wǎ básóng ké esí nyí Kî.

Oshê mú Fyilíta

⁶ Óburúkpâbí o/raa o/fu, banet ḿbé Gáza baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/kúng kyirim-oshê kyimúmú ba-shee banet ḿbé Édom wǎ básóng.

⁷ Ké bubwô ámbu, n/chi n-twóm okwâ ké ekpe nyí e/wáp oshê mú Gáza e-fé ké kafâ, n-shí byikit ebe ḿbyí mbe ba-rem m ba-nwa ng byití.

⁸ N/chi n-fîm batu ḿbé eshê nyí Áshídot ne Áshíkelon. Me n/chi n-kye oshê mú Ékoron busông, ne kángkáng banet ḿbé Fyilíta ḿbé ba/chi ba-waa ba/chi ba-kpú.

Oshê mú Táya

⁹ Óburúkpâbí o/raa o/fu, banet ḿbé Táya baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/kúng kyirim-oshê kyimúmú ba-dim ne mbé wǎ básóng ké esí nyí Édom, ne ba*da/tî ocím-kyikwáré mú ba/ryí*.

¹⁰ Ké bubwô ámbu, n/chi n-twóm okwâ ké ekpe nyí Táya, n-shí byikit ḿbyí mbe ba-rem m ba-nwa ng byití.

Oshê mú Édom

¹¹ Óburúkpâbí o/raa o/fu, banet ḿbé Édom baa/chi kyibî kampén chwóó, ne ké bubwô ḿbún, m-man n-kye kámbé busông. Mbé ba/zóngê ne banet ḿbé Ézerel ḿbé mbe bwǎn-bané ebe ké kyikû ne bushwám ba*da/ri kámbé bafip*. Busa-dyityém ebe bu*fí bu-man n* ne baa*mîng kámbú bu-man*.

¹² Ké bubwô ámbu, n/chi n-twóm okwâ ké oshê mú Táman, n-shí byikit ḿbyí badarem ba-nwa ng byití, ḿbyí mbyi ké Búzara.

Oshê mú Ámon

¹³ Óburúkpâbí o/raa o/fu, banet ḿbé Ámon baa/chi kyibî kampén chwóó, ne ké bubwô ḿbún, m-man n-kye kámbé busông. Ké byití ebe ḿbyí ba/nwa ba/fu, mbé ba-koo ng esí e-jê, mbé ba/ju banyinyi ḿbé ké Gyílet ḿbé mbe ne afít, ba-fîm bwǎn ba-pwó.

¹⁴ Ké bubwô ámbu, n/chi n-twóm okwâ ké ekpe nyí e/wáp oshê mú Rába e-fé ké kafâ, n-shí byikit ebe ḿbyí mbe ba-rem m ba-nwa ng byití. Banet kâng ba/chi ba-wonge ké dyicí ńdyí byití, ne bunwa bu/chi bu-sóng wǎ afú nyí aryên.

¹⁵ Ba/chi ba-kám otu ebe ne banet-ashí emen ba-dim ne mbé wǎ básóng.