Ekyilyizátes 9 - Bokyi Bible

¹ Me n/kabe kanong kanong m-bwon ne n/ri n/fu, édúú nyí banet-bubong ne banet ḿbé mbe ba-chi i kanong nyi ké abwô nyí Osówo, nang kyijé ebe nang [kafâ ebe esa. Onet o*fí mú mu o-nyît ng chwǒm nang kyibónge* kyi-kim ne ńkyí nkyi ǎ ké kashú*.

² Kyi*da/yángê*.] Dyizong-dyikpen dyibónge nké ndyi dyi-bâ dyi-kâm banet ḿbé mbe ba-chi i kanong ne bambên atyém ne banet ḿbé ba/nwa atyém [ne ḿbé atyém ebe aa*nwa*] ne banet ḿbé mbe ba-nyît ng Osówo ne ḿbé baa*nyît ǎ* ne ḿbé mbe ba-chi i byifen ba-kyâ ǎ ne ḿbé ba*fí ba-chi i*. Onet mú o/nwa dyityém o*da/shwôm nchi byibî*. Onet mú mu o-sem m dyizîn-Osówo o*da/shwôm onet mú o*fí o-sem m*.

³ Dyizong-dyikpen dyibónge dyi-bâ dyi-kâm kángkáng banet, ne ńkyín kyi/bên kanong kanong wǎ nang ebóng chwǒm ńkyí nkyi kyi-chi i ké ejíí ńnyín. Wǎ eringe nyí banet ba/tôong bakpó, atyém ebe aa/sú ne byibî ne kyifún, ne mbé ba-kpú u kiǐmút.

⁴ Nké nang yeě mú mu okpó ké oshê mú banet bakpó mu ne okabe mú odatî. Kabyî ńké nke kakpó ka/shwôm ekpang nyí ee/kpú.

⁵ Ké nǎ, banet bakpó mbe ba-nyît ng ba/fu, mbé ba/chi ba-kpú, nké bakúsí baa*nyît chwǒm nang kyibónge*. Mbé ba*fí to ne eyáré akíri*. Baa/ráp kámbé kángkáng.

⁶ Byijé ebe ne bufâ ebe esa ne orêm ebe bii/kpú ne mbé ké kyikû kángkáng. Mbé baa*ba/chi ba-chîkyú ne abwô ké chwǒm nang kyibónge ńkyí nkyi kyi-chi i ké ejíí ńnyín*.

⁷ Ca kashú a-ryí byiryíng eyên ne bunyîn-dyityém, a-jwáp bato eyên ne bunyîn-dyityém to, ké nǎ, Osówo oo/bángê ne ńkyí amu a-chi i.

⁸ Kángkáng nkéré, kyú ne bunyîn-dyityém, ne *dakpút kashú*.

⁹ Kyú ké bunyîn-dyityém ne onyinyi mú mu o-jê ng ǒ, ké a/tôong okpó ké dyikpen ńdyí dyi*da/byí chwǒm* ńdyí Osówo oo/kye ǒ ké ejíí ńnyín. Kyú ké bunyîn-dyityém kángkáng ací nyí dyikpen eyên, ké nǎ, ńkyí adajá ké bǎmkpóngé eyên kyi/man éné kángkáng.

¹⁰ Nang ebóng ńkyí amu a-chi i chi kánkyí a-fé busa, ké nǎ, ké oshê-bakúsí mú mu kyikit ńkyí amu a-wâa ng, bǎmkpóngé ba*fí* okabe o*fí* byinyídíng byi*fí* nang bubong bu*fí*.

¹¹ Me n/ri chwǒm kyikíri to ńkyí n/fu, ké ejíí ńnyín bankwâng ochéé baa*kpógê ochéé kángkáng nkéré* ne bankân byití baa*kpógê byití kángkáng nkéré*. Banet ḿbé mbe ne bubong baa*já chwǒm kángkáng nkéré ńkyí badaryí*. Banet-bubong baa*já esang kángkáng nkéré* ne banet ḿbé badaman echi byěm baa*já biǐtí-byikit kángkáng nkéré*. Dyishí dyi-bên n nang yeě.

¹² Aa*nyît nkéré mú nkéré mú eyên o/chi o-bâ*. Be bii/róng ké kyibî-nkéré ké nkéré mú be byi/mû byi*da/tî achi* wǎ kanurung ńké ka/róng ké kaǎtám kiǐmút, ne wǎ kakworê ńké ka/róng ké kaǎsém.

Ekabe e-kim ne Bubong ne Enyam eróng

¹³ Chwǒm kyikíri nkyi kô to ńkyí n/ri, ńkyí nkyi kyi-tông ng kanong kanong eringe banet mbe ba-kúng ng bubong ké ejíí ńnyín.

¹⁴ Kaǎshê ka/mû ńké banet ba/mû ba*fí ké nké chwóó*. Otu obónge mú mu ne busa o-kye kámbé bunwa. Nyǐ o/wâng kánké o-kpá byiko ḿbyí odabú ekpe o-shwôm.

¹⁵ Onyinchéng o/mû o-kyú u ányi mú o/mû kyikpu, nké o/mû ne byinyídíng kanong kanong ḿbyí [o/mû odaman enyángê kaǎshê ánke. Nké onet o*fí mú o/kabe kyi-kim ne nyǐ*.]

¹⁶ Me kángkáng nkéré mu n-sét ng n/fu, bubong bu/shwôm busa, nké onet o*fí mú odakabe o/fu, onet-kyikpu mu ne bubong* o-tî nang atông ké ńkyí mu o-sét ng*.

¹⁷ Nkyi kanong ńkyí adafwôo atông a-jwo byiraa ḿbyí degere, ḿbyí onet-bubong, kyi-shwôm ényân nyí onet-dyishí ké ncibi mú enyam-banet.

¹⁸ Bubong mbu bu-chi i kanong bu-shwôm byiyám-byití, nké nchi byibî obónge o-man n ebên byěm ḿbyí kanong echi chwóó.