Ekyilyizátes 8 - Bokyi Bible

¹ Onet-bubong kǎnchí nké mu o-nyît ng kyikû ńkyí byěm byi/byí, ké ntûntû. Bubong bu-chi i ǎ o-nyet éjwô, bu-chi kashú emen ekpút. [

Chi ńkyí Otu o/sét

² Chi ńkyí otu mu o-sét ng,] ne *daryí Osówo ocím mú aa*tî*.

³ Otu o-man n echi nang ebóng chwǒm ńkyí kyi/nyîn ǎ. Ké bubwô ámbu, dim ǎ ké bushú, *dabwom ké kyibî-kyikit ánkyi*.

⁴ Ké nǎ, ejá nyí otu e/shwôm busa, ne onet o*fí mú odakán ké dyishí ké ńkyí nyǐ mu o-chi i*.

⁵ Chwǒm kii*ta onet mú mu o-chi i ńkyí otu o/sét*. Ne onet mú mu ne bubong o-nyît ng eringe nyí odachi ne nkéré mú odachi kánkyí.

⁶ Nang ebóng chwǒm nkyi ne nkéré mú onong ne bukwóp ḿbú bunong ḿbú badachi kánkyí, nké be byimu byi-nyît ng kaǎnyín.

⁷ Onet o*fí ké burwám eten mú mu o-nyît ng ńkyí kyi/chi kyi-chi* ne onet o*fí mú oda bě esét*.

⁸ Onet o*fí mú odafem bukyû ekpú* o-kibi nang dyicí ńdyí nyǐ odakpú*. Ányi byití ḿbyí be bii*man efem* ne nang kyibî kii*man bě echwáp byi-ri bukwóp*.

Bambên Atyém ne Banchi Kanong

⁹ Me n/ri ḿbyín kángkáng ké nkéré n/kabe kyi-kim ne byěm ḿbyí mbyi byi-chi i ké ejíí ńnyín, ejíí nyí banet bakíri mbe ne busa, bakíri ba-man ba-ri busông ké abwô ebe. [

¹⁰ Me nn/ri ba-ryii bambên atyém ké kafâ-akun. Nké ké nkéré banet ba-kú ba-fím m ké oryii ba-fyi, mbe ba-kwán n bambên atyém ámbe ekwan-akpee ké bachíchí-eshê nyí bambên atyém ámbe ba/chi byibî-byěm. Ńkyín kyi*da/byí chwǒm*.]

¹¹ Ebóng ńkyí banet mbe ba-jang ng echi byibî. Ké nǎ, ba*fí ba-kyâ banet busông babap* ké byibî ebe*.

¹² Nang nchi byibî mu o-chi i byibî kampén bujam, o-kpen n o-câ, me mu n-nyît ng ké ntûntû n/fu, kyi/chi kyi-ca kanong ne banet ḿbé mbe ba-chi i ńkyí Osówo o/sét, ké nǎ, mbe ba-shî ng ké bushú emen.

¹³ Nké kii*ba/chi kyi-ca kanong ne bambên atyém*. Akpen ebe nyi wǎ kiǐríribí, ne mbé baa*ba/chi ba-kán ne ba-kpú*. Ké nǎ, mbé ba*fí ba-chi i ńkyí Osówo o/sét*.

¹⁴ Nké ńkyín kyi*fí ké kafâ*. Ri ńkyí nkyi kyi-chi i ké ejíí. Mpén okíri, banet ḿbé mbe ba-chi i kanong mbe ba-já ng busông ḿbú bambên atyém, bambên atyém ba-já ng eyáré nyí banet ḿbé mbe ba-chi i kanong. Me n/fu, kyi*fí kyi-nwa ng*.

¹⁵ Ké bubwô ámbu, me m/bángê n/fu, onet otî byiko emen ké bunyîn-dyityém, ké nǎ, bunyîn-dyityém ḿbú nyǐ mu ne mbú ké dyikpen ńdyín bu*fí* kyi-cibi ne aryî eryí ne bato ejwáp ne byiko emen etî ké bunyîn-dyityém*. O-man n echi nang ńkyín nkyí nkyi â o/kûchi bǎmkpóngé ké dyikpen ńdyí Osówo o/kye ǎ ké ejíí ńnyín.

¹⁶ Nang nkéré orá nké n/kan n/fu, n-kyú u ne bubong n-kwâa ńkyí nkyi kyi-chi i ké ejíí, me n/ri n/fu, a-man n ekyú achi fúú buchú ne esû,

¹⁷ aa*tigi a-nyît ńkyí Osówo mu o-chi i*. Nang a-kan nǎ, aa*tigi a-ri bukwóp*. Banet-bubong ba-man n efu mbé mbe ba-nyît ng, nké ba*fí ba-nyît ng*.